• ସମ୍ପତ୍ତି ଥାଇ ବି ସରକାରଙ୍କ ଉପରେ ନିର୍ଭରଶୀଳ ଶ୍ରୀମନ୍ଦିର ପ୍ରଶାସନ
• ହୁଣ୍ଡିରୁ ଆଦାୟ ହେଉଛି କୋଟି କୋଟି ଟଙ୍କା, ତଥାପି ସରକାରଙ୍କ ହାତଟେକାକୁ ଭରସା
• ଜବର ଦଖଲରେ ଜଗନ୍ନାଥଙ୍କର ଶହ ଶହ ଏକର ଜମି
• ପ୍ରଶାସନ ପାଖରେ ନାହିଁ ଅଧାରୁ ଅଧିକ ଜମିର ସତ୍ୱଲିପି
• ଭାଗଚାଷୀଙ୍କ ଠାରୁ ମିଳୁନି ଦେବସ୍ୱ
• ଖଣି ମାଫିଆଙ୍କ କବଜାରେ ଶ୍ରୀମନ୍ଦିର ସମ୍ପତ୍ତି
  ଶ୍ରୀମନ୍ଦିର ନାଁରେ ରହିଛି ପର୍ଯ୍ୟାପ୍ତ ଧନ ସମ୍ପତ୍ତି। ଓଡ଼ିଶାର ୨୩ଟି ଜିଲ୍ଲାରେ ଶ୍ରୀମନ୍ଦିର ନାଁରେ ଅଛି ୬୦ ହଜାର ୪୧୦ ଏକର ଏବଂ ୬ଟି ବାହାର ରାଜ୍ୟରେ ୩୯୫ ଏକର ୨୫୨ ଡିସିମିଲି ଭୂସମ୍ପତ୍ତି ରହିଛି।

• ରାଜା ରାଜୁଡା ଓ ଶ୍ରଦ୍ଧାଳୁମାନେ ପୁରୀ ଶ୍ରୀମନ୍ଦିର ପାଇଁ ପ୍ରାୟ ୬୦,୮୦୫ ଏକର ଜମି ବ୍ୟବସ୍ଥା କରିଥିବା ବେଳେ ଏଥିରୁ ଅଧାରୁ ଅଧିକ ଜମିର କାଗଜପତ୍ର ପ୍ରଶାସନ ପାଖରେ ନାହିଁ।
• ମହାପ୍ରଭୁଙ୍କ ଜମିରୁ ଖଣିଜ ଲୁଟ ବି ଚାଲିଛି।
• ଗ୍ରିନ୍‍ ଟ୍ରିବ୍ୟୁନାଲ ଭଳି ସଂସ୍ଥା ଶ୍ରୀମନ୍ଦିର ପ୍ରଶାସନକୁ କ୍ଷତିପୂରଣ ପାଇଁ ଦେବାକୁ ନିର୍ଦ୍ଦେଶ ବି ଦେଇଛନ୍ତି।
  କଥା ହେଉଛି ରାଜସ୍ୱ ବିଭାଗ ଚାହିଁଲେ ରାଜ୍ୟର ୨୩ଟି ଜିଲ୍ଲାରେ ଥିବା ଜଗନ୍ନାଥଙ୍କ ଭୂସମ୍ପତ୍ତି, ଶ୍ରୀମନ୍ଦିର ପ୍ରଶାସନ ହାତକୁ ଆସିପାରିବ। ସରକାର ଚାହିଁଲେ ୬ଟି ରାଜ୍ୟରେ ଥିବା ଭୂସମ୍ପତ୍ତିରୁ କୋଟି କୋଟି ଟଙ୍କା ରାଜସ୍ୱ ଆଦାୟ କରିପାରିବେ।

 ୧୯୯୯ରୁ ୨୦୧୬ ମସିହା ଭିତରେ ୩୦୦ ଏକରରୁ ଅଧିକ ଜମି ବିକ୍ରି କରାଯାଇ ୧୦କୋଟିରୁ ଅଧିକ ଅର୍ଥ ଶ୍ରୀମନ୍ଦିର କର୍ପସ ପାଣ୍ଠିରେ ରଖାଯାଇଛି ।

• ଯେଉଁ ଭୂସମ୍ପତ୍ତି ଜବର ଦଖଲରେ ଅଛି, ସେଗୁଡିକୁ ମଧ୍ୟ ବିକ୍ରି କରି କର୍ପସ ପାଣ୍ଠି ବୃଦ୍ଧି କରାଯାଇ ପାରନ୍ତା।
• ବେଦାନ୍ତ ବିଶ୍ୱବିଦ୍ୟାଳୟ ଲାଗି ଶ୍ରୀମନ୍ଦିରର ଯେଉଁ ଅମୃତ ମଣୋହି ଜମି ଦିଆ ଯାଇଥିଲା ତାହା ସୁପ୍ରିମକୋର୍ଟରେ ନାକଚ ହେଲା ପରେ ଏବେ ଶ୍ରୀମନ୍ଦିର ଖାତାକୁ ଫେରିବା କଥା।
• ସେପଟେ ୧୯୮୩ ମସିହାରୁ ଶ୍ରୀମନ୍ଦିରରେ ହୁଣ୍ଡି ବସା ଯିବା ସହ ସ୍ୱତନ୍ତ୍ର ଅଧିନିୟମ ବଳରେ ଫାଉଣ୍ଡେସନ୍ ଫଣ୍ଡର ବ୍ୟବସ୍ଥା ହୋଇଛି । ତଥ୍ୟ କହୁଛି ଗତ 3ଟି ଆର୍ଥିକ ବର୍ଷରେ ହୁଣ୍ଡି, ବ୍ୟାଙ୍କ ଏବଂ ଅନ୍ୟାନ୍ୟ ସୂତ୍ରରୁ 113 କୋଟି 2 ଲକ୍ଷ 55 ହଜାର 889 ଟଙ୍କା ଆଦାୟ ହୋଇଛି।

ସେହିପରି ଦାନ ସୂତ୍ରରେ ଗତ 3ଟି ଆର୍ଥିକ ବର୍ଷରେ 12 କେ.ଜି 284 ଗ୍ରାମ୍ ସୁନା ଅଳଙ୍କାର ମିଳିଥିବା ବେଳେ ରୂପା ଅଳଙ୍କାର ମିଳିଛି 214 କେ.ଜି 130 ଗ୍ରାମ୍। ହୁଣ୍ଡି ଟଙ୍କା ବ୍ୟାଙ୍କରେ ରଖି ସୁଧ ମଧ୍ୟ ଆସୁଛି । ତଥାପି ସ୍ଥିତି ସୁଧୁରୁନି ।
ଯଦି ଶ୍ରୀମନ୍ଦିର ପରିଚାଳନା କମିଟି ଏବଂ ଓଡ଼ିଶା ସରକାରଙ୍କ ମଧ୍ୟରେ ସମନ୍ୱୟ ରୁହନ୍ତା, ତାହେଲେ ଭୂସମ୍ପତ୍ତିରୁ     ଯଥେଷ୍ଟ ଆୟ ଆସନ୍ତା। ଆଉ ସରକାରଙ୍କ ହାତଟେକାକୁ ଭରସା ନକରି ଶ୍ରୀମନ୍ଦିର ବ୍ୟବସ୍ଥା ନିଜ ସମ୍ପତ୍ତିରେ ଚାଲନ୍ତା।