Category Politics

କାହା କବଜାରେ କୋଟିଆ:SIR ପରେ ବି ଡବଲ୍ ଭୋଟ୍

0 Comments read News, Politics

କୋଟିଆକୁ କବ୍‌ଜା କରିବାକୁ ଆନ୍ଧ୍ରର ନୂଆ ଚାଲ୍। ନଭେମ୍ବର ୨୯ରେ ସରପଞ୍ଚ ନିର୍ବାଚନ କରିବ ଆନ୍ଧ୍ରପ୍ରଦେଶ। କୋଟିଆକୁ ନେଇ ଓଡ଼ିଶା ଓ ଆନ୍ଧ୍ର ମଧ୍ୟରେ ପୁଣି ଆରମ୍ଭ ହେବ ଶକ୍ତି ପରୀକ୍ଷା। ଜିଲ୍ଲା ପରିଷଦ ନିର୍ବାଚନ ପରେ ଏବେ ସରପଞ୍ଚ ନିର୍ବାଚନ ଜରିଆରେ କୋଟିଆ ଉପରେ ନିଜର ଦବ୍‌ଦବା ଜାହିର କରିବାକୁ ଆନ୍ଧ୍ରର ନୂଆ ରଣନୀତି। ନଭେମ୍ବର ୨୯ରେ ଆନ୍ଧ୍ର କରିବାକୁ ଯାଉଛି ସରପଞ୍ଚ ଓ ୱାର୍ଡସଭ୍ୟ ନିର୍ବାଚନ। ଏଥର ଶତ ପ୍ରତିଶତ ଭୋଟ ହାତେଇବାକୁ ଆନ୍ଧ୍ର ଚଳାଇଛି କସରତ। ଅନ୍ୟପଟେ ଆନ୍ଧ୍ରର ଏହି ନିର୍ବାଚନୀ ଚାଲ୍‌କୁ ପଣ୍ଡ କରିବାକୁ ଓଡ଼ିଶା ମଧ୍ୟ ଆରମ୍ଭ କରିଛି ରଣନୀତି। ଫଳରେ କୋଟିଆକୁ ନେଇ ରାଜନୈତିକ ଛକାପଞ୍ଝା ଏବେ ଆହୁରି ରୋଚକ ହେବାକୁ ଯାଉଛି। ଆସନ୍ତା ୧୬ ତାରିଖରେ ଆନ୍ଧ୍ରପ୍ରଦେଶରେ ସରପଞ୍ଚ ଓ ୱାର୍ଡସଭ୍ୟ ନିର୍ବାଚନ ପାଇଁ ବିଜ୍ଞପ୍ତି ପ୍ରକାଶ ପାଇବ। ୨୦ ତାରିଖରେ ନାମାଙ୍କନ ଏବଂ ୨୪ ତାରିଖରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ। ନଭେମ୍ବର ୨୯ରେ ମତଦାନ ସହ ଫଳାଫଳ ଘୋଷଣା କରାଯିବ। ଓଡ଼ିଶାର କୋଟିଆ ପଞ୍ଚାୟତକୁ ତିନି ଭାଗରେ ବିଭକ୍ତ କରି ଆନ୍ଧ୍ର ଗଞ୍ଜେଇପଦର, ଫାଟୁସିନେରି ଓ ଫଗୁଣସିନେରି ନାମରେ ପଞ୍ଚାୟତ ଗଠନ କରିଛି। ଏହି ତିନି ପଞ୍ଚାୟତରେ ମଧ୍ୟ ନିର୍ବାଚନ କରାଇବାକୁ ଯୋଜନା ରହିଛି।ନଭେମ୍ବର ୫ ତାରିଖରେ ହୋଇଥିବା ଜିଲ୍ଲା ପରିଷଦ ନିର୍ବାଚନରେ ଓଡ଼ିଶାର ତୀବ୍ର ବିରୋଧ ଯୋଗୁଁ ଆନ୍ଧ୍ରକୁ ଆଶାନୁରୂପ ସଫଳତା ମିଳିନଥିଲା। କୋଟିଆ ଭୋଟରଙ୍କୁ ସାରିକି, କୋଡ଼ାମ ଓ ଟୋନାମ ବୁଥ୍‌କୁ ନେଇ ମତଦାନ କରାଇଥିଲେ ମଧ୍ୟ ଭୋଟ ହାର ଆଶାଠାରୁ କମ୍ ରହିଥିଲା। ତେଣୁ ଏଥର ଭୋଟରଙ୍କୁ ପ୍ରଭାବିତ, ପ୍ରଲୋଭିତ କିମ୍ବା ଭୟଭୀତ କରି ଅଧିକରୁ ଅଧିକ ଭୋଟ ହାତେଇବାକୁ ଆନ୍ଧ୍ର ନୂଆ ରଣନୀତି କରୁଥିବା ଆକଳନ କରାଯାଉଛି।

