Category Politics

ୟୁନିଭରସିଟିରେ ଅଧ୍ୟାପକ ମରୁଡ଼ି, ୭୦% ପୋଷ୍ଟ ଖାଲି

0 Comments read News, Politics

ବିପର୍ଯ୍ୟସ୍ତ ଅବସ୍ଥାରେ ଓଡ଼ିଶାର ଉଚ୍ଚଶିକ୍ଷା। ଓଡ଼ିଶାର ୧୭ଟି ସରକରୀ ବିଶ୍ୱବିଦ୍ୟାଳୟରେ ଫାକଲ୍ଟି ସମସ୍ୟା ଜଟିଳ। ୩୦% ଅଧ୍ୟାପକଙ୍କ ଭରସାରେ ଚାଲିଛି ପାଠ ପଢା। ମଞ୍ଜୁରପ୍ରାପ୍ତ ପୋଷ୍ଟ ମଧ୍ୟରୁ ପ୍ରାୟ ୭୦% ଖାଲି ପଡ଼ିଛି। ଅଗଷ୍ଟ ୩୧ ସୁଦ୍ଧା ୨,୦୮୬ଟି ମଞ୍ଜୁରପ୍ରାପ୍ତ ଲେକଚର ପୋଷ୍ଟରୁ ୧,୪୫୦ ଓ ନନ୍ ଟିଚିଂ ପୋଷ୍ଟରୁ ୨,୧୫୦ରୁ ଅଧିକ ଭାକାଣ୍ଟ ଥିବା ତଥ୍ୟ ଦେଇଛନ୍ତି ଉଚ୍ଚଶିକ୍ଷା ମନ୍ତ୍ରୀ ସୂରଜ ସୂର୍ଯ୍ୟବଂଶୀ। ରାଜ୍ୟର ପ୍ରମୁଖ ବିଶ୍ୱବିଦ୍ୟାଳୟ ଉତ୍କଳ ୟୁନିଭରସିଟିରେ ମୋଟ ସବୁଠାରୁ ଅଧିକ ପୋଷ୍ଟ ଫାଙ୍କା ପଡ଼ିଛି। ୪୬ଟି ପ୍ରଫେସର ପୋଷ୍ଟରୁ ୩୯ ପୋଷ୍ଟ ଖାଲି। ୭୫ ଟି ଆସୋସିଏଟ ପ୍ରଫେସର ପୋଷ୍ଟରୁ ୫୨ଟି ଖାଲି ପଡ଼ିଛି, ୧୨୩ ଆସିଷ୍ଟାଣ୍ଡ ପ୍ରଫେସର ପୋଷ୍ଟରୁ ୫୧ ପୋଷ୍ଟ ଖାଲି। ଷ୍ଟୁଡେଣ୍ଟ ଟିଚର ରେସିଓ ରହିଛି ୨୨.୧। ରେଭେନ୍ସା ୟୁନିଭରସିଟିର ମଧ୍ୟ ସମାନ ଅବସ୍ଥା। ୨୯ଟି ପ୍ରଫେସର ପୋଷ୍ଟରୁ ୨୨, ୭୧ ଆସିଷ୍ଟାଣ୍ଟ ପ୍ରଫେସରରୁ ୫୫ଟି ୧୬୭ଟି ଆସୋସିଏଟ ପ୍ରଫେସର ପୋଷ୍ଟରୁ ୯୦ ପୋଷ୍ଟ ଫାଙ୍କା ପଡ଼ିଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିଜ ଜିଲ୍ଲାରେ ବି ୟୁନିଭସରିଟିର ଅବସ୍ଥା ଭଲ ନାହିଁ। ଷ୍ଟୁଡେଣ୍ଟ ଟିଚର ରେସିଓ ରହିଛି ୪୦:୧। ଧରଣୀଧର ୟୁନିଭରସିଟିରେ ୧୮ଟି ସାଙ୍କସନ୍ ପ୍ରଫେସର ପୋଷ୍ଟରୁ ଗୋଟାଏ ବି ପୂରଣ ହୋଇନି। ୩୭ଟି ଆସିଷ୍ଟାଣ୍ଡ ପ୍ରଫେସର ପୋଷ୍ଟରୁ ଜଣେ ମାତ୍ର ଅଛନ୍ତି, ବାକି ୩୬ ପୋଷ୍ଟ ଫାଙ୍କା। ସେହିଭଳି ୭୩ ଆସୋସିଏଟ ପ୍ରଫେସର ପୋଷ୍ଟରୁ ୬୯ ଫାଙ୍କା। ମୁଖ୍ୟମନ୍ତ୍ରୀଙ୍କ ନିଜ ଜିଲ୍ଲାରେ ସ୍ଥିତି ଅସମ୍ଭାଳ। ଲଜ୍ଜାଜନକ ଘଟଣାଟି ହେଉଛି ମଧୁସୂଦନ ଦାସଙ୍କ ନାଁରେ ନାମିତ ଆଇନ ବିଶ୍ୱବିଦ୍ୟାଳୟକୁ ସରକାରଙ୍କର ଦୃଷ୍ଟି ନାହିଁ। ସବୁତକ ସାଙ୍କସନ ପୋଷ୍ଟ ଫାଙ୍କା ପଡ଼ିଛି। ଠିକାରେ ଚାଲିଛି ଆଇନ ଶିକ୍ଷା। ଅସ୍ମିତାର କଥା କହୁଥିବା ବିଜେପି ସରକାରରେ ଓଡ଼ିଆ ବିଶ୍ୱବିଦ୍ୟାଳୟରେ କୌଣସି ମଞ୍ଜୁରପ୍ରାପ୍ତ ପୋଷ୍ଟ ପୂରଣ ହୋଇନି।

