ସଂସାର କରିବାକୁ ଆଗ୍ରହ ପ୍ରକାଶ କରୁ ନାହାନ୍ତି ଯୁବପୀଢି । ବାହାଘର ପାଇଁ ଇଛା କରୁନାହାନ୍ତି ଯୁବବର୍ଗ । ବାହାଘର ଓ ସଂସାର ପ୍ରତି ବିମୁଖ ହେବାର ମାନସିକତା ଦିନକୁ ଦିନ ବଢିବାରେ ଲାଗିଛି । ଜନସଂଖ୍ୟା ବୃଦ୍ଧି ସାଙ୍ଗକୁ ଅବିବାହିତଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି। ପରିସ୍ଥିତି ଏମିତି ଦିଗକ ଗତି କରିଛି ଯେ ଜନସଂଖ୍ୟାର ଅଧା ଏବେ ବ୍ୟାଚଲର। ଜାତୀୟସ୍ତରରେ ଜନସଂଖ୍ୟାର ୫୧.୨%ଯୁବପୀଢ଼ି ଅବିବାହିତ । ୫୬.୪% ପୁରୁଷ ଅବିବାହିତ ରହିଥିଲା ବେଳେ ୪୫.୮% ମହିଳା ଅବିବାହିତ।
ଓଡ଼ିଶାର ଅଧା ଯୁବପୀଢ଼ିଙ୍କ ସଂସାର ପ୍ରତି ଆଗ୍ରହ ନାହିଁ
ଓଡ଼ିଶାରେ ଯୁବପୀଢ଼ି ସଂସାର ପ୍ରତି ଆଗ୍ରହ ଦେଖାଉ ନାହାନ୍ତି। ସମୁଦାୟ ଜନସଂଖ୍ୟାର ୪୬.୫% ବିବାହ କରି ନାହାନ୍ତି। ଓଡ଼ିଶାରେ ୫୧.୬% ପୁରୁଷ ଏବଂ ୪୧.୨% ମହିଳା ଅବିବାହିତ ଅଛନ୍ତି। ମହିଳାଙ୍କ ଅପେକ୍ଷା ପୁରୁଷମାନେ ଅଧିକ ମାତ୍ରାରେ ବାହାଘର ପ୍ରତି ଅନାଗ୍ରହି। ଓଡ଼ିଶାରେ ୪୯.୨% ବିବାହିତ । ୪୨.୨% ପୁରୁଷ ଓ ୪୬.୭% ମହିଳା ବର୍ଗ ବିବାହ କରିଛନ୍ତି।
ତେବେ କେବଳ ଓଡ଼ିଶା ନୁହେଁ ଅନ୍ୟ ରାଜ୍ୟରେ ମଧ୍ୟ ସମାନ ପରିସ୍ଥିତି ସୃଷ୍ଟି ହୋଇଛି। ଅବିବାହିତ ଯୁବପୀଢ଼ି ଏବେ ଜାତୀୟ ସମସ୍ୟାରେ ପରିଣତ ହୋଇଛି ।ଦେଶ ହେଉ ବା ରାଜ୍ୟ ବିବାହ ପ୍ରତି ପିଲାଙ୍କ ଆଗ୍ରହ କମୁଛି । ଏକାଏକା ଜୀବନ ବଞ୍ଚିବାକୁ ପସନ୍ଦ କରୁଛନ୍ତି ଯୁବପୀଢ଼ି । ଦେଶରେ ଜନସଂଖ୍ୟାର ୪୫.୫% ବିବାହ କରିଥିଲା ବେଳେ ବାକି ଅବିବାହିତ। ୪୨.୫% ପୁରୁଷ ଓ ୪୯% ମହିଳା ବର୍ଗ ବିବାହ କରିଛନ୍ତି ।
ରିପୋର୍ଟ ଅନୁଯାୟୀ ଜାମ୍ମୁ ଓ କଶ୍ମୀରରେ ସର୍ବାଧିକ ଅବିବାହିତ ଅଛନ୍ତି । ଜନସଂଖ୍ୟାର ୫୭.୩% ଅବିବାହିତ । ଏହି ରାଜ୍ୟ ପଛକୁ ଦ୍ୱିତୀୟରେ ରହିଛି ଉତ୍ତର ପ୍ରଦେଶ। ସେଠାରେ ୫୬.୮% ଅବିବାହିତ। ବିହାରରେ ସର୍ବାଧିକ ୬୩.୧% ପୁରୁଷ ଅବିବାହିତ । ସେହିପରି ଉତ୍ତରାଖଣ୍ଡରେ ୬୧.୭% ଯୁବପୀଢ଼ି ଅବିବାହିତ। ଅବିବାହିତ ପୁରୁଷ ବର୍ଗରେ ଓଡ଼ିଶା ୧୭ତମ ସ୍ଥାନରେ ରହିଛି। ସେହିପରି ମହିଳାଙ୍କ କ୍ଷେତ୍ରରେ ବିହାରରେ ମଧ୍ୟ ସର୍ବାଧିକ ମହିଳା ଅବିବାହିତ । ସେଠାରେ ୫୪.୫% ମହିଳା ଅଛନ୍ତି। ଏହି ବର୍ଗରେ ୧୬ତମ ସ୍ଥାନରେ ରହିଛି ଓଡ଼ିଶା।