ଏପରିକି ଓଡ଼ିଶାର ବିରୋଧ ଯଦି ପୂର୍ବଭଳି ଜୋରଦାର ହୁଏ, ତେବେ ମନୋନୟନ ଜରିଆରେ ସରପଞ୍ଚ ଓ ୱାର୍ଡସଭ୍ୟ ଚୟନ କରିବାର ବିକଳ୍ପ ଉପରେ ମଧ୍ୟ ଆନ୍ଧ୍ର ବିଚାର କରିପାରେ। ଅନ୍ୟପଟେ କୋଟିଆବାସୀ ଯଦି ଆନ୍ଧ୍ର ନିର୍ବାଚନରେ ଅଧିକ ସଂଖ୍ୟାରେ ପ୍ରାର୍ଥିପତ୍ର ଦାଖଲ କରନ୍ତି, ତେବେ କିଭଳି ରଣନୀତି ଆପଣାଇବ ଆନ୍ଧ୍ର, ସେନେଇ ମଧ୍ୟ ପ୍ରସ୍ତୁତି ଚାଲିଛି।ଏପଟେ ଆନ୍ଧ୍ରର ଏହି ଯୋଜନାକୁ ପଣ୍ଡ କରିବାକୁ ଓଡ଼ିଶା ମଧ୍ୟ ପୂରା ଦମ୍‌ରେ ପ୍ରସ୍ତୁତି ଚଳାଇଛି। କୋଟିଆର ସୁରକ୍ଷା ପାଇଁ ଓଡ଼ିଶାର ସମସ୍ତ ରାଜନୈତିକ ଦଳ ପୁଣି ଏକାଠି ହେବାର ସୂଚନା ମିଳିଛି। କୋରାପୁଟ ଜିଲ୍ଲାପାଳ ମଧ୍ୟ ସ୍ପଷ୍ଟ କରିଛନ୍ତି ଯେ ଆନ୍ଧ୍ରର ସରପଞ୍ଚ ନିର୍ବାଚନକୁ ଜୋରଦାର ବିରୋଧ କରାଯିବ। ନିର୍ବାଚନ ରୋକିବା ପାଇଁ ଜିଲ୍ଲା ପ୍ରଶାସନ ସୁଚିନ୍ତିତ ରଣନୀତି ପ୍ରସ୍ତୁତ କରୁଛି। ଏହି ରାଜନୈତିକ ଛକାପଞ୍ଝା ମଧ୍ୟରେ ଏସ୍‌ଆଇଆର୍‌ର ସ୍ୱଚ୍ଛତାକୁ ନେଇ କଂଗ୍ରେସ ମଧ୍ୟ ପ୍ରଶ୍ନ ଉଠାଇଛି। ଏସ୍‌ଆଇଆର୍‌ ପରେ ଜଣେ ଭୋଟର କିପରି ଦୁଇଟି ରାଜ୍ୟରେ ମତଦାନ କରୁଛନ୍ତି, ତାହାକୁ ନେଇ ଦଳ ପ୍ରଶ୍ନ କରିଛି।

