Posts tagged Sachin Tendulkar

କ୍ରିକେଟ୍‌ରେ ବାପା-ପୁଅଙ୍କ ଷ୍ଟାର୍ ଯୋଡ଼ି

ବାପା ଥିଲେ ମଇଦାନର ଷ୍ଟାର୍, ପୁଅ ବି କିଛଇ କମ୍ ନୁହେଁ । କାହା ପାଇଁ ବାପାଙ୍କ ବ୍ୟାଟ୍ ଓ ବଲ୍ ହିଁ ପ୍ରେରଣାର ଉତ୍ସ ହୋଇଛି ତ ଆଉ କାହା ପାଇଁ ପିଲାଦିନରୁ କ୍ରିକେଟ୍ ମଇଦାନ ହିଁ ପାଲଟିଛି ସେକେଣ୍ଡ ହୋମ୍। ବିଶ୍ୱ କ୍ରିକେଟ୍ ଇତିହାସରେ ଏମିତି ଅନେକ ବାପା-ପୁଅଙ୍କ ଯୋଡ଼ି ରହିଛନ୍ତି, ଯେଉଁମାନେ ନିଜ ନିଜ ସମୟରେ ଦେଶ ପାଇଁ ଖେଳି ଖ୍ୟାତି ଅର୍ଜନ କରିଛନ୍ତି। ବାପାଙ୍କ ପରେ ପୁଅ ମଧ୍ୟ କ୍ରିକେଟ୍ ମଇଦାନରେ ନିଜ ପ୍ରତିଭାର ପରିଚୟ ଦେଇଛନ୍ତି। ଭାରତୀୟ କ୍ରିକେଟ୍‌ରେ ଏଭଳି ଏକ ଚର୍ଚ୍ଚିତ ଯୋଡ଼ି ହେଉଛନ୍ତି ସୁନୀଲ ଗାଭାସ୍କର ଓ ତାଙ୍କ ପୁଅ ରୋହନ ଗାଭାସ୍କର। ସୁନୀଲ ଗାଭାସ୍କର ଟେଷ୍ଟ କ୍ରିକେଟ୍‌ରେ ନିଜ ବ୍ୟାଟିଂର ଯାଦୁ ଦେଖାଇଥିବାବେଳେ ପୁଅ ରୋହନ ମଧ୍ୟ ଭାରତ ପାଇଁ ଦିନିକିଆ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ସେହିପରି ଭାରତର ପ୍ରଥମ ଟେଷ୍ଟ ଶତକଧାରୀ ଲାଲା ଅମରନାଥଙ୍କ ପୁଅ ମୋହିନ୍ଦର ଅମରନାଥ ମଧ୍ୟ ଭାରତୀୟ କ୍ରିକେଟ୍‌ର ଅନ୍ୟତମ ପରିଚିତ ଚେହେରା। ୧୯୮୩ ବିଶ୍ୱକପ୍ ବିଜୟରେ ମୋହିନ୍ଦରଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା। ତାଙ୍କ ଭାଇ ସୁରିନ୍ଦର ଅମରନାଥ ମଧ୍ୟ ଭାରତ ପାଇଁ ଟେଷ୍ଟ କ୍ରିକେଟ୍ ଖେଳିଥିଲେ। ବାପାଙ୍କ ପରି ପୁଅ ମଧ୍ୟ ବ୍ୟାଟ୍ ଧରି ଦେଶ ପାଇଁ ଖେଳିବାର ଉଦାହରଣ ହେଉଛନ୍ତି ବିଜୟ ମାଞ୍ଜରେକର ଓ ସଞ୍ଜୟ ମାଞ୍ଜରେକର। ବିଜୟ ମାଞ୍ଜରେକର ଭାରତ ପାଇଁ ଟେଷ୍ଟ ଖେଳି ନିଜର ସ୍ୱତନ୍ତ୍ର ପରିଚୟ ଗଢ଼ିଥିବାବେଳେ ପୁଅ ସଞ୍ଜୟ ଟେଷ୍ଟ ଓ ଦିନିକିଆ କ୍ରିକେଟ୍‌ରେ ନିଜ ଦକ୍ଷତା ପ୍ରମାଣ କରିଥିଲେ। ସେହିପରି ୧୯୮୩ ବିଶ୍ୱକପ୍ ବିଜୟୀ ଦଳର ସଦସ୍ୟ ରୋଜର ବିନ୍ନିଙ୍କ ପୁଅ ଷ୍ଟୁଆର୍ଟ ବିନ୍ନି ମଧ୍ୟ ଭାରତ ପାଇଁ ତିନୋଟି ଫର୍ମାଟ୍‌ରେ ଖେଳିଛନ୍ତି।