ରାଜ୍ୟର ବିଶ୍ୱବିଦ୍ୟାଳୟଗୁଡ଼ିକରେ ସବୁଠାରୁ ଅଧିକ ଅଭାବ ମଧ୍ୟମ ଏବଂ କନିଷ୍ଠ ସ୍ତରର ଫ୍ୟାକଲ୍ଟି ପଦରେ ରହିଛି। ମୋଟ ୫୯୩ଟି ମଞ୍ଜୁରପ୍ରାପ୍ତ ଆସୋସିଏଟ୍ ପ୍ରଫେସର ପୋଷ୍ଟରୁ ମଧ୍ୟରୁ ୪୭୦ଟି (୭୯%) ଖାଲି ଅଛି। ସେହିପରି ୧,୧୯୪ଟି ମଞ୍ଜୁରପ୍ରାପ୍ତ ଆସିଷ୍ଟାଣ୍ଟ ପ୍ରଫେସର ପୋଷ୍ଟରୁ ୭୧୫ଟି (୬୦%) ଖାଲି ଅଛି। ଏମିତି ହେବା ଦ୍ୱାରା ଟିଚର ଷ୍ଟୁଡେଣ୍ଟ ରେସିଓ ପ୍ରଭାବିତ ହେଉଛି। ଫ୍ୟାକଲ୍ଟି ଅଭାବରେ ଶିକ୍ଷା ମଧ୍ୟ ପ୍ରଭାବିତ ହେଉଛି। ଖଲ୍ଲିକୋଟ ୟୁନିଟାରୀ ବିଶ୍ୱବିଦ୍ୟାଳୟ- ୪୪:୧, ମା‘ ମାଣିକେଶ୍ୱରୀ ବିଶ୍ୱବିଦ୍ୟାଳୟ- ୩୮:୧  ,ରମାଦେବୀ ମହିଳା ବିଶ୍ୱବିଦ୍ୟାଳୟ-୩୮:୧, ବିକ୍ରମ ଦେବ ବିଶ୍ୱବିଦ୍ୟାଳୟ-୩୮:୧, ଗଙ୍ଗାଧର ମେହେର ବିଶ୍ୱବିଦ୍ୟାଳୟ-୩୫:୧ ରହିଛି ଶିକ୍ଷକ ଛାତ୍ର ଅନୁପାତ।

ନିୟମିତ ନିଯୁକ୍ତି ନହେବା ପର୍ଯ୍ୟ ବିଶ୍ୱବିଦ୍ୟାଳୟଗୁଡ଼ିକରେ ୪୨୫ ଜଣ ଅତିଥି ଅଧ୍ୟାପକ (Guest Faculty) ନିୟୋଜିତ ହୋଇଛନ୍ତି। ସରକାର OPSC ଜରିଆରେ ୩୮୫ଟି ପୋଷ୍ଟ ସହ ୩୦୪ଟି ପୋଷ୍ଟ ପାଇଁ Requisition ପଠାଇଥିବା ଚର୍ଚ୍ଚା। ଖୁବ୍ ଶୀଘ୍ର ପୋଷ୍ଟ ପୂରଣ ନ ହେଲେ ଉଚ୍ଚଶିକ୍ଷାର ସ୍ଥିତି ନୀଚ୍ଚ ପ୍ରମାଣିତ ହୋଇଯିବ।