କଥା ଦେଇ, କଥା ରଖିଲେନି ମୋହନ

0 Comments read News, Politics

ଦୀପାବଳୀ ପୂର୍ବରୁ ମହାନଦୀ ଜଳ ବିବାଦର ସମାଧାନ ହେବ ବୋଲି ଓଡ଼ିଶାର ମୁଖ୍ୟମନ୍ତ୍ରୀ ମୋହନ ମାଝୀ ଘୋଷଣା କଲେ । ଜୁଲାଇ 30 ତାରିଖରେ ଦିଲ୍ଲୀ ମିଡିଆ ଆଗରେ ମୁଖ୍ୟମନ୍ତ୍ରୀ ଏଭଳି କହିଥିଲେ। ମୁଖ୍ୟମନ୍ତ୍ରୀଙ୍କର ସେହି କଥା ପଦକ, ଓଡ଼ିଶାବାସୀଙ୍କ ମନରେ ଖୁସି ଭରି ଦେଇଥିଲା । ମୁଖ୍ୟମନ୍ତ୍ରୀଙ୍କୁ ବିଶ୍ୱାସ କରିବାର ରିଜିନ୍ ମଧ୍ୟ ଥିଲା । କାରଣ ଗତ ଜୁଲାଇ 30 ତାରିଖରେ ଓଡ଼ିଶା ଏବଂ ଛତିଶଗଡ଼ ମୁଖ୍ୟମନ୍ତ୍ରୀଙ୍କୁ ସାଙ୍ଗରେ ବସାଇ କେନ୍ଦ୍ର ଜଳଶକ୍ତି ମନ୍ତ୍ରୀ ସି.ଆର. ପାଟିଲ ଦିଲ୍ଲୀରେ ମିଟିଂ କଲେ। ମହାନଦୀ ଜଳକୁ ନେଇ ଓଡ଼ିଶା ଏବଂ ଛତିଶଗଡ଼ ମଧ୍ୟରେ ଥିବା ବିବାଦର ସମାଧାନ ଲାଗି ବାଟ ଖୋଜାଗଲା । ସେହି ମିଟିଂରୁ ବାହାରି ମୁଖ୍ୟମନ୍ତ୍ରୀ ମୋହନ ମାଝୀ, ଉତ୍ସାହିତ ହୋଇ କହିଥିଲେ ଯେ ମହାନଦୀ ଜଳ ବିବାଦର ସମାଧାନ, ଦୀପାବଳୀ ପୂର୍ବରୁ ନିଶ୍ଚେ ହୋଇଯିବ । କିନ୍ତୁ ଦୀପାବଳୀ ତ ଆସିଗଲା, କାହିଁ ମହାନଦୀ ଜଳ ବିବାଦର ସମାଧାନ ତ ହେଲା ନାହିଁ ? କେନ୍ଦ୍ର ଜଳଶକ୍ତି ମନ୍ତ୍ରୀଙ୍କ ପରେ ଆଗକୁ ଆସିଥିଲେ ଅମିତ ଶାହ। ଓଡ଼ିଶା ଏବଂ ଛତିଶଗଡ଼ ମୁଖ୍ୟମନ୍ତ୍ରୀଙ୍କୁ ଏକାଠି ବସାଇ ଶାହ ଦିଲ୍ଲୀରେ ବୈଠକ କରିଥିଲେ। କିନ୍ତୁ ଗତ ଅକ୍ଟୋବର ୧ ତାରିଖରେ ଅମିତ ଶାହଙ୍କ ଅଧ୍ୟକ୍ଷତାରେ ହୋଇଥିବା ମିଟିଂ ମଧ୍ୟ ଫ୍ଲପ୍ ହୋଇଗଲା ବୋଲି ଏବେ କହିବାକୁ ପଡିବ । କାରଣ ଟ୍ରିପଲ୍ ଇଞ୍ଜିନର ସରକାରଙ୍କ ଡିସକସନ୍ ପରେ ବି ଦୀପାବଳୀ ସୁଦ୍ଧା ହେଲାନାହିଁ ମହାନଦୀ ଜଳ ବିବାଦର ସମାଧାନ । ଏବେ ଚର୍ଚ୍ଚା ଓଡ଼ିଶା, ଛତିଶଗଡ଼ ଏବଂ କେନ୍ଦ୍ରରେ ବିଜେପିର ସରକାର ଥାଇ ମଧ୍ୟ କାହିଁକି ହୋଇ ପାରୁନାହିଁ ମହାନଦୀ ବିବାଦର ସମାଧାନ?

କୁଆଡ଼େ ଗଲା ଅମିତ ଶାହଙ୍କ ମିଟିଂର ପ୍ରତିଶ୍ରୁତି
ଜଳସେଚନ, ବନ୍ୟା ନିୟନ୍ତ୍ରଣ, ଜଳବିଦ୍ୟୁତ୍ ଉତ୍ପାଦନ, ପାନୀୟ ଜଳ ଯୋଗାଣ ସହ ପରିବେଶ ସୁରକ୍ଷା ଭଳି ପ୍ରସଙ୍ଗରେ ଆଲୋଚନା ହୋଇଛି ବୋଲି ସେତେବେଳେ କହିଥିଲେ ଓଡ଼ିଶା CM। ଉଭୟ ରାଜ୍ୟ ସମାଧାନ ଦିଗରେ ଆଗକୁ ବଢୁଛନ୍ତି । ଦୀପାବଳୀ ସୁଦ୍ଧା ସମାଧାନର ରୂପରେଖ ସାମ୍ନାକୁ ଆସିବ ବୋଲି କୁହାଯାଇଥିଲା। ମାତ୍ର ସେମିତି କିଛି ବି ହେଲାନି ।ସେପଟେ ମହାନଦୀ ପ୍ରସଙ୍ଗକୁ ନେଇ ସରକାରଙ୍କୁ ଘେରୁଛନ୍ତି ବିଜେଡି-କଂଗ୍ରେସ ।ନଭେମ୍ବର 18 ତାରିଖରେ ବିଧାନସଭାର ଶୀତକାଳୀନ ଅଧିବେଶନ ।ଲାଗୁଛି ଦୀପାବଳୀର ବାଣ ଫୋଟକା ପରି ବିଧାନସଭାରେ ଫୁଟିବେ ବିରୋଧି ଦଳ । ମହାନଦୀ ଜଳ ପାଇଁ ବିଧାନସଭାର ଶୀତକାଳୀନ ଅଧିବେଶନ ଧୋଇ ଯିବନାହିଁ ତ?
ଏ ଷ୍ଟୋରୀ ଲେଖିଛନ୍ତି- ବିଜୟ କେତନ ବରାଳ

