1868 ମସିହାରେ ପ୍ରତିଷ୍ଠା ହୋଇଥିଲା ରେଭେନ୍ସା କଲେଜ । ସ୍ୱାଧିନତା ପୂର୍ବରୁ ତିଆରି ଓଡ଼ିଶାର ପ୍ରଥମ କଲେଜ ରେଭେନ୍ସା। କଲେଜକୁ 158 ବର୍ଷ ୟୁନିଭରସିଟି ମାନ୍ୟତାକୁ 20 ବର୍ଷ ବିତି ଗଲାଣି । ମାତ୍ର ସବୁଠୁ ଦୁଃଖର କଥା ହେଉଛି ରେଭେନ୍ସା ୟୁନିଭରସିଟି ନାଁରେ ଜମି ନାହିଁ। ପୂର୍ତ୍ତ ବିଭାଗ ଜମି ଉପରେ ଠିଆ ହୋଇଛି ରେଭେନ୍ସା । ସେ ୮୧ ଏକର ଜମିର ମାଲିକାନା ବଦଳି ପାରୁନି କି ରେଭେନ୍ସା ୟୁନିଭରସିଟି ନାଁ ରେ ହୋଇପାରୁନି ।
ଗୋଟାଏ ପଟେ ରେଭେନ୍ସା ୟୁନିଭରସିଟି ନାଁରେ ଜମି ନ ଥିବା ବେଳେ ବୋଝ ଉପରେ ଲଳିତା ବିଡ଼ା ପରି ସାଢ଼େ ୫ ଏକର ଜମି ସରକାର ଅନ୍ୟ ହାତକୁ ଟେକି ଦେଇଛନ୍ତି। ରେଭେନ୍ସା ବିଶ୍ୱବିଦ୍ୟାଳୟ ମୌଜା -ୟୁନିଟ୍-୨୪, କଲେଜ ଛକ, କଟକ ଅଧୀନରେ ଥିବା ୮୧.୦୪୩ ଡିସିମିଲ୍ ଜମି ଉପରେ ନିର୍ମାଣ ହୋଇଛି। ୟୁନିଭରସିଟି ନାଁରେ ଜମି ନ ଥିବାରୁ ଆର୍ଡିସିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ୮୧ ଏକର ଜମିକୁ ରେଭେନ୍ସା ନାମରେ କରିବା ସହିତ ସେକେଣ୍ଡ କ୍ୟାମ୍ପସ୍ -୧୨୬ ଏକର ଜମି ସିଡିଏ ଅଞ୍ଚଳରେ ଦେବାକୁ ନିଷ୍ପତ୍ତି ହୋଇଥିଲା। ଯେଉଁ ବୈଠକରେ ଉଚ୍ଚଶିକ୍ଷା ବିଭାଗ, ରାଜସ୍ୱ ବିଭାଗ, ଜିଲ୍ଲା ପ୍ରଶାସନ ସହିତ ରେଭେନ୍ସା ୟୁନିଭରସିଟିର ବହୁ ଅଧିକାରୀ ଉପସ୍ଥିତ ଥିଲେ। ନୂଆ କ୍ୟାମ୍ପସ୍ର ୧୨୬ ଏକର ଜମିକୁ ୯୯ ବର୍ଷ ପାଇଁ ଲିଜ୍ ଡିଡ୍ରେ ରେଭେନ୍ସାକୁ ଦିଆ ଯାଇଥିଲା। ମାତ୍ର ମୁଖ୍ୟ କ୍ୟାମ୍ପସ୍ର ଜମିକୁ ନେଇ ଦେଇଥିବା ପ୍ରତିଶ୍ରୁତି ଭୁଲିଗଲେ ଉଚ୍ଚଶିକ୍ଷା ଓ ରାଜସ୍ୱ ବିଭାଗ।
ବିଜେପି ସରକାରରେ 2024ରେ ରାଜସ୍ୱ ବିଭାଗର ନିର୍ଦ୍ଦେଶ ବି ପୂରଣ ହୋଇପାରୁନି। ଓଲଟା ରେଭେନ୍ସା ନାଁରେ ଜମି ନ ଥିବାରୁ ରେଭେନ୍ସା ଜୁନିୟର କଲେଜ ପାଇଁ ପ୍ରସ୍ତାବିତ ଅଢ଼େଇ ଏକର ଓ ଅର୍ବାନ୍ ହାଟ ପାଇଁ ୩ ଏକରରୁ ଅଧିକ ଜମିକୁ ସରକାର ନେଇ ଯାଇଛନ୍ତି। ଯେଉଁ ଜମି ହୁଏତ ରେଭେନ୍ସା ନାଁରେ ଥିଲେ ଏମିତି ହୋଇ ପାରି ନ ଥାଆନ୍ତା। ରେଭେନ୍ସା ୟୁନିଭରସିଟି ନାଁରେ ଜମି କରିବାକୁ ଉଚ୍ଚଶିକ୍ଷା ବିଭାଗ, ରାଜସ୍ୱ ବିଭାଗ ଓ ଜିଲ୍ଲା ପ୍ରଶାସନକୁ ବାରମ୍ବାର ଚିଠି ହୋଇଥିଲେ ବି ଫଳ ଶୂନ। ମଧୁସୂଦନ ଦାସ, ବିଜୁ ପଟ୍ଟନାୟକ, ହରେକୃଷ୍ଣ ମହତାବଙ୍କ ଭଳି ପ୍ରମୁଖ ବ୍ୟକ୍ତି ପଢିଥିବା ଅନୁଷ୍ଠାନର ଏ ଅବସ୍ଥା ଲଜ୍ଜାଜନକ । ତେବେ ରେଭେନ୍ସାର ନାଁ ବଦଲାଇବାକୁ ପ୍ରସ୍ତାବ ଦେଉଥିବା ଓଡ଼ିଆ ପୁଅ ତଥା କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମାଲିକାନା ବଦଳ ପ୍ରସଙ୍ଗରେ ଚୁପ୍ କାହିଁକି? 24 ବର୍ଷର ସରକାରଙ୍କୁ ବାରମ୍ବାର ଟାର୍ଗେଟ କରୁଥିବା ବିଜେପି ସରକାର ସମାଧାନ କରିବେ ତ ରେଭେନ୍ସା ସମସ୍ୟା ।
