- ଓଡ଼ିଶାରେ ଶିକ୍ଷାର ବିକଳ ଚିତ୍ର
- ୮୦% ସ୍କୁଲରେ ନାହାନ୍ତି ପ୍ରଧାନ ଶିକ୍ଷକ
- ଭାରପ୍ରାପ୍ତ ପ୍ରଧାନ ଶିକ୍ଷକରେ ଚାଲିଛି ବିଦ୍ୟାଳୟ
- ପ୍ରଧାନ ଶିକ୍ଷକ ଦାୟିତ୍ୱ ନେବାକୁ ରାଜି ନୁହନ୍ତି ଶିକ୍ଷକ
- ବିନା ପ୍ରଧାନ ଶିକ୍ଷକରେ ଚାଲୁଛି, ୧୮, ୨୦୯ ସ୍କୁଲ
ବିଜେଡି ସରକାର ହେଉ କି, ବିଜେପିର ସରକାର, ଓଡ଼ିଶାର ଶିକ୍ଷାର ବିକଳ ଚିତ୍ରରେ ସୁଧାର ଆସୁନି । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜିଲ୍ଲା ଗଞ୍ଜାମରେ ୪୫୦ ହେଡମାଷ୍ଟର ପୋଷ୍ଟ ପାଙ୍କା ପଡ଼ିଥିବା ବେଳେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ କେନ୍ଦୁଝର ଜିଲ୍ଲାରେ ୩୦୦ ହେଡମାଷ୍ଟର ପୋଷ୍ଟ ପାଙ୍କା ପଡ଼ିଛି । ଓଡ଼ିଶାର ୮୦ ପ୍ରତିଶତରୁ ଅଧିକ ପ୍ରାଥମିକ ସ୍କୁଲରେ ନାହାନ୍ତି ପ୍ରଧାନ ଶିକ୍ଷକ I ଭାରପ୍ରାପ୍ତ ପ୍ରଧାନ ଶିକ୍ଷକରେ ସ୍କୁଲ ଚାଲିଛି। ଶିକ୍ଷକଙ୍କୁ ବରିଷ୍ଠତା ଆଧାରରେ ପ୍ରଧାନ ଶିକ୍ଷକ ଦାୟିତ୍ୱ ଦିଆଯାଉ ଥିଲାବେଳେ ଅନେକ ସ୍ଥାନରେ ୱାର୍କ ଲୋଡ୍ ପାଇଁ ଦାୟିତ୍ଵ ଗ୍ରହଣ କରିବାକୁ ରାଜି ହେଉନାହାନ୍ତି ।
ସରକାରୀ ତଥ୍ୟ ଅନୁଯାୟୀ, ୨୦୨୫ ମେ ୩୧ ତାରିଖ ସୁଦ୍ଧା ପ୍ରାଥମିକ ବିଦ୍ୟାଳୟରେ ୬୭୮ଟି ବରିଷ୍ଠ ପ୍ରଧାନ ଶିକ୍ଷକ ପୋଷ୍ଟ ଖାଲି ପଡ଼ିଥିବା ବେଳେ ଉଚ୍ଚ ପ୍ରାଥମିକରେ ୧୨, ୫୨୫ଟି, ପ୍ରାଥମିକ ସ୍କୁଲରେ ୫୦୦୬ଟି ପ୍ରଧାନ ଶିକ୍ଷକ ପଦ ଖାଲି ରହିଛି । ମୋଟ ୧୮ ହଜାର ୨୦୯ଟି ପ୍ରଧାନଶିକ୍ଷକ ପୋଷ୍ଟ ଖାଲି ପଡ଼ିଛି । ଓଡ଼ିଶାରେ ୪୫ ହଜାରରୁ ଅଧିକ ସରକାରୀ ସ୍କୁଲ ରହିଛି । ଏଥିରେ ପ୍ରାଥମିକ, ଉଚ୍ଚ ପ୍ରାଥମିକ, ଏବଂ ମାଧ୍ୟମିକ ବିଦ୍ୟାଳୟ ଅନ୍ତର୍ଭୁକ୍ତ। ସବୁଠୁ ଆଶ୍ଚର୍ଯ୍ୟ କଥା ହେଉଛି ଯେଉଁଠି ହାଇସ୍କୁଲ ରହିଛି ସେଠାରେ ଅଧିକାଂଶ ସ୍କୁଲରେ ସ୍ୱତନ୍ତ୍ର ପ୍ରଧାନ ଶିକ୍ଷକ ନିଯୁକ୍ତି ଦିଆଯାଇଛି । ଓଡ଼ିଶା ଶିକ୍ଷା ସେବା ରାଙ୍କର ଅଧିକାରୀଙ୍କୁ ନିଯୁକ୍ତି ମିଳିଛି । ଯେଉଁ ସ୍କୁଲ ପ୍ରାଥମିକ, ଉଚ୍ଚ ପ୍ରାଥମିକ ଓ ହାଇସ୍କୁଲ ମିଶି ରହିଛି ସେ ସ୍କୁଲରେ ଜଣେ ପ୍ରଧାନ ଶିକ୍ଷକ ଅଛନ୍ତି। ପ୍ରାଥମିକ, ଭଚ୍ଚ ପ୍ରାଥମିକ ସ୍କୁଲର ସ୍ୱତନ୍ତ୍ର ପ୍ରାଥମିକ ଶିକ୍ଷକ ନାହାନ୍ତି। ପ୍ରାଥମିକ ବିଦ୍ୟାଳୟରେ ସ୍ୱତନ୍ତ୍ର ପ୍ରଧାନଶିକ୍ଷକ ନିଯୁକ୍ତିର ପ୍ରାବଧାନ ନାହିଁ।
ଅନ୍ୟପଟେ ଓଟିଇଟି ପାସ୍ କରି ପାରୁନଥିବାରୁ ହେଡ୍ ସାର ପୋଷ୍ଟକୁ ପ୍ରମୋସନ୍ ହୋଇପାରୁନାହିଁ । ଅନେକ ସ୍ଥାନରେ ତ ବୁଝାଶୁଝା କରି ପ୍ରଧାନ ଶିକ୍ଷକ ଦାୟିତ୍ୱ ତୁଲାଇବାକୁ ରାଜି କରିବାକୁ ପଡ଼ୁଛି । ଅନେକ ସ୍କୁଲରେ ଗଣ ଶିକ୍ଷକ, ଶିକ୍ଷା ସହାୟକଙ୍କୁ ଏ ଗୁରୁ ଦାୟିତ୍ୱ ତୁଲାଇବାକୁ ପଡ଼ୁଛି।