ଅଡୁଆରେ ଏନ୍ ଭାସ୍କର ରାଓ:ରାଜ୍ୟ ସାରା ଘେରିଲେ EOW

0 Comments read News, Politics

EOW ଜାଲରେ ପଡ଼ିଛନ୍ତି ପୂର୍ବତନ ରାଜ୍ୟସଭା ସାଂସଦ ଏନ୍ ଭାସ୍କର ରାଓ। ରାୟଗଡ଼ା ଟ୍ରକ୍‌ ମାଲିକ ସଙ୍ଘର ଆର୍ଥିକ ଅନିୟମିତତା ମାମଲାରେ ପୂର୍ବତନ ରାଜ୍ୟସଭା ସାଂସଦ ଏନ୍‌.ଭାସ୍କର ରାଓଙ୍କ ଘର ସହ ବିଭିନ୍ନ ସ୍ଥାନରେ ଚଢ଼ାଉ ହୋଇଛି । ସଙ୍ଘର ଟଙ୍କାକୁ ଆତ୍ମସାତ କରିବା ଅଭିଯୋଗରେ ଚଢ଼ାଉ କରିଛନ୍ତି କ୍ରାଇମ ବ୍ରାଞ୍ଚର ୨୫ ଜଣିଆ EOW ଟିମ୍ । ରାୟଗଡ଼ା ବାସଭବନ ସମେତ ବିଭିନ୍ନ ସ୍ଥାନରେ ଚଢ଼ାଉ ହୋଇଛି । ରାଜ୍ୟ ସାରା ୧୧ଟି ସ୍ଥାନରେ ୮ଟି ଟିମ୍‌ର ରେଡ୍‌ ହୋଇଛି । ରାଣୀଗୁଡ଼ା ଫାର୍ମ ହାଉସ୍‌ ଓ ପିତଳା ଷ୍ଟ୍ରିଟ୍‌ ବାସଭବନରେ ଚଢାଉ ହେବା ସହ ରାୟତ କଲୋନୀସ୍ଥିତ ଜି. କୃଷ୍ଣଙ୍କ ବାସଭବନରେ ମଧ୍ୟ ରେଡ୍‌ ହୋଇଛି । ରାୟଗଡ଼ା ଟ୍ରକ୍ ମାଲିକ ସଂଘ କାର୍ଯ୍ୟାଳୟରେ ମଧ୍ୟ ରେଡ୍ ହୋଇଛି । ଭୁବନେଶ୍ୱର ଫରେଷ୍ଟ ପାର୍କ ଓ ବରମୁଣ୍ଡା ଏଚ୍‌ବି କଲୋନୀ, ଫରେଷ୍ଟ ପାର୍କର ଶ୍ରୀ ଆଦିତ୍ୟ ଇଣ୍ଡଷ୍ଟ୍ରିଜ୍ ପ୍ରାଇଭେଟ୍ ଲିମିଟେଡ୍‌ରେ ଚଢାଉ ହୋଇଛି । ବରମୁଣ୍ଡାର ଅରୁଣ ପାୱାର ପ୍ରୋଜେକ୍ଟ ଲିମିଟେଡ୍‌,ଭୀମପୁର ଶ୍ରୀ ଆଦିତ୍ୟ ଟ୍ରେଡିଂ ଆଣ୍ଡ ମାର୍କେଟିଂ ପ୍ରାଇଭେଟ୍ ଲିମିଟେଡ୍‌ରେ ରେଡ୍‌ ହୋଇଛି । ମଞ୍ଚେଶ୍ୱର ଶ୍ରୀ ବାଲାଜୀ ରିଅଲ୍ ଇଷ୍ଟେଟ୍ସ ଆଣ୍ଡ ଏଗ୍ରି ଡେଭଲପର୍ସ, ଶ୍ରୀ ଆଦିତ୍ୟ ରିଅଲ୍ ଇଷ୍ଟେଟ୍ ଆଣ୍ଡ ଏଗ୍ରି ଡେଭଲପର୍ସରେ ରେଡ୍‌ ହୋଇଛି । ରାୟଗଡ଼ା ଗୌତମ ନଗର ଗ୍ୟାସ୍ ଏଜେନ୍ସି ସହ ଶ୍ରୀ ଆଦିତ୍ୟ ଏଚ୍‌ପି ଏଣ୍ଟରପ୍ରାଇଜେସ୍ ଗ୍ୟାସ୍ ଏଜେନ୍ସିରେ ଚଢାଉ ହୋଇଛି । ଏନ୍ ଭାସ୍କର ରାଓ ରାୟଗଡ଼ା ଟ୍ରକ୍‌ ମାଲିକ ସଙ୍ଘର  ଟଙ୍କା ହେରଫେର କରି ବ୍ୟକ୍ତିଗତ କାମରେ ଲଗାଇଥିବା ଅଭିଯୋଗ ।

