4 ସପ୍ତାହରେ ଗଲାଣି 4 ଜୀବନ, ନା ତଦନ୍ତ ସରୁଛି, ନା ପୋଡି କମୁଛି । ନିଆଁର ଆଁ ରେ ବାଜି ଲାଗିଛି ଝିଅଙ୍କ ଜୀବନ।କୋଉଠି ଆତ୍ମଦାହ ତ, ପୁଣି କୋଉଠି ଷଡ଼ଯନ୍ତ୍ର ।ଛାତ୍ରୀ,ଯୁବତୀ, ନାବାଳିକା ସବୁ ବର୍ଗର ଝିଅଙ୍କ ଜୀବନ ନେଇଛି ନିଆଁ। ରାଜ୍ୟରେ ଦିନକୁ ଦିନ ବଢୁଛି  ଜଳିପୋଡ଼ି ଯିବା ଘଟଣା। ଯେମିତି ବାଲେଶ୍ୱର ଏଫ୍ ଏମ୍ କଲେଜ୍ ଛାତ୍ରୀ ପୋଡ଼ି ଘଟଣାରୁ ରାଜ୍ୟରେ ବ୍ୟାପିବାରେ ଲାଗିଛି  ଫାୟାର ଟ୍ରେଣ୍ଡ। ପୁରୀରୁ ପଟ୍ଟାମୁଣ୍ଡାଇ, ବରଗଡ଼ରୁ ବାଲେଶ୍ୱର ଯାଏଁ ସବୁଠି ବ୍ୟାପିବାରେ ଲାଗିଛି ଏମିତି କେସ୍। ବାଲେଶ୍ୱର, ବଳଙ୍ଗା, ପଟ୍ଟାମୁଣ୍ଡାଇ ପରେ ପୁଣି ବରଗଡ଼ ପଦ୍ମପୁରରେ ନାବାଳିକା ଛାତ୍ରୀ ପୋଡ଼ି ଘଟଣା ରାଜ୍ୟରେ ହଇଚଇ ସୃଷ୍ଟି କରିଛି ।ଫିରିଙ୍ଗିମାଲରୁ ଗୁରୁତ୍ତର ଅବସ୍ଥାରେ ବୁର୍ଲା ମେଡ଼ିକାଲରେ ଭର୍ତ୍ତି ହେଲା ପରେ ଆଖି ବୁଜିଛନ୍ତି ନାବାଳିକା। ଗୋଟାଏ ମାସରେ ଯାଇଛି 4 ଜଣଙ୍କ ଜୀବନ।

ଜୁଲାଇ 12 ତାରିଖରେ ଏଫ୍ ଏମ୍ କଲେଜର ସୌମ୍ୟାଶ୍ରୀ ବିଶିଙ୍କ ପରେ ଠିକ୍ ଗୋଟାଏ ସପ୍ତାହ ପରେ ଜୁଲାଇ 19ରେ ସାମ୍ନାକୁ ଆସିଥିଲା ବଳଙ୍ଗା ପୀଡିତାଙ୍କ ଖବର। ଏୟାରଲିଫ୍ଟରେ ଯାଇ ଏମ୍ସରେ ଚିକିତ୍ସିତ ହେଉଥିବା ବଳଙ୍ଗା ପିଡ଼ିତା ମେଡିକାଲରେ ହିଁ ଆଖି ବୁଜିଥିଲେ।ଅଗଷ୍ଟ 6 ତାରିଖରେ ପଟ୍ଟାମୁଣ୍ଡାଇରେ ଯୁବତୀ ପୋଡ଼ି ହେଇଯିବା ଘଟଣା ସାମ୍ନାକୁ ଆସିଥିଲା। ଯଦିଓ ଏ କେଶରେ ଏଫାୟାର ନ ରଖିବା କାରଣରୁ ଥାନାଅଧିକାରୀ ସୈଳେନ୍ଦ୍ର ନାରାୟଣ  ପଲେଇଙ୍କୁ ବଦଳି