“ଆପଣମାନେ ଖୁସି ତ, ମୁଁ ବି ଖୁସି” ଏ ହେଉଛି ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ସଂକ୍ଷିପ୍ତ ସ୍ଲୋଗାନ, କିନ୍ତୁ ଅତି ଲୋକପ୍ରିୟ। ନବୀନ ପଟ୍ଟନାୟକ ୧୬ ଅକ୍ଟୋବର ୨୦୨୬ରେ ୮୦ ବର୍ଷରେ ପାଦ ଥାପିଛନ୍ତି । ୫୧ ବର୍ଷ ବୟସ ପର୍ଯ୍ୟନ୍ତ ରାଜନୀତିର ଧାର ଧରିନଥିବା ନବୀନ ପଟ୍ଟନାୟକ, ବାପାଙ୍କର ଦେହାନ୍ତ ପରେ ପଲିଟିକ୍ସରେ ଏଣ୍ଟ୍ରି ମାରିଛନ୍ତି । ୧୭ ଏପ୍ରିଲ ୧୯୯୭ରେ ବିଜୁ ପଟ୍ଟନାୟକଙ୍କ ବିୟୋଗ ପରେ ଓଡ଼ିଶା ପଲିଟିକ୍ସରେ ସୃଷ୍ଟି ହୋଇଥିଲା ବିରାଟ ଶୂନ୍ୟସ୍ଥାନ। ଅନୁକମ୍ପାକୁ ଆଶ୍ରା କରି ଲୋଡ଼ା ପଡ଼ିଲେ ବିଜୁ ପରିବାର ସଦସ୍ୟ। ମାତ୍ର ବିଜୁଙ୍କ ବଡ଼ ପୁଅ ପ୍ରେମ୍, ଝିଅ ଗୀତା ମେହେଟ୍ଟା ଏବଂ ସ୍ତ୍ରୀ ଜ୍ଞାନ ପଟ୍ଟନାୟକ ପ୍ରସ୍ତାବକୁ ଗ୍ରହଣ ନ କରିବାରୁ ନବୀନ ପଟ୍ଟନାୟକ ଶେଷ ସାହାରା ସାଜିଲେ।ବିଜୁଙ୍କ ସମର୍ଥକ ମାନଙ୍କର କଥା ଭାଙ୍ଗି ନପାରି ରାଜନୀତିକୁ ଏଣ୍ଟ୍ରି କଲେ ନବୀନ । ୧୯୯୭ ଜୁନରେ ଜନତା ଦଳରେ ସାମିଲ ହେଲେ । ଆସିକା ଲୋକସଭା ଆସନରୁ ବିଜୟୀ ହୋଇ ନିର୍ବାଚନ ପଲିଟିକ୍ସର ଫାଷ୍ଟ ଷ୍ଟେପ୍ ଚଢ଼ିଲେ। ତା’ପରେ ୨୬ ଡିସେମ୍ବର ୧୯୯୭ରେ ନବଗଠିତ ବିଜୁ ଜନତା ଦଳରେ ଯୋଗଦେଲେ । ବିଜୁ ଜନତା ଦଳ ଓ ବିଜେପି ମେଣ୍ଟର ପ୍ରାର୍ଥୀ ନବୀନ ପଟ୍ଟନାୟକ ୧୯୯୮ରେ ପୁଣି ଆସିକା ଭୋଟରଙ୍କ ଆସ୍ଥାଭାଜନ ହେଲେ । ଅଟଳ ବିହାରୀ ବାଜପେୟୀଙ୍କ ବିଶ୍ୱାସ ଜିଣି କେନ୍ଦ୍ର ସରକାରରେ ଖଣି ଓ ଇସ୍ପାତ ମନ୍ତ୍ରୀର ଦାୟିତ୍ୱ ନିର୍ବାହ କଲେ ନବୀନ ।
୧୯୯୯ରେ ଅଞ୍ଜନା ମିଶ୍ର ଗଣଦୁଷ୍କର୍ମ ମାମଲାରେ ମୁଖ୍ୟମନ୍ତ୍ରୀ ଗାଦିରୁ ହଟି ସାରିଥିଲେ ଜାନକୀ ବଲ୍ଲଭ ପଟ୍ଟନାୟକ।। ଅଞ୍ଜନାଙ୍କ ମାମଲା ଓଡ଼ିଶା କଂଗ୍ରେସକୁ ଢେର୍ ପଛକୁ ଠେଲିଦେଲା। ଅଞ୍ଜନାକୁ ମୁଦ୍ଦା କରି ବିଧାନସଭା ନିର୍ବାଚନକୁ ଓହ୍ଲାଇଲା ବିଜୁ ଜନତା ଦଳ ଓ ଭାରତୀୟ ଜନତା ପାର୍ଟି।