ଏନ୍. ଭାସ୍କର ରାଓ ୨୦୧୬ ଜୁଲାଇ ୨ରୁ ୨୦୨୨ ଜୁଲାଇ ୧ ପର୍ଯ୍ୟନ୍ତ ଓଡ଼ିଶାରୁ ରାଜ୍ୟସଭା ସାଂସଦ ଥିଲେ। ସେ ବିଜେଡି ତରଫରୁ ବିନା ପ୍ରତିଦ୍ୱନ୍ଦ୍ୱିତାରେ ନିର୍ବାଚିତ ହୋଇଥିଲେ। ୨୦୨୫ ସେପ୍ଟେମ୍ବର ୯ ରେ ବିଜୁ ଜନତା ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି । ଦଳର ଆଭ୍ୟନ୍ତରୀଣ କାର୍ଯ୍ୟକଳାପ ଏବଂ ରାୟଗଡ଼ା ଜିଲ୍ଲା ସଭାପତି ଚୟନକୁ ନେଇ ଅସନ୍ତୋଷ ପ୍ରକାଶ କରି ସେ ଦଳ ଛାଡ଼ିଥିଲେ। ବିଜେଡି ଛାଡ଼ିବା ପରେ  ‘ବିଜୁ ସ୍ୱାଭିମାନ ମଞ୍ଚ‘ ଗଠନ କରିଛନ୍ତି । ପାୱାରରୁ ହଟିଲା ପରେ ଠକେଇ ଅଭିଯୋଗରେ EOW ଜାଲରେ ପଡ଼ିଛନ୍ତି ଏନ୍. ଭାସ୍କର ରାଓ ।

 

IPS ଅଫିସରଙ୍କ କ୍ୟାରୀୟର ବର୍ବାଦ କରିଦେବ ଜେଲରଙ୍କ FIR !

