ନଭେମ୍ବର ମାସରେ ରାଜ୍ୟ ସରକାରଙ୍କ ୫୦ତମ କ୍ୟାବିନେଟ୍‍ ବୈଠକ ଭୁବନେଶ୍ୱର ବାହାରେ ହେବ

• ଯଦି ଏପରି ହୁଏ ତେବେ ଓଡ଼ିଶାର କ୍ୟାବିନେଟ୍ ବୈଠକ ଦ୍ୱିତୀୟ ଥର ପାଇଁ ଭୁବନେଶ୍ୱର ବାହାରେ ହୋଇପାରେ
• ପୂର୍ବରୁ ନବୀନ ପଟ୍ଟନାୟକଙ୍କ ମୁଖ୍ୟମନ୍ତ୍ରୀତ୍ୱ କାଳରେ ପୁରୀ ଠାରେ ୨୦୧୭ ମସିହା ଡିସେମ୍ବର ୨୬ ତାରିଖରେ କ୍ୟାବିନେଟ ବୈଠକ ଅନୁଷ୍ଠିତ ହୋଇଥିଲା
• ସେହି ପୁରୀ କ୍ୟାବିନେଟ୍ ମିଟିଂର ନିଷ୍ପତ୍ତି କ୍ରମେ ପର୍ଯ୍ୟଟନ ବିଭାଗ ଠାରୁ ସଂସ୍କୃତି ବିଭାଗ ଅଲଗା ହୋଇ ଏକ ନୂତନ ବିଭାଗ ସୃଷ୍ଟି ହୋଇଥିଲା
• ଯାହାର ନାଁ ହେଉଛି ଓଡ଼ିଆ ଭାଷା,ସାହିତ୍ୟ ଓ ସଂସ୍କୃତି ବିଭାଗ
  ସାଧାରଣତଃ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ମନ୍ତ୍ରିମଣ୍ଡଳର ବୈଠକ, ଲୋକସେବା ଭବନରେ ଅନୁଷ୍ଠିତ ହୋଇଥାଏ ।
• ସେହିଭଳି ମୁଖ୍ୟମନ୍ତ୍ରୀଙ୍କ ଅଭିଯୋଗ ଶୁଣାଣି ମଧ୍ୟ ଭୁବନେଶ୍ୱରରେ ହୋଇଥାଏ
• କିନ୍ତୁ ମୋହନ ମାଝୀ ମୁଖ୍ୟମନ୍ତ୍ରୀ ହେବା ପରେ ପ୍ରଶାସନକୁ ଲୋକଙ୍କ ନିକଟକୁ ନେବା ପାଇଁ ପ୍ରଥମ ଥର ତାଙ୍କର ଅଭିଯୋଗ ଶୁଣାଣିକୁ ସମ୍ବଲପୁର ଠାରେ କରିଥିଲେ
• ୨୦୨୫ ମସିହା ଏପ୍ରିଲ୍ ୨୧ ତାରିଖରେ ସମ୍ବଲପୁର ଠାରେ ମୁଖ୍ୟମନ୍ତ୍ରୀଙ୍କ ଜନ-ଅଭିଯୋଗ ଶୁଣାଣି ହୋଇଥିଲା
• ସେହି ଢାଞ୍ଚାରେ କ୍ୟାବିନେଟ୍‍ ବୈଠକ ପାଇଁ ବିଚାର ଆଲୋଚନା ଚାଲିଛି ।

ପ୍ରଶାସନକୁ ଲୋକଙ୍କ ପାଖକୁ ନେବାପାଇଁ ଓଡିଶା ସରକାର ଏଭଳି ପଦକ୍ଷେପ ଗ୍ରହଣ କରିବେ ବୋଲି କୁହାଯାଉଛି । ପୂର୍ବରୁ ଉତ୍ତରାଖଣ୍ଡ, ମଣିପୁର ଓ ଅରୁଣାଚଳ ପ୍ରଦେଶ ସରକାର କ୍ୟାବିନେଟ୍‍ ବୈଠକକୁ ରାଜ୍ୟ ରାଜଧାନୀ ବାହାରେ କରୁଛନ୍ତି । ବିଶେଷ କରି ଧାର୍ମିକ ଓ ପର୍ଯ୍ୟଟନ ଗୁରୁତ୍ୱ ବହନ କରୁଥିବା ସ୍ଥାନ ଗୁଡିକରେ କ୍ୟାବିନେଟ୍ ବୈଠକ କରୁଛନ୍ତି ।

• ଏହାଦ୍ୱାରା କ୍ୟାବିନେଟ୍‍ ବୈଠକ ଅନୁଷ୍ଠିତ ହେଉଥିବା ସ୍ଥାନର ଗୁରୁତ୍ୱ ବୃଦ୍ଧି ପାଇବ
• ସେଠାକୁ ମୁଖ୍ୟମନ୍ତ୍ରୀଙ୍କ ସମେତ ମନ୍ତ୍ରିମଣ୍ଡଳର ସଦସ୍ୟ ଏବଂ ରାଜ୍ୟ ପ୍ରଶାସନର ପଦାଧିକାରୀମାନେ ଗସ୍ତ କରିବେ
• ଫଳରେ ସେହି ଜିଲ୍ଲା ସମେତ ଆଖପାଖ ଜିଲ୍ଲାର ପ୍ରଶାସନ ଚଳଚଞ୍ଚଳ ହେବା ସହିତ ପ୍ରଶାସନ ଲୋକଙ୍କ ନିକଟତର ହେବ
• ସ୍ଥାନୀୟ ଲୋକେ ବି ନିଜ ନିଜର ଅଭିଯୋଗକୁ ସହଜରେ ସରକାରଙ୍କ ନିକଟରେ ଉପସ୍ଥାପନ କରିପାରିବେ ।

ତେବେ ୨୦୨୪ ଜୁନ ୧୨ ତାରିଖରେ ମୋହନ ମାଝୀ ମୁଖ୍ୟମନ୍ତ୍ରୀ ହେଲେ । ପ୍ରତି ୨୦ ଦିନରେ ଓଡ଼ିଶାରେ ମନ୍ତ୍ରିମଣ୍ଡଳର ଗୋଟିଏ ଲେଖାଏଁ କ୍ୟାବିନେଟ୍ ବୈଠକ ଅନୁଷ୍ଠିତ ହେଉଛି ।
ଏ ଷ୍ଟୋରୀ ଲେଖିଛନ୍ତି-ବିଜୟ କେତନ ବରାଳ