ଭାରତୀୟ ଟେଷ୍ଟ କ୍ରିକେଟ ଟିମରୁ କ୍ୟାପ୍ଟେନସିପ ଛାଡ଼ିଛନ୍ତି ରୋହିତ ଶର୍ମା। ଅଧିନାୟକ ପଦବୀରୁ ରୋହିତ ଶର୍ମାଙ୍କ ଅବସର ଘୋଷଣା ପରେ ଏହି ସ୍ଥାନ କିଏ ପୂରଣ  କରିବ ତାକୁ ନେଇ ଚର୍ଚ୍ଚା। କାହା ମୁଣ୍ଡରେ ହାତୀ ସୁନାକଳସ ଢାଳିବ ତାକୁ ନେଇ କଳ୍ପନା ଜଳ୍ପନା ଆରମ୍ଭ ହୋଇ ଯାଇଛି। ରୋହିତଙ୍କ ସ୍ଥାନ ପୂରଣ କରିବା ନେଇ ଅନେକ କ୍ରିକେଟର ଆଶାୟୀ। ରୋହିତଙ୍କ ପରେ ଯଶପ୍ରୀତ ବୁମରା କ୍ୟାପ୍ଟେନ୍ ହେବା ନେଇ ଆଲୋଚନା ହେଉଥିଲା। ତେବେ ସେ ଆହତ ହେଇଥିବା କାରଣରୁ ତାଙ୍କର ଚାନ୍ସ କମ୍ ବୋଲି ଆକଳନ କରାଯାଉଛି ।
 ଆଉ ଏମିତିରେ ବି ବୋଲର ମାନଙ୍କୁ କ୍ୟାପ୍ଟେନ୍ କରିବାର ପରମ୍ପରା ଭାରତରେ ନାହିଁ। ଅନ୍ୟ ପକ୍ଷରେ ଯୁବ ଖେଳାଳିଙ୍କୁ କ୍ୟାପ୍ଟେନ୍ କରିବା ଉପରେ BCCI ଗୁରୁତ୍ୱ ଦେଉଛି। ପ୍ରତିଭାବାନ ବ୍ୟାଟର ଶୁବମନ ଗିଲ୍‌ କିମ୍ବା ରିଷଭ ପନ୍ତଙ୍କ ମଧ୍ୟରୁ ଜଣଙ୍କୁ ଦାୟିତ୍ୱ ମିଳିପାରେ ବୋଲି ଚର୍ଚ୍ଚା ହେଉଛି। ବିଦେଶ ମାଟିରେ ଭଲ ପ୍ରଦର୍ଶନ କରିପାରୁଥିବା ବିସ୍ଫୋରକ କିପର-ବ୍ୟାଟର ରିଷଭ ପନ୍ତଙ୍କୁ ଉପ-ଅଧିନାୟକ ଦାୟିତ୍ୱ ମିଳିପାରେ। ୪୨ରୁ ଅଧିକ ଆଭରେଜ୍‌ ରଖିଥିବା ପନ୍ତ ଅଷ୍ଟ୍ରେଲିଆ, ଇଂଲଣ୍ଡ ଓ ଦକ୍ଷିଣ ଆଫ୍ରିକାରେ ଶତକ ହାସଲ କରିପାରିଛନ୍ତି। ତାଙ୍କର ୭ଟି ସ୍କୋର ୯୦ରୁ ୯୯ ମଧ୍ୟରେ ରହିଛି। ଏଥିଯୋଗୁ ପନ୍ତଙ୍କୁ ଏହି ଫର୍ମାଟରେ ଅନ୍ୟତମ ଶ୍ରେଷ୍ଠ ବ୍ୟାଟର ବିବେଚନା କରାଯାଉଛି।

ବିରାଟ କୋହଲି ନିକଟ ଭବିଷ୍ୟତରେ ଟେଷ୍ଟ କ୍ରିକେଟରୁ ଅବସର ନେବାକୁ ଇଚ୍ଛା ପ୍ରକାଶ କରିଥିବାରୁ ସିଲେକ୍ସନ୍ କମିଟି ତାଙ୍କୁ ଇଂଲଣ୍ଡ ଟୁର୍‌ ପାଇଁ କ୍ୟାପ୍ଟେନ୍ କରି ନ ପାରେ। ତେବେ ଏ ସମସ୍ୟା ଭିତରେ ଯାହାଙ୍କ ନାଁ କୁ ନେଇ ସବୁଠୁ ବେଶି ଚର୍ଚ୍ଚା ହେଉଛି ସେ ହେଉଛନ୍ତି ଶୁଭମନ୍ ଗିଲ୍। ରୋହିତଙ୍କ ପରେ ଶୁଭମନ୍ ଗିଲ୍ ହିଁ ଉପଯୁକ୍ତ କ୍ରିକେଟର ବୋଲି ତାଙ୍କ ଉପରେ ବେଶୀ ଆସ୍ଥା ରଖାଯାଉଥିବା କୁହାଯାଉଛି । ରୋହିତଙ୍କ ଟେଷ୍ଟ କ୍ୟାରିୟରରେ ୧୨ ଶତକ ଏବଂ ୧୮ ଅର୍ଦ୍ଧଶତକ ସାମିଲ ରହିଛି । ସେ ୬୭ ଟେଷ୍ଟରେ ୪୦.୫୭ ହାରରେ ୪୩୦୧ ରନ କରିଛନ୍ତି ।
                  ଅନ୍ୟ ପକ୍ଷରେ ଶୁବମନ ଗିଲ ଟେଷ୍ଟରେ ୧୮୯୩ ରନ କରିଛନ୍ତି। ୩୨ଟି ଟେଷ୍ଟ ଖେଳି ୫ ଶତକ ଓ ୭ ଅର୍ଦ୍ଧଶତକ ସହିତ ୩୫ ଆଭରେଜରେ ରନ ସ୍କୋର କରିଛନ୍ତି। ଭାରତୀୟ କ୍ରିକେଟର ପ୍ରିନ୍ସ ଭାବେ ପ୍ରସିଦ୍ଧି ହାସଲ କରିଥିବା ଗିଲ ବର୍ତ୍ତମାନ IPL ଫ୍ରାଞ୍ଚାଇଜ ଗୁଜରାଟ ଟାଇଟନ୍ସର କ୍ୟାପ୍ଟେନସିପ କରୁଛନ୍ତି। ଗିଲଙ୍କୁ ଭାରତୀୟ କ୍ରିକେଟର ଭବିଷ୍ୟତ ଭାବେ ବିବେଚନା କରାଯାଉଥିବା ବେଳେ ତାଙ୍କୁ କ୍ୟାପ୍ଟେନ ଦାୟିତ୍ୱ ମିଳିବାର ସମ୍ଭାବନାକୁ ଆଡ଼େଇ ଦିଆ ଯାଇ ନପାରେ ।