ଦାରାଙ୍କ ପାଇଁ ମୋହନଙ୍କ ଦୁଇଟି ରୂପ

0 Comments read News, Politics

ଦାରା ସିଂହଙ୍କ ମୁକ୍ତି ମାମଲାରେ ସୁପ୍ରିମକୋର୍ଟରେ 3 ସପ୍ତାହ ପାଇଁ ଶୁଣାଣି ଘୁଞ୍ଚିଛି। ରାଜ୍ୟ Sentence Review Board, ଦାରାଙ୍କର ମୁକ୍ତି ସପକ୍ଷରେ ନାହିଁ ବୋଲି ସେପ୍ଟମ୍ବର 17 ତାରିଖରେ ସୁପ୍ରିମକୋର୍ଟରେ ରିପୋର୍ଟ ଦାଖଲ ହୋଇଛି। ଓଡ଼ିଶା ସରକାରଙ୍କ ଏହି ଆଦେଶକୁ ଚ୍ୟାଲେଞ୍ଜ କରିବା ପାଇଁ ସୁପ୍ରିମକୋର୍ଟ, ଦାରାଙ୍କର ଓକିଲଙ୍କୁ 2 ସପ୍ତାହ ସମୟ ଦେଇଛନ୍ତି। State Sentence Review Boardର ଚେୟାରମ୍ୟାନ୍ ଥିବା ହୋମ୍ ସେକ୍ରେଟାରୀ ହେମନ୍ତ ଶର୍ମା ଚାହୁଁନାହାନ୍ତି ଦାରା ସିଂହ ମୁକ୍ତ ହୁଅନ୍ତୁ। ଅଗଷ୍ଟ 28 ତାରିଖରେ କେନ୍ଦୁଝର ଜିଲ୍ଲା ପ୍ରଶାସନ ଦେଇଥିବା ରିପୋର୍ଟକୁ ଢ଼ାଲ କରି ଦାରାଙ୍କୁ ମୁକ୍ତି ନକରିବାକୁ ହେମନ୍ତ ଶର୍ମା ଏବଂ ତାଙ୍କର ଟିମ୍ ନିଷ୍ପତ୍ତି ନେଇଥିବା ଚର୍ଚ୍ଚା ।
ସ୍ୱାଧିନତା ଦିବସରେ ଦାରା ସିଂହଙ୍କୁ ମୁକ୍ତ କରାଯିବ ବୋଲି ପୂର୍ବରୁ ମିଡିଆରେ ପ୍ରଚାର ହୋଇଥିଲା । ଯାହାକୁ ନେଇ ଅଗଷ୍ଟ 15 ତାରିଖରେ ଦାରା ସିଂହଙ୍କ ସମର୍ଥକମାନେ କେନ୍ଦୁଝର ଜେଲ ଆଗରେ ଏକତ୍ରିତ ହୋଇ ଦାରା ସିଂହଙ୍କର ସମର୍ଥନରେ ଜେଲ୍ ଆଗରେ ସ୍ଲୋଗାନ ଦେଇଥିଲେ । ଏକଥା କେନ୍ଦୁଝର ଜିଲ୍ଲା ପ୍ରଶାସନ, ଗତ ଅଗଷ୍ଟ 28 ତାରିଖରେ Sentence Review Boardକୁ ଜଣାଇଲା। ଦାରାଙ୍କର ସମର୍ଥକମାନଙ୍କ ସ୍ଲୋଗାନ ସଂପର୍କରେ କେନ୍ଦୁଝର ଜିଲ୍ଲା ପ୍ରଶାସନର କୌଣସି ନିର୍ଦ୍ଧିଷ୍ଟ ସୁପାରିସ ନଥିଲା। ଏପରିକି ଜିଲ୍ଲା ପ୍ରଶାସନର ରିପୋର୍ଟ ଅଧାଖଣ୍ଡିଆ ଅର୍ଥାତ ଅସଂପୂର୍ଣ୍ଣ ଥିଲା ବୋଲି State Sentence Review Board ନିଜ ରିପୋର୍ଟରେ ଲେଖିଛନ୍ତି ।

କିନ୍ତୁ ଦାରାଙ୍କୁ ମୁକ୍ତି କରିବାକୁ ଚାହୁଁନଥିବା, Sentence Review Board ଦାରାଙ୍କ ସମର୍ଥକ ମାନଙ୍କର ସ୍ଲୋଗାନରୁ ମୌକା ପାଇଗଲା। ହେମନ୍ତ ଶର୍ମାଙ୍କ ଅଧ୍ୟକ୍ଷତାର ବସିଥିବା ବୋର୍ଡ ମିଟିଂରେ ଅଗଷ୍ଟ 31 ତାରିଖରେ ନିଷ୍ପତ୍ତି ହେଲା ଯେ ଦାରାଙ୍କୁ ମୁକ୍ତ କରାଯିବ ନାହିଁ। ଅପରପକ୍ଷରେ ଅଭିଯୋଗ ହେଉଛି ଯେ ଖ୍ରୀଷ୍ଟିଆନ୍ ଲବି ଯୋଗୁ ହେମନ୍ତ ଶର୍ମା ଏବଂ ତାଙ୍କ ଟିମ୍, ଦାରା ସିଂହଙ୍କ ମୁକ୍ତ ସପକ୍ଷରେ ନାହାଁନ୍ତି। ତେବେ ଗୁରୁତ୍ୱପୂର୍ଣ୍ଣ କଥା ହେଉଛି ବିରୋଧୀ ଦଳରେ ଥିଲାବେଳେ ମୋହନ ମାଝୀ 2022 ସେପ୍ଟେମ୍ବର 21ରେ ଦାରା ସିଂହଙ୍କୁ ମୁକ୍ତ କରିବା ପାଇଁ କେନ୍ଦୁଝର ଜେଲ ଆଗରେ ଧାରଣା ଦେଇଥିଲେ। ଏବେ ଖୋଦ୍ ମୁଖ୍ୟମନ୍ତ୍ରୀ ହେଉଛନ୍ତି ମୋହନ ମାଝୀ। ତଥାପି ଦାରା ସିଂହ ମୁକୁଳି ପାରୁନାହାନ୍ତି । ଦାରାଙ୍କର ମୁକ୍ତି ଆବେଦନକୁ 6 ଥର ଖାରଜ କଲେଣି ଷ୍ଟେଟ୍‌ ସେଣ୍ଟେନ୍ସ ରିଭ୍ୟୁ ବୋର୍ଡ ।

 

 

 

