ଓଡ଼ିଆ ଫିଲ୍ମ ଇଣ୍ଡଷ୍ଟ୍ରି ପାଇଁ ଦଶହରା ପୂଜା ମାର୍କେଟିଂର ଭଲ ସମୟ । ଏ ସମୟରେ ରିଲିଜ ହେଉଥିବା ଫିଲ୍ମ ବକ୍ସ ଅଫିସରେ ଭଲ ବିଜନେସ୍ କରେ । ଚଳିତ ବର୍ଷ ବି 5ଟି ଓଡ଼ିଆ ଫିଲ୍ମ ରିଲିଜ୍ ହୋଇଛି, କିନ୍ତୁ ସ୍କ୍ରୀନରେ ଅନେକ ନାମୀଦାମୀ କଳାକାରଙ୍କ ସିନେମା ଆସିପାରିନି। ଖାସ୍ କରି ପୂଜା ମାର୍କେଟରେ ଆବସେଣ୍ଟ ଅଛନ୍ତି ଅନୁଭବ ଏବଂ ବାବୁସାନ୍ । ଅନୁଭବଙ୍କ ‘ରାବଣ’ ଏବଂ ବାବୁସାନଙ୍କ ‘ଅନ୍ତର୍ଯ୍ୟାମୀ’, ଏହି ଦୁଇଟି ଫିଲ୍ମକୁ ନେଇ ଦର୍ଶକଙ୍କ ଅପେକ୍ଷା ରହିଥିଲେ ବି ଏଥର ପୂଜା ବଜାରରେ ଏହା ଦେଖିବାକୁ ମିଳିନାହିଁ। କେବଳ ହିରୋ-ହିରୋଇନ୍ ନୁହନ୍ତି, ଅନେକ ଜଣାଶୁଣା ଡିରେକ୍ଟର, ମ୍ୟୁଜିକ୍ ଡିରେକ୍ଟର, ଲିରିସିଷ୍ଟଙ୍କ ଅନୁପସ୍ଥିତି ମଧ୍ୟ ଚର୍ଚ୍ଚାର ବିଷୟ ପାଲଟିଛି।
ମାର୍କେଟରେ ନାହାନ୍ତି ଅନୁଭବ-ବାବୁଶାନ୍
ଓଲିଉଡ ପାଇଁ ଦଶହରା ହେଉଛି ଏକ ବଡ଼ ବ୍ୟବସାୟିକ ଅବସର। ଏହି ସମୟରେ ନିଜ ପ୍ରିୟ କଳାକାରଙ୍କ ଫିଲ୍ମ ଦେଖିବାକୁ ସିନେପ୍ରେମୀ ଅପେକ୍ଷା କରିଥାନ୍ତି। ମଧୁମାଳତୀ, ମୋନଷ୍ଟର, ଡେଞ୍ଜର ଦେବଦାସ, ଗେମ୍ ଓଭର୍ ଓ AWM ଏଥର 5ଟି ଓଡ଼ିଆ ଫିଲ୍ମ ରିଲିଜ୍ ହୋଇଥିଲେ ମଧ୍ୟ ଅନେକ ଲୋକପ୍ରିୟ ଚେହେରାଙ୍କୁ ପରଦାରେ ଦେଖିବାକୁ ମିଳିନାହିଁ।ଅନୁଭବ ମହାନ୍ତି, ବାବୁସାନ, ସିଦ୍ଧାନ୍ତ ମହାପାତ୍ର, ଅରିନ୍ଦମ, ସବ୍ୟସାଚୀ, ବୁଦ୍ଧାଦିତ୍ୟ, ଆକାଶଙ୍କ ଭଳି ଜଣାଶୁଣା ହିରୋଙ୍କ ଫିଲ୍ମ ଏଥର ପୂଜା ମାର୍କେଟରେ ନାହିଁ। ସେହିପରି ଅନୁ ଚୌଧୁରୀ, ବର୍ଷା ପ୍ରିୟଦର୍ଶିନୀ, ଅର୍ଚ୍ଚିତା, ଶିବାନୀ, ପ୍ରିୟା, ରୀୟାଙ୍କ ଭଳି ନାୟିକାଙ୍କୁ ମଧ୍ୟ ଦର୍ଶକ ମିସ୍ କରିଛନ୍ତି।କେବଳ ଅଭିନେତା ଓ ଅଭିନେତ୍ରୀ ନୁହନ୍ତି, ଏଥର ଅନେକ ଜଣାଶୁଣା ନିର୍ଦ୍ଦେଶକଙ୍କ ଫିଲ୍ମ ମଧ୍ୟ ଅନୁପସ୍ଥିତ। ବସନ୍ତ ସାହୁ, ସବ୍ୟସାଚୀ ମହାପାତ୍ର, ହିମାଂଶୁ ପରିଜା, ଅଶୋକ ପତି, ସଞ୍ଜୟ ନାୟକ, ସୁଶାନ୍ତ ମଣି, ତାପସ ସରଘରିଆ ଓ ଅନୁପମ ପଟ୍ଟନାୟକଙ୍କ ଭଳି ନିର୍ଦ୍ଦେଶକଙ୍କ ଚଳଚ୍ଚିତ୍ର ଏଥର ପୂଜା ବଜାରରେ ଦେଖିବାକୁ ମିଳିନାହିଁ। ସେହିପରି ମଳୟ ମିଶ୍ର, ମନ୍ମଥ ମିଶ୍ର, ପ୍ରେମ୍ ଆନନ୍ଦ ଓ ବିକାଶ ଦାସଙ୍କ ଭଳି ସଙ୍ଗୀତ ନିର୍ଦ୍ଦେଶକଙ୍କ ସଙ୍ଗୀତ ଏଥର ପୂଜାରେ ଶୁଣିବାକୁ ମିଳିନାହିଁ। ଡକ୍ଟର ରଜନୀ ରଞ୍ଜନ, ଶଙ୍କର ତ୍ରିପାଠୀ, ଦିଲୀପ ଚୌଧୁରୀ ଓ ମାନସ ପଢ଼ିଆରୀଙ୍କ ଭଳି ସଂଳାପକାରଙ୍କ ଲେଖା ମଧ୍ୟ ଦର୍ଶକଙ୍କୁ ଏଥର ମିଳିନାହିଁ।ତେବେ ଅନ୍ୟପଟେ କିଛି ନୂଆ ଓ ପୁରୁଣା ଚେହେରା ପୂଜା ବଜାରରେ ନିଜର ଉପସ୍ଥିତି ଜାହିର କରିଛନ୍ତି। ରେକର୍ଡ ସଂଖ୍ୟକ ଫିଲ୍ମ ରିଲିଜ୍ ହେବା ଓ ନାମୀଦାମୀ ଷ୍ଟାରଙ୍କ ଅନୁପସ୍ଥିତି ଭିତରେ ଏଥର ଓଡ଼ିଆ ସିନେମାର ପୂଜା ବଜାର କେଉଁ ଦିଗକୁ ଯାଉଛି, ତାହା ଉପରେ ରହିଛି ସମସ୍ତଙ୍କ ନଜର।