0 Comments read News, Politics

ସିନୟର IPS ଅଫିସର ସୁଶାନ୍ତ ନାଥଙ୍କ ନାଁରେ ଆସିଛି ଯୌନ ଉତ୍ପୀଡନ ଦେଉଥିବାର ସଂଗୀନ ଅଭିଯୋଗ ହୋଇଛି । ନଭେମ୍ୱର 3 ତାରିଖରେ ସଂସଦର ଷ୍ଟାଣ୍ଡିଂ କମିଟି ଆଗରେ ହାଜରେ ହେବେ ସୁଶାନ୍ତ ନାଥ। ଏଭଳି ଅଭିଯୋଗ ଆସିବା ପରେ ଓଡ଼ିଶା ସରକାର ସୁଶାନ୍ତ ନାଥଙ୍କୁ ଜେଲ ଡିଜିରୁ ଗୃହ ବିଭାଗର ଓଏସଡି ଭାବେ ବଦଳି କରିଛନ୍ତି । ତେବେ ନାଥ ବାବୁଙ୍କ ନାଁରେ ଯୌନ ନିର୍ଯ୍ୟାତନାର ଅଭିଯୋଗ ଆଣିଛନ୍ତି, ତାଙ୍କର ପୂର୍ବତନ ସହକର୍ମୀ। ଚୌଦ୍ୱାର ସର୍କଲ ଜେଲର ପୂର୍ବତନ ଜେଲର ସନ୍ତୋଷିନୀ ଦାଶଙ୍କ ଲିଖିତ ଅଭିଯୋଗ ପରେ ନାଥ ବାବୁଙ୍କ ବିରୁଦ୍ଧରେ ଆକ୍ସନ ନେଇଛନ୍ତି ରାଜ୍ୟ ସରକାର । ନାଥ ବାବୁଙ୍କ ବିରୁଦ୍ଧରେ ଆସିଛି ଯୌନ ନିର୍ଯାତନା, ପଦର ଅପବ୍ୟବହାର, ଅପରାଧିକ ଧମକ ସହ ଜୀବନ ପ୍ରତି ବିପଦ ସୃଷ୍ଟି କରିବା ଭଳି ସଂଗୀନ ଅଭିଯୋଗ । ୨୦୨୫ ମସିହା ଜୁଲାଇ୧୮ତାରିଖରେ ସୁଶାନ୍ତ ନାଥ, ନିଜ ବନ୍ଧୁ କୁଲଦୀପ ରଥଙ୍କ ଜରିଆରେ ସନ୍ତୋଷିନୀ ଦାଶଙ୍କୁ ହୋଟେଲକୁ ଡାକିଥିଲେ ।ସେହି ପ୍ରସ୍ତାବରେ ରାଜି ନହେବାରୁ ତାଙ୍କର ବାରମ୍ବାର ବଦଳି ସହ ସସପେଣ୍ଡ ଏବଂ ଦରମା ବନ୍ଦ ହେବାର ଅଭିଯୋଗ ଆଣିଛନ୍ତି ସନ୍ତୋଷିନୀ ଦାଶ।

ଏହି ଅଭିଯୋଗ ଆଧାରରେ ଚୌଦ୍ୱାର ଥାନାରେ କେସ୍ ନମ୍ବର ୭୧୩/୨୦୨୬ ରୁଜୁ ହୋଇଛି। ଭାରତୀୟ ନ୍ୟାୟ ସଂହିତା-BNSର ଧାରା ୭୫(୨), ୩୫୧(୨) ଓ ୩(୫) ଅନୁଯାୟୀ ପୋଲିସ କେସ୍ ଫାଇଲ୍ କରିଛି। ଅନ୍ୟପଟେ ଓଡ଼ିଶାର DGP ହେବା ରେସରେ ଅଛନ୍ତି ସୁଶାନ୍ତ ନାଥ ।ମାତ୍ର ଯୌନ ନିର୍ଯାତନାର ଅଭିଯୋଗ, ନାଥ ବାବୁଙ୍କ ପାଇଁ କାଳ ହେଲାଣି।ଓଡ଼ିଶା ସରକାରଙ୍କ ପକ୍ଷରୁ UPSC ନିକଟକୁ ପଠା ଯାଇଥିବା ୧୧ଜଣିଆ IPS ଅଧିକାରୀଙ୍କ ଲିଷ୍ଟରେ 3ଜଣଙ୍କ ମଧ୍ୟରେ ଥିଲେ ନାଥ ବାବୁକିନ୍ତୁ SI ନିଯୁକ୍ତି ଦୁର୍ନୀତି ମାମଲାରେ ସୁଶାନ୍ତ ନାଥଙ୍କୁ CBI ପଚରା ଉଚରା କରିବାର ସଙ୍କେତ ମିଳିବା ପରେ, ରାଜ୍ୟ ସରକାର ନାଥ ବାବୁଙ୍କର ‘ଇଣ୍ଟିଗ୍ରିଟି ସାର୍ଟିଫିକେଟ୍‘ ପ୍ରତ୍ୟାହାର କରିଥିଲେ।ଯାହା ଫଳରେ ତାଙ୍କ ନାଁ DGP ଚୟନ ପ୍ରକ୍ରିୟାରୁ ବାଦ୍ ପଡ଼ିଥିଲା ।ସେହି ନିଷ୍ପତ୍ତି ବିରୋଧରେ ସୁପ୍ରିମକୋର୍ଟର ଦ୍ୱାରସ୍ଥ ହୋଇଛନ୍ତି ସୁଶାନ୍ତ ନାଥ।ତେବେ ଡିଜିପି ଚୟନ ପ୍ରକ୍ରିୟା ସୁପ୍ରିମକୋର୍ଟରେ ବିଚାରାଧୀନ ଥିବା ବେଳେ, ଚୌଦ୍ୱାର ଜେଲର ପୂର୍ବତନ ମହିଳା ଜେଲରଙ୍କ FIR ସୁଶାନ୍ତ ନାଥଙ୍କ କ୍ୟାରିୟର ବର୍ବାଦ କରିଦେଇ ପାରେ। ଯୌନ ନିର୍ଯାତନା ଅଭିଯୋଗ ଆଧାରରେ ତାଙ୍କୁ ଜେଲ୍ ଡିଜି ପଦରୁ ହଟାଇ ଗୃହ ବିଭାଗର ଓଏସଡି କଲେଣି ।ସେପଟେ ସଂସଦରେ ଷ୍ଟାଣ୍ଡିଂ କମିଟି ।ଏମିତି ହେବନି ତ ସରକାର ବାହଦୂର 1993 ବ୍ୟାଚର IPS ସୁଶାନ୍ତ ନାଥଙ୍କୁ ଚାକିରିରୁ ନିଲମ୍ବିତ କରିଦେବେ । ଆଉ ଦିନେ ଯେଉଁ ଜେଲ ବିଭାଗ ସମ୍ଭାଳୁଥିଲେ ନାଥ ବାବୁ, ସେହି ଜେଲକୁ ତାଙ୍କୁ ଏକ ଅଭିଯୁକ୍ତ ଭାବରେ ପଠାଇ ଦେବେ।
ଏ ଷ୍ଟୋରୀ ଲେଖିଛନ୍ତି-ବିଜୟ କେତନ ବରାଳ