ମାମଲାର ଶୁଣାଣି କରି 2003ରେ ଦାରାଙ୍କୁ ମୃତ୍ୟୁଦଣ୍ଡରେ ଦଣ୍ଡିତ କରିଥିଲେ CBIକୋର୍ଟ।କିନ୍ତୁ 2005ରେ ଓଡ଼ିଶା ହାଇକୋର୍ଟ, ସେହି ମୃତ୍ୟୁ ଦଣ୍ଡାଦେଶକୁ ଆଜୀବନ ଜେଲଦଣ୍ଡରେ ପରିବର୍ତ୍ତନ କରିଥିଲେ। 26 ବର୍ଷ 7ମାସ କେନ୍ଦୁଝର ଜେଲ୍‌ରେ ଥିବା ଦାରା ସିଂଙ୍କୁ ମୁକ୍ତ କରିବାକୁ ଚାହୁଁଥିବା ମୋହନ ମାଝୀଙ୍କ ସରକାରଙ୍କ ଦୁର୍ବଳ ରାଜନୈତିକ ଇଚ୍ଛାଶକ୍ତି ଆଗରେ ଗୃହସଚିବ ହେମନ୍ତ ଶର୍ମା ଅଧିକ ପାଓ୍ୱାରଫୁଲ୍ ହୋଇଯାଇଛନ୍ତି।

ମୋଦୀ ଗ୍ୟାରେଣ୍ଟି ପାଣିର ଗାର

0 Comments read News, Politics

ବିଜେପିରେ କାହା କଥାର ଭାଲ୍ୟୁ ବେଶୀ? ମୋଦୀ-ଶାହ ନା ପୃଥ୍ୱୀରାଜ ହରିଚନ୍ଦନ। ଇଣ୍ଡିଆର ପ୍ରାଇମ୍ ମିନିଷ୍ଟର, ହୋମ୍ ମିନିଷ୍ଟର ନା ଓଡ଼ିଶାର ଲ ମିନିଷ୍ଟର। ରତ୍ନଭଣ୍ଡାରକୁ ନେଇ ବର୍ତ୍ତମାନ ଏମିତି ସବୁ ଚର୍ଚ୍ଚା ସାମ୍ନାକୁ ଆସିଛି । ଇଲେକ୍ସନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଲେ ରତ୍ନଭଣ୍ଡାର ଚାବି ତାମିଲନାଡୁ ପଳେଇଛି, ବିଜେପି ସରକାରକୁ ଆସିଲେ ରତ୍ନଭଣ୍ଡାରର ଗଣତି ମଣତି ହେବ, ରିପୋର୍ଟ ସାର୍ବଜନୀନ ହେବ । ମାତ୍ର ବିଜେପି ସରକାର ନା ରତ୍ନଭଣ୍ଡାରର ଚାବି ହଜିବା ରିପୋର୍ଟ ସାର୍ବଜନୀନ କଲେ ନା ରତ୍ନଭଣ୍ଡାରର ରତ୍ନ ହିସାବ ଦେଉଛନ୍ତି । ଆଇନ ମନ୍ତ୍ରୀ କହିଲେଣି ରତ୍ନଭଣ୍ଡାରର ରତ୍ନର ହିସାବ ଦିଆଯିବନି।

ମେ 21 2024, କେନ୍ଦୁଝର ନିର୍ବାଚନୀ ସଭାରେ ଅମିତ ଶାହ କହିଲେ କି ବିଜେପି ସରକାରକୁ ଆସିଲେ 100 ଦିନ ଭିତରେ ରତ୍ନଭଣ୍ଡାର ରିପୋର୍ଟ ପ୍ରକାଶ ହେବ, ରତ୍ନଚୋରଙ୍କୁ ଦଣ୍ଡ ଦିଆଯିବ। ରାଉରକେଲା ରାଲିରେ ଘୋଷଣା କଲେ ସରକାରକୁ ଆସିବାର ମାସେ ଭିତରେ ଚାବି ହଜିବା ରିପୋର୍ଟ ସାର୍ବଜନୀନ କରିବ ବିଜେପି । ବିଜେପି ସରକାରକୁ ଆସିବାର ଅଢେଇବର୍ଷ ହେଲାଣି ତଥାପି ସାର୍ବଜନୀନ ହେଉନି ଚାବି ହଜିବା ରିପୋର୍ଟ । 2018 ନଭେମ୍ବର 29 ତାରିଖରୁ ରତ୍ନଭଣ୍ଡାର ଚାବି ହଜିବା ରିପୋର୍ଟ ଦେଇ ସାରିଛନ୍ତି ଜଷ୍ଟିସ ରଘୁବୀର ଦାସ କମିଶନ୍ । ବିଜେଡି ସରକାର ଏ ରିପୋର୍ଟକୁ ସାର୍ବଜନୀନ କରିନଥିଲା । ୟା କୁ ନେଇ ହୋ ହାଲ୍ଲା କରୁଥିବା ବିଜେପି ଏବେ ସରକାରରେ , ତଥାପି ରିପୋର୍ଟ ସାର୍ବଜନିନ ହେଉନି । ଯୋଉ ରତ୍ନଭଣ୍ଡାର ଗଣତି ମଣତି ହେଉନି ବୋଲି କେନ୍ଦ୍ର ନେତୃତ୍ୱ ଟାର୍ଗେଟ କରୁଥିଲେ, ଏବେ ରତ୍ନଭଣ୍ଡାର ରତ୍ନ ହିସାବ ଦିଆ ଯିବନି ବୋଲି କହିଲେଣି ରାଜ୍ୟ ଆଇନମନ୍ତ୍ରୀ। ଏବେ ଦେଖିବା ବାକି ରହିଲା ବିଜେପିରେ କାହା ପଲ୍ଲା ଭାରି, ମୋଦୀ-ଶାହ ନା ପୃଥ୍ୱୀରାଜ ହରିଚନ୍ଦନ?

