ଓଡ଼ିଆ ନବବର୍ଷରୁ ବଦଳିବ ପରମ୍ପରା। ନୂଆ ରତ୍ନପଲଙ୍କରେ ନିଦ୍ରା ଯିବେ ମହାପ୍ରଭୁ । ପୁରୁଣା ପଲଙ୍କରୁ ବାହାରି ନୂଆରେ ଲାଗିଛି ହାତୀଦାନ୍ତ । ବର୍ମା ଟିକ୍ କାଠ ଓ ରୁପା ଚାଦରରେ ଝଲସୁଛି ‘ଗଜଦନ୍ତ ପଲଙ୍କ’। ଆସନ୍ତା ଓଡ଼ିଆ ନବବର୍ଷ ତଥା ମହାବିଷୁବ ସଂକ୍ରାନ୍ତିରୁ ଶ୍ରୀମନ୍ଦିରରେ ଏକ ନୂତନ ଅଧ୍ୟାୟ ଆରମ୍ଭ ହେବାକୁ ଯାଉଛି। ଏଣିକି ପୁରୁଣା ପଲଙ୍କ ନୁହେଁ, ବରଂ ନୂତନ ଭାବେ ନିର୍ମିତ ଭବ୍ୟ ‘ରତ୍ନପଲଙ୍କ’ରେ ନିଦ୍ରା ଯିବେ ଚତୁର୍ଦ୍ଧାମୂର୍ତ୍ତି। ଦୀର୍ଘ ଦିନର ପ୍ରତୀକ୍ଷା ପରେ ଏହି ଗଜଦନ୍ତ ପଲଙ୍କର ନିର୍ମାଣ କାର୍ଯ୍ୟ ଶେଷ ହୋଇଛି। ମୋଟ ୩ଟି ପଲଙ୍କ ନିର୍ମାଣ କରାଯାଇ ଏହା ସମ୍ପୂର୍ଣ୍ଣ ରୂପା ଆଚ୍ଛାଦିତ ହୋଇଛି। ପୂର୍ବରୁ ବ୍ୟବହୃତ ହେଉଥିବା ପଲଙ୍କଟି ଶାଳ କାଠରେ ନିର୍ମିତ ହୋଇଥିବାରୁ ଏହା ବେଶ୍ ଭାରି ଥିଲା, ଯାହାଫଳରେ ସେବାୟତମାନଙ୍କୁ ଏହାକୁ ବୋହିବାରେ ଅସୁବିଧା ହେଉଥିଲା। ଏହାକୁ ଦୃଷ୍ଟିରେ ରଖି ଏଥର ‘ବର୍ମା ଟିକ୍’ କାଠରେ ଏହି ହାଲୁକା ତଥା ମଜଭୁତ ପଲଙ୍କ ପ୍ରସ୍ତୁତ କରାଯାଇଛି।
ତେବେ ଏହି ପଲଙ୍କର ସବୁଠାରୁ ବଡ଼ ଆକର୍ଷଣ ହେଉଛି ଏଥିରେ ଖଞ୍ଜା ଯାଇଥିବା ହାତୀଦାନ୍ତ। ବନ୍ୟପ୍ରାଣୀ ସଂରକ୍ଷଣ ଆଇନ ଓ କଟକଣା ଯୋଗୁଁ ନୂଆ ହାତୀଦାନ୍ତ ବ୍ୟବହାର ନକରି, ପୁରୁଣା ଜରାଜୀର୍ଣ୍ଣ ପଲଙ୍କରୁ ସୁରକ୍ଷିତ ଭାବେ ବାହାର କରାଯାଇଥିବା ହାତୀଦାନ୍ତକୁ ହିଁ ଏହି ନୂଆ ପଲଙ୍କରେ ସଂଯୋଗ କରାଯାଇଛି। ସେଥିପାଇଁ ଏହାକୁ ‘ଗଜଦନ୍ତ ପଲଙ୍କ’ ମଧ୍ୟ କୁହାଯାଏ। ଜଣେ ବଦାନ୍ୟ ଦାତାଙ୍କ ସହଯୋଗରେ ଏହି ପଲଙ୍କରେ ରୁପା ଛାଉଣି କରାଯାଇଛି। କେବଳ ପଲଙ୍କ ନୁହେଁ, ମହାପ୍ରଭୁଙ୍କ ସହ ସାତ ମୂର୍ତ୍ତି ନାରାୟଣ, ମଦନମୋହନ, ଭୂଦେବୀ ଓ ଶ୍ରୀଦେବୀଙ୍କ ପ୍ରଭା ମଧ୍ୟ ନୂତନ ଭାବେ ରୁପାରେ ନିର୍ମିତ ହୋଇଛି। ଛତିଶା ନିଯୋଗ ବୈଠକର ନିଷ୍ପତ୍ତି ଅନୁଯାୟୀ ଓଡ଼ିଆ ନବବର୍ଷରୁ ମହାପ୍ରଭୁ ନୂଆ ପଲଙ୍କରେ ଶୟନ କରିବେ। ପୁରୁଣା ପଲଙ୍କଟିକୁ ଏକ ସ୍ୱତନ୍ତ୍ର ମ୍ୟୁଜିୟମରେ ସଂରକ୍ଷିତ କରି ରଖାଯିବ। । ପୁରୁଣା ଡିଜାଇନ୍କୁ ଅକ୍ଷୁର୍ଣ୍ଣ ରଖି ଏହାକୁ ଏକ ପାରମ୍ପରିକ ରୂପ ଦିଆଯାଇଛି। ଯାହାକୁ ନେଇ ସେବାୟତ ଓ ଭକ୍ତଙ୍କ ମଧ୍ୟରେ ଉତ୍ସାହ ପ୍ରକାଶ ପାଇଛି।