୨୦୦୦ ମସିହାରେ ହିଞ୍ଜିଳି ଆସନରୁ ବିଧାନସଭାକୁ ଏଣ୍ଟ୍ରି କଲେ ନବୀନ। BJD–BJPର ମେଣ୍ଟ ଆଗରେ ଚିତପଟାଙ୍ଗ ମାରିଲା କଂଗ୍ରେସ। ୨୦୦୦ ନିର୍ବାଚନରେ BJD ଏକାକି ୬୮ ସିଟ ହାତେଇବା ସହ BJP ୩୮ଟି ଆସନ ହାସଲ କରେ । କଂଗ୍ରେସ ମାତ୍ର ୨୬ଟି ଆସନରେ ସୀମିତ ରୁହେ। ସେଇଠୁ ହିଁ ଆରମ୍ଭ ହେଲଷ ନବୀନଙ୍କର ମୁଖ୍ୟମନ୍ତ୍ରୀ ଇନିଂସ । ମାତ୍ର ୨୦୦୯ରେ ନବୀନଙ୍କ ପାଇଁ ଆସିଥିଲା ଅଗ୍ନୀ ପରୀକ୍ଷା। ବିଜେପି ଠାରୁ ଅଲଗା ହୋଇ ଇଲେକ୍ସନ୍ ଲଢିବାକୁ ନିଷ୍ପତ୍ତି ନେଲେ ବିଜେଡି ସୁପ୍ରିମୋ। ସେଥିରେ ସଫଳ ମଧ୍ୟ ହେଲେ। ବିଜେଡିକୁ ଏକାକୀ ୧୨୩ ଆସନ ମିଳିଲା। 2014 ଓ 2019 ନିର୍ବାଚନରେ ନବୀନଙ୍କୁ ମିଳିଲା ଅପ୍ରତିଦ୍ୱନ୍ଦ୍ୱୀର ମୁକୁଟ । କିନ୍ତୁ 2000 ମସିହାରୁ 2019 ନିର୍ବାଚନ ଯାଏଁ ନବୀନଙ୍କ ବିଜୟର ସିକ୍ରେଟ୍ ଥିବା ମଲିଟିପୁଲ୍ ପାଓ୍ୱାର ସେଣ୍ଟରରେ ପଡିଗଲା ତାଲା । 2020 ମସିହାରୁ ବିଜୁ ଜନତା ଦଳ ସରକାର ଏବଂ ପାର୍ଟିର ସମସ୍ତ ଡିସିସନ୍ ନେଲେ ଭୈରବ ପାଣ୍ଡିଆନ୍ । ବିଜେଡିର ବରିଷ୍ଠ ନେତାମାନଙ୍କର ଗୁରୁତ୍ୱ ରହିଲା ନାହିଁ, କିମ୍ବା ବରିଷ୍ଠ ଅଫିସର ମାନଙ୍କ ମତାମତ ଆଉ ଲୋଡିଲେ ନାହିଁ ନବୀନ । ଏକମାତ୍ର ଡିସିସିନ୍ ମେକର ହୋଇଗଲେ ପାଣ୍ଡିଆନ । ଅଣଓଡ଼ିଆ ଆଇଏଏସ ଅଫିସର ଭୈରବ ପାଣ୍ଡିଆନଙ୍କ ମୋହରେ ନବୀନ, ନିଜର ଅନ୍ୟ ସମସ୍ତ ବିଶ୍ୱସ୍ଥ ଲୋକଙ୍କୁ ହରାଇଲେ । ଯାହାର ଫଳ ଭୋଗିଲେ ନବୀନ ନିଜେ । ଅପରାଜୟ ନବୀନ 2024ରେ ପ୍ରଥମ ଥର ପାଇଁ କଣ୍ଟାବାଞ୍ଜିରେ ପରାଜୟର ସ୍ୱାଦ ଚାଖିଲେ । ଆଉ ଷଷ୍ଠ ଥରର ମୁଖ୍ୟମନ୍ତ୍ରୀ ହେବାର ଆଶା, ସ୍ୱପ୍ନରେ ରହିଗଲା। ଯଦି ପାଣ୍ଡିଆନଙ୍କ ସହ ଅନ୍ୟମାନଙ୍କୁ ମଧ୍ୟ ଭରସା କରିଥାନ୍ତେ, ହୁଏତ ନବୀନ ପଟ୍ଟନାୟକଙ୍କର ନିଜର 80 ତମ ଜନ୍ମଦିନ ବିରୋଧି ଦଳର ନେତା ଭାବେ ନୁହେଁ, ଓଡ଼ିଶାର ମୁଖ୍ୟମନ୍ତ୍ରୀ ଭାବେ ପାଳନ କରିଥାନ୍ତେ ।