କ୍ଲାସ ଟିଚରରୁ ଚିଫ୍ ମିନିଷ୍ଟର

0 Comments read News, Politics

କଳାପଟାରେ ଅକ୍ଷର ଲେଖୁଥିଲେ,ଛାତ୍ରଛାତ୍ରୀଙ୍କୁ ପାଠ ପଢ଼ାଉଥିଲେ। କାହା ହାତରେ ଚକ୍ ତ ତାହା ହାତରେ ବେତ ଥିଲା, କିନ୍ତୁ ସମୟ ବଦଳିଲା,ଆଉ ସେହି ‘ସାର୍’ମାନେ କ୍ଲାସରୁମରୁ ପହଞ୍ଚିଗଲେ ବିଧାନସଭା । ସ୍କୁଲ୍ ଚେୟାରରୁ ମିଳିଲା ମୁଖ୍ୟମନ୍ତ୍ରୀ ସିଂହାସନ । ସାର୍ ରୁ ପାଲଟିଗଲେ ସିଏମ୍ । ଓଡ଼ିଶା ପଲିଟିକ୍ସରେ ଶିକ୍ଷକରୁ ରାଜନେତା ଏବଂ ରାଜନେତାରୁ ମୁଖ୍ୟମନ୍ତ୍ରୀ ଏହି ତାଲିକାରେ ରହିଛନ୍ତି 5 ଫେମସ ପର୍ସନାଲିଟି । ମୋହନ ଚରଣ ମାଝୀ, ଗିରିଧର ଗମାଙ୍ଗ, ହେମାନନ୍ଦ ବିଶ୍ୱାଳ  ବିନାୟକ ଆଚାର୍ଯ୍ୟ ଓ ସଦାଶିବ ତ୍ରିପାଠୀ। ଯୋଉମାନେ କ୍ଲାସ ଟିଚରରୁ ପାଲଟିଛନ୍ତି ଚିଫ୍ ମିନିଷ୍ଟର ।
ମୋହନ ମାଝୀ
ପଲିଟିକ୍ସରେ ଏଣ୍ଟ୍ରି କରିବା ପୂର୍ବରୁ ଝୁମ୍ପୁରା ସରସ୍ୱତୀ ଶିଶୁ ମନ୍ଦିରରେ ଗୁରୁଜୀ ଥିଲେ ମୋହନ ମାଝୀ। ୧୯୯୭ରେ ରାଇକଳାର ସରପଞ୍ଚ ଭାବେ ପଲିଟିକାଲ କ୍ୟାରୀୟର ଆରମ୍ଭ କରି ୨୦୦୦ରେ କେଉଁଝରରୁ ଫାଷ୍ଟ ଟାଇମ୍ mla ହେଲେ । ୨୦୦୪ରେ ପୁଣି ବିଧାୟକ ହେଲେ ।
୨୦୦୫-୦୯: ଓଡ଼ିଶା ବିଧାନସଭାରେ ସରକାରୀ ଉପମୁଖ୍ୟ ସଚେତକ (Deputy Chief Whip) ଦାୟିତ୍ୱ।
୨୦୧୯: ପୁଣିଥରେ କେନ୍ଦୁଝରରୁ ବିଧାୟକ
୨୦୧୯-୨୦୨୪ ବିଜେପିର ମୁଖ୍ୟ ସଚେତକ (Chief Whip)।
୨୦୨୪: ଚତୁର୍ଥ ଥର ବିଧାୟକ ନିର୍ବାଚିତ ହୋଇ ୧୨ ଜୁନ୍ ୨୦୨୪ରେ ଓଡ଼ିଶାର ୧୫ତମ ମୁଖ୍ୟମନ୍ତ୍ରୀ ହେଲେ।

