ନୂଆ ଶିକ୍ଷାବର୍ଷକୁ ନେଇ ପିଲାଙ୍କ ଭିତରେ ଉତ୍ସାହ ବଢୁଛି । ଉଭୟ ସରକାରୀ ଓ ଘରୋଇ ସ୍କୁଲରେ ପ୍ରବେଶ ଉତ୍ସବର ପ୍ରସ୍ତୁତି ଚାଲିଛି। ଏପରିକି ଓଡ଼ିଆ ପକ୍ଷପାଳନ ଅବସରରେ ସରକାର ଏ ଦିଗକୁ ଧ୍ୟାନ ଦେଉଛନ୍ତି । କିନ୍ତୁ ପିଲାଙ୍କ ପାଖରେ ବହି ପହଞ୍ଚି ପାରୁନି । ବିନା ବହିରେ ପିଲା କେମିତି ପାଠ ପଢିବେ ସେ ନେଇ ଅସନ୍ତୋଷ ସୃଷ୍ଟି ହେଉଛି । ନୂଆ ଶ୍ରେଣୀ, ନୂଆ ପାଠ୍ୟକ୍ରମକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ଉତ୍ସାହ ଥିଲେ ବି ସରକାରଙ୍କ ପ୍ରସ୍ତୁତି ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଉଭୟ ରାଜ୍ୟ ସରକାର ଏବଂ NCERT ପାଠ୍ୟପୁସ୍ତକ ଯୋଗାଇବାରେ ବିଫଳ ହୋଇଛନ୍ତି।
ସିବିଏସ୍ଇ ସହ ଓଡ଼ିଆ ମିଡିଅମ ଛାତ୍ରଛାତ୍ରୀଙ୍କ ପାଖରେ ମଧ୍ୟ ବହି ପହଞ୍ଚି ପାରିନାହିଁ। ଶିକ୍ଷାବର୍ଷ ଆରମ୍ଭ ପୂର୍ବରୁ ପ୍ରଥମରୁ ୮ମ ଶ୍ରେଣୀ ଛାତ୍ରଛାତ୍ରୀଙ୍କୁ ରାଜ୍ୟ ସରକାର ମାଗଣା ପାଠ୍ୟପୁସ୍ତକ ଯୋଗାଇ ଦେବାର ନିୟମ ରହିଛି। ମାତ୍ର ଆଜି ପର୍ଯ୍ୟନ୍ତ ଖୋର୍ଦ୍ଧା, ପୁରୀ, କେନ୍ଦ୍ରାପଡ଼ା, ନୟାଗଡ଼, କଟକ, ଯାଜପୁର, ଢେଙ୍କାନାଳ ଜିଲ୍ଲାର ଅଧିକାଂଶ ସରକାରୀ ସ୍କୁଲରେ ମାଗଣା ବହି ପହଞ୍ଚି ପାରିନାହିଁ। ସରକାରୀ ରିପୋର୍ଟ ଅନୁସାରେ ମାତ୍ର 30% ବହି ବଣ୍ଟା ହୋଇଛି। ଅର୍ଥାତ୍ 70 % ବହି ଏ ଯାଏଁ ପିଲାଙ୍କ ପାଖରେ ପହଞ୍ଚିନାହିଁ । NCERT ମଧ୍ୟ ଠିକ୍ ସମୟରେ ବହି ବଜାରକୁ ଛାଡ଼ି ନଥିବାରୁ ସିବିଏସ୍ଇ ଛାତ୍ରଛାତ୍ରୀ ହଇରାଣ ହେଉଛନ୍ତି। ୯ମ ଓ ୧୦ମ ଶ୍ରେଣୀ ବହିରେ ମଧ୍ୟ ସମାନ ଅବ୍ୟବସ୍ଥା। ଛାତ୍ରଛାତ୍ରୀଙ୍କ ଆବଶ୍ୟକତା ଅନୁଯାୟୀ ବହି ଛପା ହୋଇନି, ତେଣୁ ବହି ମିଳୁନି ।
ଜିଲ୍ଲା ଶିକ୍ଷା ଅଧିକାରୀମାନେ ମଧ୍ୟ ବିଭାଗୀୟ ନିର୍ଦ୍ଦେଶ ଅଭାବରୁ କୌଣସି ସ୍ପଷ୍ଟ ନିଷ୍ପତ୍ତି ନେଇପାରୁ ନାହାନ୍ତି। କେତେକ ଜିଲ୍ଲାରେ ଏପ୍ରିଲ ୨ରୁ ସକାଳୁଆ ସ୍କୁଲ କରିବାକୁ ନିଷ୍ପତ୍ତି ନିଆଯାଇ ପୁଣି ତାକୁ ବଦଳାଯାଇଛି। ବହି ଅଭାବରୁ ‘ଖଡ଼ିଛୁଆଁ’ ଓ ‘ପ୍ରବେଶ ଉତ୍ସବ’ ଘୁଞ୍ଚିବା ନେଇ ମଧ୍ୟ ଚର୍ଚ୍ଚା ଜୋର ଧରିଛି। କେବଳ ବହି ନୁହେଁ, ସକାଳୁଆ ସ୍କୁଲକୁ ନେଇ ମଧ୍ୟ ଦ୍ୱନ୍ଦ୍ୱ। ଏପ୍ରିଲ୨ ରୁ ସକାଳୁଆ ସ୍କୁଲ ହେବାର ନିୟମ ରହିଛି। ମାତ୍ର ବହି ସମସ୍ୟା ଏବେ ମୁଣ୍ଡ ବିନ୍ଧାର କାରଣ ପାଲଟିଛି । ଶିକ୍ଷାବର୍ଷ ଆରମ୍ଭରୁ ଏଭଳି ଅବ୍ୟବସ୍ଥା ପ୍ରବଳ ଅସନ୍ତୋଷ ସୃଷ୍ଟି କରୁଛି । ସବୁ ସ୍କୁଲରେ ବହି ପହଞ୍ଚିବାକୁ ଅତିକମରେ ୧୫ ଦିନ ଲାଗିବ। କିନ୍ତୁ ସେପର୍ଯ୍ୟନ୍ତ ପିଲାମାନେ ପଢ଼ିବେ କେମିତି? ବିନା ବହିରେ କେମିତି ଚାଲିବ ନୂଆ ଶିକ୍ଷାବର୍ଷ?