କରାଯାଇଛି ତଦନ୍ତର ରେଜଲ୍ଟ କିନ୍ତୁ ଆଖିଦୃଶିଆ ନୁହେଁ। ବାଲେଶ୍ୱର କେସରେ ମଧ୍ୟ ଛାତ୍ରନେତାଙ୍କ ଗିରଫ ପରେ ବି ଅନେକ ଖିଅ ଅଟକିଲା ଭଳି ଲାଗୁଛି। ବଳଙ୍ଗା କେସରେ ତ ପୋଲିସର ବିଫଳତାକୁ ନେଇ ଚାରିଆଡ଼େ ଚର୍ଚ୍ଚା। ସୌମ୍ୟାଶ୍ରିଙ୍କ ଘଟଣାକୁ ମାସେ ପୁରିବାକୁ ଆଉ ଗୋଟାଏ ଦିନ ବାକି ଥିଲା ବେଳେ ବରଗଡ଼ ଫିରିଙ୍ଗିମାଳରେ ଆଖି ବୁଜିଛି ନାବାଳିକା। ସକାଳୁ ଗାଇସିଲଟ ଥନା ଫିରିଙ୍ଗିମାଳ ଗାଁରେ ୧୩ ବର୍ଷର ନାବାଳିକାଙ୍କୁ ସକାଳେ କିଏ ପୋଡ଼ି ଦେଇଥିବା ଅଭିଯୋଗ ହୋଇଥିଲ। ନିଜ ଘର ପଛପଟ ପଡ଼ିଆରେ ନାବାଳିକା ଜଣଙ୍କ ଜଳୁଥିବାର ଦେଖିବାକୁ ପାଇଥିଲେ ପାଖ ପଡ଼ୋଶୀ। କେହି ଜଣେ ଝିଅ ତାଙ୍କୁ ହତ୍ୟା କରିବାକୁ ଚାହୁଁଥିବା ନିଜ ବୟାନରେ କହିଥିଲେ ନାବାଳିକା। ବାଲେଶ୍ୱର, ବଳଙ୍ଗା, ପଟ୍ଟାମୁଣ୍ଡାଇ ପୋଡ଼ି ଘଟଣା ମନର ନ ଲିଭୁଣୁ ବରଗଡ଼ ଗାଇସିଲଟ ନାବାଳିକା ପୋଡ଼ିରେ ପ୍ରାଣ ହରେଇଛି। ବରଗଡ଼ ପୋଡ଼ି ଘଟଣାର ତଦନ୍ତ ପାଇଁ ସ୍ୱତନ୍ତ୍ର  ଟିମ୍  ଗଠନ ହେଇଥିବା ସୂଚନା ଦେଇଛନ୍ତି  ବଲାଙ୍ଗୀର ଏସପି ଅଭିଳାଷ ଜି.।  ୩ ଜଣ ଆଇଆଇସିଙ୍କୁ ନେଇ ଟିମ୍ ଗଠନ  ହୋଇଛି। ତେବେ  ଗୋଟେ ପରେ ଗୋଟେ ଘଟଣା ଘଟିଯାଉଥିବା ବେଳେ ପୁଲିସ କିନ୍ତୁ ଘଟଣାର ଖିଅ ପାଉନି କି ପ୍ରକୃତି ଅଭିଯୁକ୍ତକୁ ଧରିପାରୁନି। ଖାଲି ଯାହା ତଦନ୍ତ ଆଉ ଜେରା ଚାଲିଛି। ଏ ପରି ଘଟଣାରେ  ଅଭିଯୁକ୍ତ କିଏ ସେକଥା ଯେମିତି ରହସ୍ୟରେ ରହିଯାଉଛି, ଯାହା ଏଭଳି ଘଟଣା ଘଟିବାକୁ ବଳ ଯୋଗାଉଛି ବୋଲି ଆଲୋଚନା ହେଉଛି ।