 ଗିରିଧର ଗମାଙ୍ଗୋ
ଗିରିଧର ଗମାଙ୍ଗୋଙ୍କ କାହାଣୀ ଟିକେ ଭିନ୍ନ। ସେ ବି ଶିକ୍ଷକତାରୁ ରାଜନୀତିକୁ ଆସିଥିଲେ। S.K.C.G. College, ପାରଳାଖେମୁଣ୍ଡିରୁ ପି.ଜି ପରେ ସେ ଶିକ୍ଷକ ଭାବେ କାମ କରିଥିଲେ ଏବଂ ୧୯୭୨ରେ ପଲିଟିକ୍ସରେ ଏଣ୍ଟ୍ରି କଲେ। ଆସେମ୍ବେଲି ଇଣ୍ଟ୍ରୋରେ ମଧ୍ୟ ସେ ତାଙ୍କ profession ‘Teacher’ ବୋଲି  ଉଲ୍ଲେଖ କରିଛନ୍ତି ।୧୯୭୨ରେ ପ୍ରଥମ ଥର କୋରାପୁଟରୁ ଲୋକସଭାକୁ ନିର୍ବାଚିତ। ପରେ ୧୯୭୭, ୧୯୮୦, ୧୯୮୪, ୧୯୮୯, ୧୯୯୧, ୧୯୯୬, ୧୯୯୮ ଓ ୨୦୦୪ରେ ମଧ୍ୟ ଜିତିଥିଲେ। ୯ ଥର ଲୋକସଭା ସାଂସଦ ହେଉଛନ୍ତି ଗିରିଧର ଗମାଙ୍ଗ । କେନ୍ଦ୍ରରେ ବିଭିନ୍ନ ମନ୍ତ୍ରୀ ପଦ ସମ୍ଭାଳିବା ପରେ ୧୭ ଫେବୃଆରୀ ୧୯୯୯ରୁ ୬ ଡିସେମ୍ବର ୧୯୯୯ ପର୍ଯ୍ୟନ୍ତ ଓଡ଼ିଶାର ମୁଖ୍ୟମନ୍ତ୍ରୀ ଥିଲେ ଗିରିଧର ଗମାଙ୍ଗୋ ।
ହେମାନନ୍ଦ ବିଶ୍ୱାଳ
ଶିକ୍ଷକରୁ ମୁଖ୍ୟମନ୍ତ୍ରୀ ହୋଇଥିବା ଓଡ଼ିଶାର ଆଉ ଜଣେ ପ୍ରମୁଖ ନେତା ହେଉଛନ୍ତି  ହେମାନନ୍ଦ ବିଶ୍ୱାଳ ।ସେ ୧୯୬୧ରୁ ୧୯୬୭ ପର୍ଯ୍ୟନ୍ତ ଶିକ୍ଷକତା କରିଥିଲେ। ପରେ ପଞ୍ଚାୟତ ରାଜନୀତିରୁ ଆରମ୍ଭ କରି ୧୯୭୨ରେ କଂଗ୍ରେସରେ ଯୋଗ ଦେଇଥିଲେ। ୧୯୭୪, ୧୯୮୦, ୧୯୮୫, ୧୯୯୦, ୧୯୯୫ ଓ ୨୦୦୦ ଲାଇକେରାରୁ ମୋଟ ୬ ଥର ବିଧାୟକ । ୭ ଡିସେମ୍ବର ୧୯୮୯ରୁ ୩ ମାର୍ଚ୍ଚ ୧୯୯୦ ପର୍ଯ୍ୟନ୍ତ ପ୍ରଥମ ଥର ଓଡ଼ିଶାର ମୁଖ୍ୟମନ୍ତ୍ରୀ ଥିଲେ। । ୬ ଡିସେମ୍ବର ୧୯୯୯ରୁ  ୫ ମାର୍ଚ୍ଚ ୨୦୦୦ ପର୍ଯ୍ୟନ୍ତ ଦ୍ୱିତୀୟ ଥର ଓଡ଼ିଶାର ମୁଖ୍ୟମନ୍ତ୍ରୀ ହୋଇଥିଲେ ।  ହେମାନନ୍ଦ ବିଶ୍ୱାଳ ୨ ଥର  ଜଣେ ଶିକ୍ଷକରୁ ରାଜନେତା ହୋଇ ଓଡ଼ିଶାର ମୁଖ୍ୟମନ୍ତ୍ରୀ ହୋଇଥିବା ପ୍ରମୁଖ ନେତା।

