ପଞ୍ଜାବ ମୁହାଁ ହେବେ କି ଅରବିନ୍ଦ କେଜରୀୱାଲ?ଦୀଲ୍ଲି ଛାଡ଼ି ପଞ୍ଜାବ ଯିବେ କି ଆପ୍ ପୁରୋଧା?ଦୀଲ୍ଲିରୁ ହାରିଗଲା ପରେ, ପଞ୍ଜାବର ସି ଏମ୍ ସିଟରେ ବସିବେକି କେଜରିୱାଲ୍?ଦୀଲ୍ଲିରୁ ପରାଜିତ ହେବା ପରେ କେଜରିୱାଲଙ୍କୁ ନେଇ ଏମିତି ଚର୍ଚ୍ଚା ଗଣମାଧ୍ୟମକୁ ଖୋରାକ୍ ଯୋଗାଉଛି।କେଜରିୱାଲଙ୍କ ଦୀଲ୍ଲି ଦଖଲର ସ୍ୱପ୍ନ ପୂରଣ ନ ହେବା ପରେ ସେ ଏବେ ପଞ୍ଜାବକୁ ନେଇ ସ୍ୱପ୍ନ ଦେଖୁଥିବା ଚର୍ଚ୍ଚା। ଦୀଲ୍ଲୀରେ ୨୦୧୫ରୁ ଏକାକୀ କ୍ଷମତାରେ ଥିବା ଅରବିନ୍ଦ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି ୨୦୨୫ ବିଧାନସଭା ନିର୍ବାଚନରେ ପରାସ୍ତ ହୋଇଛି।ଦୀର୍ଘ ୨୭ ବର୍ଷ ପରେ ଦିଲ୍ଲୀରେ କ୍ଷମତା ଦଖଲ କରିଛି ବିଜେପି। ଆପ୍ ଦିଲ୍ଲୀରେ ହାରିଥିବା ବେଳେ ଦଳର ମୁଖିଆ କେଜ୍ରିୱାଲ ବି ନୂଆଦୀଲ୍ଲି ଆସନରେ ବି ପରାସ୍ତ ହୋଇଛନ୍ତି।
ଆପ୍ ଦିଲ୍ଲୀରେ ହାରିବା ପରେ ଏବେ ସମସ୍ତଙ୍କ ନଜର ପଞ୍ଜାବ ଉପରେ ରହିଛି। କାରଣ ଦିଲ୍ଲୀ ବ୍ୟତୀତ ଆପ୍ ପଞ୍ଜାବରେ ବି ସରକାର କରିଛି।ଦିଲ୍ଲୀର କ୍ଷମତା ହାତରୁ ଖସି ଯାଇଥିବାରୁ କୁହାଯାଉଛି ଯେ କେଜ୍ରିୱାଲ ଏବେ ପଞ୍ଜାବର ମୁଖ୍ୟମନ୍ତ୍ରୀ ହେବାକୁ ଚାହୁଁଛନ୍ତି।ପଞ୍ଜାବର ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କୁ ହଟାଇ ସେ ରାଜ୍ୟରେ ଦାୟିତ୍ୱ ନେବାକୁ ଲକ୍ଷ୍ୟ ରଖିଥିବା ଚର୍ଚ୍ଚା ହେଉଛି।
ଚର୍ଚ୍ଚା ଅନୁସାରେ, କେଜ୍ରିୱାଲ ପଞ୍ଜାବର ମୁଖ୍ୟମନ୍ତ୍ରୀ ହୋଇପାରନ୍ତି। ଏହାପରେ ସେ ବିଧାନସଭା ଉପ ନିର୍ବାଚନ ଲଢ଼ିବେ। ବର୍ତ୍ତମାନ ଲୁଧିଆନା ୱେଷ୍ଟ ଆସନ ଖାଲି ପଡ଼ିଛି। ୨୦୨୨ରେ ଏଠାରେ ଆପ୍ ଟିକେଟରେ ଗୁରପ୍ରୀତ ବାସି ଗୋଗି ବିଜୟୀ ହୋଇଥିଲେ। କିନ୍ତୁ ତାଙ୍କ ଦେହାନ୍ତ ଯୋଗୁ ଏହି ଆସନ ଖାଲି ପଡ଼ିଛି। ଖୁବଶୀଘ୍ର ଏଠାରେ ଉପ ନିର୍ବାଚନ ହୋଇପାରେ। ଏହି ଉପ ନିର୍ବାଚନରେ କେଜ୍ରିୱାଲ ଆପ୍ରୁ ଲଢ଼ି ବିଧିବଦ୍ଧ ଭାବେ ପଞ୍ଜାବ ସରକାରରେ ସାମିଲ ହୋଇପାରନ୍ତି ।
ଏବେ ଆପର ଫୋକସରେ ପଞ୍ଜାବ।୨୦୨୨ ବିଧାନସଭା ନିର୍ବାଚନ ବେଳେ ଆପ୍ ପଞ୍ଜାବରେ ବଡ଼ ବିଜୟ ହାସଲ କରିଥିଲା।ରାଜ୍ୟର ୧୧୭ ବିଧାନସଭା ଆସନରୁ ଦଳ ଏକାକୀ ୯୨ଟି ସ୍ଥାନରେ ବାଜିମାତ କରିଥିଲା। କିନ୍ତୁ ଦିଲ୍ଲୀ ବିଧାନସଭାରେ ଆପର ପରାଜୟ ଦଳର ପଞ୍ଜାବ ୟୁନିଟରେ ଅସ୍ଥିରତା ସୃଷ୍ଟି କରିଛି। କିଛି ନେତା ଅଭିଯୋଗ କରିଛନ୍ତି ଯେ ଦିଲ୍ଲୀ ନେତୃବୃନ୍ଦ ପଞ୍ଜାବ ସରକାରରେ ହସ୍ତକ୍ଷେପ ଜାରି ରଖିଛନ୍ତି।ଏବେ ଦିଲ୍ଲୀ ହାତରୁ ଖସି ଯିବାରୁ ଏହି ହସ୍ତକ୍ଷେପ ଆହୁରି ବଢ଼ିବ ବୋଲି ସେମାନେ ଆଶଙ୍କା କରିଛନ୍ତି।ପଞ୍ଜାବ ଆପ୍ରେ ଦେଖାଯାଇଥିବା ଅସ୍ଥିରତାରେ ପୂର୍ଣ୍ଣଚ୍ଛେଦ ଟାଣିବା ପାଇଁ ଆପ୍ ସୁପ୍ରିମୋ କେଜ୍ରିୱାଲ ନିଜେ ସେଠାରେ ସରକାର ଚଳାଇବାକୁ ଚାହୁଁଥିବା ଚର୍ଚ୍ଚା ହେଉଛି।