ବାତ୍ୟାରେ OCS ପରୀକ୍ଷା : ରିସ୍କ ନେଇ ଝଟକା ଖାଇବେ କି ସରକାର ?

0 Comments read News, Politics

ପୂର୍ବ ନିର୍ଦ୍ଧାରିତ ଅକ୍ଟୋବର 31 ତାରିଖରେ ଓଡ଼ିଶା ସିଭିଲ ସର୍ଭିସର ମେନ୍ ଏକଜାମ୍ କରିଛନ୍ତି ଏକ-ଜିଦିଆ ଓଡ଼ିଶା ସରକାର। OPSC ଦ୍ୱାରା ଆୟୋଜିତ Odisha Civil Services ପରୀକ୍ଷାରେ କୌଣସି କାଣ୍ଟଛାଟ ହେଲା ନାହିଁ। ବାତ୍ୟା ଅର୍ଣ୍ଣବ ପ୍ରଭାବରେ କ୍ଷତିଗ୍ରସ୍ତ ପରୀକ୍ଷାର୍ଥୀଙ୍କର ସ୍ୱାର୍ଥକୁ  ଅଣଦେଖା କରାଯାଇଥିବା ଅଭିଯୋଗ। ନା’ କଂଗ୍ରେସ ସାଂସଦଙ୍କ ଦାବି ଶୁଣିଲେ, ନା’ ନିଜ ପାର୍ଟିର ଏମପିଙ୍କ କଥାକୁ ଗୁରୁତ୍ୱ ଦେଲେ ଓଡ଼ିଶାର ବିଜେପି ସରକାର। ବରଂ ପରୀକ୍ଷାର୍ଥୀଙ୍କର ନେବା-ଆଣିବା ପାଇଁ ହେଲ୍ପଲାଇନ୍ ନମ୍ବର ଜାରି କରି କ୍ରେଡିଟ୍ ନେବାକୁ ଚେଷ୍ଟା କରୁଛନ୍ତି ମୋହନ ମାଝୀ ସରକାର। ସରକାରଙ୍କ ଏକ ଜିଦିଆ ଆଟିଚୁଡ୍ କଣ ପାଇଁ ? ଯେଉଁଠି ବିନା ହେଲିକପ୍ଟରରେ ବାତ୍ୟାର ସ୍ଥିତି ସମୀକ୍ଷା କରିବା ସମ୍ଭବ ହେଉନି। ସେଠି ପାଣିଭର୍ତ୍ତି ଅଞ୍ଚଳରୁ ପରୀକ୍ଷାର୍ଥୀ ଆସିବେ କେମିତି? ସରକାରଙ୍କ ହେଲ୍ପ-ଲାଇନ୍ ନମ୍ବର କେବଳ ଧର୍ମକୁ ଆଖିଠାର ନୁହେଁ ତ? କାରଣ ବାତ୍ୟା ଦ୍ୱାରା ସର୍ବାଧିକ ପ୍ରଭାବିତ ଗଞ୍ଜାମ ଜିଲ୍ଲାରୁ ୩୨୫ଜଣ ଓଡ଼ିଶା ସିଭିଲ୍ ସର୍ଭିସର ମେନ୍ ଏକଜାମ୍ ଦେବାର ଥିଲା । ସେହିଭଳି ଗଜପତି, ରାୟଗଡ଼ା, କୋରାପୁଟ ନବରଙ୍ଗପୁର ଏବଂ ମାଲକାନଗିରି ଜିଲ୍ଲାରେ ଭୂସ୍ଖଳନ ସହ ଜଳବନ୍ଦୀ ସମସ୍ୟା ଦେଖାଦେଇଛି । ସେହି ସବୁ ଜିଲ୍ଲାରୁ ପ୍ରାୟ ୧୦୦ ଜଣ ପରୀକ୍ଷାର୍ଥୀ ଅଛନ୍ତି। ଗଞ୍ଜାମ ଜିଲ୍ଲାର ଅଧିକାଂଶ ଅଞ୍ଚଳ ଏବେ ଜଳମଗ୍ନ। ପରିସ୍ଥିତି ଏମିତି ଯେ ଅନେକ ରାସ୍ତାଘାଟ ବିଚ୍ଛିନ୍ନ, ଟ୍ରେନ୍ ବସ୍ ସବୁ ବାତିଲ୍। ଭୟାନକ ପରିସ୍ଥିତିକୁ ଆଖିରେ ରଖି ବ୍ରହ୍ମପୁରର ବିଜେପି ସାଂସଦ ପ୍ରଦୀପ ପାଣୀଗ୍ରାହୀ ଏକ୍ଜାମ୍ ପୋଷ୍ଟପନ୍ କରିବାକୁ OPSCକୁ ସୋସିଆଲ ମିଡିଆ ମାଧ୍ୟମରେ ରିକ୍ୟୁଏଷ୍ଟ କଲେ।