ସଦାଶିବ ତ୍ରିପାଠୀ
ସଦାଶିବ ତ୍ରିପାଠୀଙ୍କ ରାଜନୈତିକ ଯାତ୍ରା ଆହୁରି ପୁରୁଣା। ସେ ୧୯୨୯ରୁ ୧୯୩୬ ପର୍ଯ୍ୟନ୍ତ ଶିକ୍ଷକ ଥିଲେ। ପରେ କଂଗ୍ରେସ ଓ ସ୍ୱାଧୀନତା ଆନ୍ଦୋଳନରେ ସକ୍ରିୟ ହୋଇଥିଲେ। ବିଧାନସଭାର ରେକର୍ଡ ଅନୁସାରେ୧୯୩୭, ୧୯୪୬, ୧୯୫୨, ୧୯୫୭, ୧୯୬୧ ଓ ୧୯୬୭ରେ ସେ ବିଧାନସଭାର ସଦସ୍ୟ ଥିଲେ। ନବରଙ୍ଗପୁରରୁ ଅଧିକାଂଶ ଥର ଏବଂ ୧୯୬୧ରେ ଉମରକୋଟରୁ ନିର୍ବାଚିତ ହୋଇଥିଲେ। ପ୍ରାୟ ୧୨ ବର୍ଷ ମନ୍ତ୍ରୀ ରହିବା ପରେ ୨୧ ଫେବୃଆରୀ ୧୯୬୫ରୁ ୮ ମାର୍ଚ୍ଚ ୧୯୬୭ ପର୍ଯ୍ୟନ୍ତ ଓଡ଼ିଶାର ମୁଖ୍ୟମନ୍ତ୍ରୀ ଥିଲେ।  ମୁଖ୍ୟମନ୍ତ୍ରୀ ପଦରୁ ଓହରିବା ପରେ ୧୮ ମାର୍ଚ୍ଚ ୧୯୬୭ରୁ ୨୩ ଜାନୁଆରୀ ୧୯୭୧ ପର୍ଯ୍ୟନ୍ତ ବିଧାନସଭାର ବିରୋଧୀ ଦଳ ନେତା ଥିଲେ।
 ବିନାୟକ ଆଚାର୍ଯ୍ୟ
ଆଉ ଜଣେ ପ୍ରସିଦ୍ଧ ‘ମାଷ୍ଟର’ରୁ ମୁଖ୍ୟମନ୍ତ୍ରୀ ବିନାୟକ ଆଚାର୍ଯ୍ୟ। ବ୍ରହ୍ମପୁରର ଆସ୍କା ରୋଡ୍ ହାଇସ୍କୁଲ୍‌ରେ ସହକାରୀ ଶିକ୍ଷକ ଭାବେ ସେ ଶିକ୍ଷକତା କରିଥିଲେ। ପରେ ବିଭିନ୍ନ ହାଇସ୍କୁଲ୍‌ରେ Headmaster ଭାବେ ମଧ୍ୟ କାମ କରିଥିଲେ। ତାଙ୍କ ଶିକ୍ଷକ ଜୀବନ ପାଇଁ ସେ ‘ବିନୋ ମାଷ୍ଟର’ ଭାବେ ଲୋକପ୍ରିୟ ଥିଲେ।୧୯୬୭, ୧୯୭୧ ଓ ୧୯୭୪ରେ ବ୍ରହ୍ମପୁରରୁ ୩ ଥର ବିଧାୟକ ହୋଇଥିଲେ। ୧୯୭୧ରେ ବିରୋଧୀ ଦଳ ନେତା ଥିଲେ। ପରେ ଅର୍ଥ, ଅବକାରୀ, ଗୃହ ଆଦି ବିଭାଗର ମନ୍ତ୍ରୀ ହୋଇ ୨୯ ଡିସେମ୍ବର ୧୯୭୬ରେ ମୁଖ୍ୟମନ୍ତ୍ରୀ ହୋଇଥିଲେ। ତାଙ୍କ କାର୍ଯ୍ୟକାଳ ୩୦ ଏପ୍ରିଲ ୧୯୭୭ ପର୍ଯ୍ୟନ୍ତ ଥିଲା।
ଏ ଷ୍ଟୋରୀ ଲେଖିଛନ୍ତି- ରଶ୍ମିତା ବେହେରା

ଅସହାୟ ମନ୍ତ୍ରୀ,ଓଡ଼ିଶାର ଚାଉଳ ନେଉନି FCI

0 Comments read News, Politics

ଓଡ଼ିଶା ସରକାରଙ୍କର କଥା ଶୁଣୁନାହାଁନ୍ତି କେନ୍ଦ୍ର ସରକାର। ବାରମ୍ବାର ଦିଲ୍ଲୀ ଯାଇ କେନ୍ଦ୍ରମନ୍ତ୍ରୀଙ୍କୁ ଭେଟିଲେ ମଧ୍ୟ ସକ୍ସେସ ମିଳୁନି। ଓଡ଼ିଶା ପାଇଁ Food Corporation Of India ବା FCIର ଦରଦ ନାହିଁ  । ଠିକ୍ ଟାଇମରେ ଓଡ଼ିଶାରୁ ଚାଉଳ ଉଠି ପାରୁନି । ୨୦ MP ଜିତିବା ସତ୍ତ୍ୱେ ଓଡ଼ିଶା BJPର ହାତ ଯେମିତି ବନ୍ଧା ହୋଇ ପଡ଼ିଛି । ଏକଥା କହୁଛନ୍ତି ଓଡ଼ିଶାର ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । ମନ୍ତ୍ରୀଙ୍କର କହିବା କଥା ଯେ ଅନ୍ୟ ରାଜ୍ୟ ପ୍ରତି କେନ୍ଦ୍ର ସରକାରଙ୍କ ଯେତିକି ଦରଦ ଅଛି, ଓଡ଼ିଶା ପାଇଁ ସେତିକି ନାହିଁ।
ମନ୍ତ୍ରୀଙ୍କୁ ମାନୁନି FCI                                                            
୩୦ ଲକ୍ଷ ଟନ୍‌ରୁ ମାତ୍ର ୭ ଲକ୍ଷ ୨୮ ହଜାର ଟନ୍‌ ଚାଉଳ ଉଠାଇଛି FCI । ବାକି ୨୨ ଲକ୍ଷ ୭୨ ହାଜାର ଟନ୍ ଚାଉଳ ବିଭିନ୍ନ ଗୋଦାମ ଏବଂ ମିଲରେ ପଡ଼ି ରହିଛି । ଚାଉଳ ନ ଉଠିଲେ ଆଗକୁ ଧାନ କିଣା କଷ୍ଟ ହୋଇପଡ଼ିବ ବୋଲି ଯୋଗାଣ ମନ୍ତ୍ରୀ ସ୍ୱୀକାର କରୁଛନ୍ତି ।
ଡବଲ ଇଞ୍ଜିନ୍ ଫେଲ୍
2024ରେ ଓଡ଼ିଶାବାସୀ ପାଇଲେ ଡବଲ ଇଞ୍ଜିନ ସରକାର। ଆଶା ଥିଲା ଡେଭଲପମେଣ୍ଟ ଡବଲ୍ ହେବ । କିନ୍ତୁ ଡବଲ ଇଞ୍ଜିନ ସରକାରରେ ଯୋଗାଣ ମନ୍ତ୍ରୀ ନିଜେ ଅସହାୟ ଓଡ଼ିଶାକୁ FCI ଧପୋଉଛି ମାନେ ଚିଟ୍ କରୁଛି ବୋଲି ମାନୁଛନ୍ତି ଯୋଗାଣ ମନ୍ତ୍ରୀ । ଚାଉଳ ଉଠାଇବା ପାଇଁ ବାରମ୍ବାର ଦିଲ୍ଲୀ ଯାଇ କେନ୍ଦ୍ରମନ୍ତ୍ରୀଙ୍କୁ ଭେଟୁଥିଲେ ବି କିଛି ଫଳ ମିଳୁନାହଁ ବୋଲି ଓଡ଼ିଶାର ଯୋଗାଣ ମନ୍ତ୍ରୀ କହୁଛନ୍ତି। ସେଥିପାଇଁ ପୁଣି ଥରେ ହାଇ ଲେଭେଲ ଟିମ୍ ନେଇ କେନ୍ଦ୍ରମନ୍ତ୍ରୀ ପାଖକୁ ଯିବାକୁ ପଡିବ ବୋଲି ଅସହାୟ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହୁଛନ୍ତି। ବାସ୍ତବ କଥା ହେଲା ସେପ୍ଟେମ୍ବର ଶେଷ ସୁଦ୍ଧା ମିଲ୍ ଏବଂ ଗୋଦାମରେ ଗଚ୍ଛିତ ଥିବା ଚାଉଳ ଯଦି FCI ନ ଉଠାଏ, ତେବେ ଆଗାମୀ ଖରିଫ ଧାନ କିଣିବା ସମ୍ଭବ ହେବ  ନାହିଁ। ଅନ୍ୟପଟେ ଚାଉଳ ନ ଉଠିବା ପାଇଁ FCIକୁ ଦୋଷ ଦେଇ ଖସି ପାରିବେନି ଓଡ଼ିଶା ସରକାର ।

ଖସି ପାରିବେନି ଓଡ଼ିଶା ସରକାର
ଭୋଟ ଆଶାରେ ଧାନ କ୍ୱିଣ୍ଟାଲ ଦର 3100 ଟଙ୍କା କରି ଓଡ଼ିଶାରେ ଧାନଚାଷ ବଢାଇଛି ବିଜେପି । ଫଳରେ ଏବେ ବର୍ଷକୁ ପ୍ରାୟ 20 ଲକ୍ଷ ମେଟ୍ରିକ୍ ଟନ୍ ଧାନ ଅଧିକ କିଣୁଛନ୍ତି ଓଡ଼ିଶା ସରକାର । ତଥ୍ୟ କହୁଛି 2023-24 ଖରିଫ ଓ ରବି ଋତୁରେ 70 ଲକ୍ଷ 78 ହଜାର 353 ମେଟ୍ରିକ୍ ଟନ୍ ଧାନ କିଣା ହୋଇଥିଲା । କିନ୍ତୁ ଓଡ଼ିଶାରେ ବିଜେପି ସରକାର ଆସିବା ପରେ ଧାନ କ୍ୱିଣ୍ଟାଲ ପିଛା 800 ଟଙ୍କାର ଇନପୁଟ୍ ସହାୟତା ରାଶି ପ୍ରଦାନ କରାଗଲା । ଫଳରେ 2024 ମସିହା ଖରିଫ ଏବଂ ରବି ଋତୁରେ 92 ଲକ୍ଷ 64 ହଜାର 235 କ୍ୱିଣ୍ଟାଲ ଧାନ କିଣାଗଲା । ଯାହାକି ବିଜେଡି ସରକାରଙ୍କ ସମୟର ଧାନ କିଣା ଅପେକ୍ଷା 22ଲକ୍ଷ 64ହଜାର 235 କ୍ୱିଣ୍ଟାଲ ଅଧିକ ହେଲା  । ସେହିଭଳି 2025-26 ଖରିଫ୍ ଓ ରବି ଋତୁର ଧାନକିଣା ତ 98 ଲକ୍ଷ ମେଟ୍ରିକ୍ ଟନକୁ ପାର କରିଯାଇଛି । ଧାନ କିଣାର ଏଭଳି ଭୁଲ୍ ନୀତି ପାଇଁ କେନ୍ଦ୍ର ସରକାର ବାରମ୍ବାର ତାଗିଦ୍ କରିଛନ୍ତି । ଧାନ କିଣାରେ ବୋନସ୍ ପ୍ରଦାନ ନକରିବା ପାଇଁ କେନ୍ଦ୍ର ସରକାର ଓଡ଼ିଶା ଭଳି ରାଜ୍ୟକୁ ଅନେକ ଥର କହିଛନ୍ତି କିନ୍ତୁ ନା’ କେନ୍ଦ୍ର ସରକାରଙ୍କର କଥା ଶୁଣିଛନ୍ତି ନା’ ନିଜେ ଚାଉଳ ସାଇତି ରଖିବା ପାଇଁ ଗୋଦାମ ଘର ନିର୍ମାଣ କରିଛନ୍ତି । ଏବେ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଅଠା ବୋଳୁଛନ୍ତି FCI ମୁଣ୍ଡରେ ।
ଏ ଷ୍ଟୋରୀ ଲେଖିଛନ୍ତି- ବିଜୟ କେତନ ବରାଳ