ବିଜୁ ଜନତା ଦଳ ଏବଂ କଂଗ୍ରେସ ତରଫରୁ ମଧ୍ୟ ଏପରି ପରିସ୍ଥିତିରେ ପରୀକ୍ଷା ନ କରିବାକୁ ଦାବି କରାଗଲା । ଅନ୍ୟପଟେ ଯାତାୟାତ ଦାୟିତ୍ଵ ରାଜ୍ୟ ସରକାର ନେବେ କହି ପ୍ରଭାବିତ ଅଞ୍ଚଳର ପରୀକ୍ଷାର୍ଥୀମାନେ ନିଜ ନିଜ ବ୍ଳକର ବିଡିଓଙ୍କ ସହ କଣ୍ଟାକ୍ଟ କରିବାକୁ ପରାମର୍ଶ ଦେଲେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ । କିନ୍ତୁ ବାତ୍ୟା ଯୋଗୁଁ ବହୁ ଟ୍ରେନ୍ ବାତିଲ ହେବା ସହ ବସ୍ ଚଳାଚଳ ମଧ୍ୟ ହୋଇପାରୁନି। ଅନେକ ଆଶାୟୀ ପରୀକ୍ଷା କେନ୍ଦ୍ରରେ ଠିକ୍ ସମୟରେ ପହଞ୍ଚିବା ନେଇ ଆଶଙ୍କାରେ ।ହେଲେ ସରକାରଙ୍କ ଏକା ଜିଦ୍, ଅକ୍ଟୋବର ୩୧ରୁ ନଭେମ୍ବର୭ ମଧ୍ୟରେ ଓସିଏସ୍ ମେନ୍ ପରୀକ୍ଷା ହେବ  । ଅପର ପକ୍ଷରେ ପରୀକ୍ଷା ନ କରିବାକୁ ଦାବି କରିବା ସହ ସରକାରଙ୍କୁ ସମାଲୋଚନା କରିଛନ୍ତି କଂଗ୍ରେସ ସାଂସଦ ସପ୍ତଗିରି ଉଲାକା। ଉକାକାଙ୍କର କହିବା କଥା ହେଲା, ବିନା ହେଲିକପ୍ଟରରେ ଯଦି ସରକାର ବାତ୍ୟାର ସ୍ଥିତି ସମୀକ୍ଷା କରି ପାରୁନାହାନ୍ତି ସେହି ସମୟରେ ପରୀକ୍ଷା ଦେବାକୁ କେମିତି ଆସିବେ ପରୀକ୍ଷାର୍ଥୀ? ପାଣିଭର୍ତ୍ତି ଅଞ୍ଚଳରୁ ପରୀକ୍ଷାର୍ଥୀଙ୍କୁ ଆଣିବାରେ ସରକାର ସଫଳ ହେଉଛନ୍ତି ନା’ ରିସ୍କ ନେଇ ଝଟକା ଖାଉଛନ୍ତି ?