ଯୋଗରାଜ ସିଂହ ଭାରତୀୟ କ୍ରିକେଟ୍‌ର ଜଣେ ପୂର୍ବତନ ଦ୍ରୁତ ବୋଲର। ୧୯୮୧ ମସିହାରେ ସେ ଭାରତ ପାଇଁ ଗୋଟିଏ ଟେଷ୍ଟ ଓ ୬ଟି ଦିନିକିଆ ମ୍ୟାଚ୍ ଖେଳିଥିଲେ। ଆଘାତ ଓ ଅନ୍ୟ ପରିସ୍ଥିତି ଯୋଗୁଁ ତାଙ୍କ ଅନ୍ତର୍ଜାତୀୟ କ୍ରିକେଟ୍ କ୍ୟାରିୟର ଦୀର୍ଘ ହୋଇପାରିନଥିଲା। ତାଙ୍କ ପୁଅ ଯୁବରାଜ ସିଂହ ଭାରତୀୟ କ୍ରିକେଟ୍‌ରେ ନିଜର ଏକ ସ୍ୱତନ୍ତ୍ର ପରିଚୟ ତିଆରି କରିଥିଲେ। ୨୦୦୦ ମସିହାରେ ଅନ୍ତର୍ଜାତୀୟ କ୍ରିକେଟ୍‌ରେ ପାଦ ଦେଇଥିବା ଯୁବରାଜ ୨୦୦୭ ଟି-୨୦ ବିଶ୍ୱକପ୍ ଓ ୨୦୧୧ ଦିନିକିଆ ବିଶ୍ୱକପ୍ ବିଜୟର ଅନ୍ୟତମ ନାୟକ ଥିଲେ। ୨୦୧୧ ବିଶ୍ୱକପ୍‌ରେ ସେ ପ୍ଲେୟର ଅଫ୍ ଦି ଟୁର୍ଣ୍ଣାମେଣ୍ଟ ହୋଇଥିଲେ। ସଚିନ ତେନ୍ଦୁଲକର ଭାରତୀୟ କ୍ରିକେଟ୍‌ର ଅନ୍ୟତମ ମହାନ ଖେଳାଳି। ୧୯୮୯ ମସିହାରେ ମାତ୍ର ୧୬ ବର୍ଷ ବୟସରେ ଅନ୍ତର୍ଜାତୀୟ କ୍ରିକେଟ୍‌ରେ ପାଦ ଦେଇଥିବା ସଚିନ ୨୦୦ ଟେଷ୍ଟ ଓ ୪୬୩ ଦିନିକିଆ ଖେଳିଛନ୍ତି। ତାଙ୍କ ନାଁରେ ୧୦୦ଟି ଅନ୍ତର୍ଜାତୀୟ ଶତକର ବିଶ୍ୱ ରେକର୍ଡ ରହିଛି। ୨୦୧୧ରେ ଭାରତ ବିଶ୍ୱକପ୍ ଜିତିବା ତାଙ୍କ କ୍ରିକେଟ୍ ଜୀବନର ଏକ ସ୍ମରଣୀୟ ଅଧ୍ୟାୟ।ସଚିନଙ୍କ ପୁଅ ଅର୍ଜୁନ ତେନ୍ଦୁଲକର ମଧ୍ୟ ବାପାଙ୍କ ପଦାଙ୍କ ଅନୁସରଣ କରି କ୍ରିକେଟ୍‌କୁ ନିଜ କ୍ୟାରିୟର ଭାବେ ବାଛିଛନ୍ତି। ସେ ଜଣେ ବାମହାତୀ ଦ୍ରୁତ ବୋଲର ଓ ଉପଯୋଗୀ ବ୍ୟାଟର। ଆଇପିଏଲ୍‌ରେ ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଖେଳିବା ସହ ୨୦୨୩ରେ ଆଇପିଏଲ୍‌ରେ ଡେବ୍ୟୁ କରିଥିଲେ। ସେ ରଣଜୀ ଟ୍ରଫିରେ ଗୋଆ ପକ୍ଷରୁ ମଧ୍ୟ ଖେଳିଛନ୍ତି।ତେବେ ବାପା ସଚିନଙ୍କ ଭଳି ଅର୍ଜୁନ ଏଯାଏଁ ଭାରତୀୟ ସିନିୟର ଜାତୀୟ ଦଳରେ ସ୍ଥାନ ପାଇନାହାନ୍ତି। ତଥାପି କ୍ରିକେଟ୍ ମଇଦାନରେ ନିଜ ପ୍ରଦର୍ଶନ ଜରିଆରେ ନିଜର ସ୍ୱତନ୍ତ୍ର ପରିଚୟ ଗଢ଼ିବାକୁ ଉଦ୍ୟମ ଜାରି ରଖିଛନ୍ତି।

ଷ୍ଟାର କ୍ରିକେଟରଙ୍କ ଅଯୋଗ୍ୟ ପୁଅ,୩ ବର୍ଷରେ କରିଛନ୍ତି ୧୩ ରନ୍

ସଚିନ ତେନ୍ଦୁଲକର କ୍ରିକେଟ ଜଗତର ଗଡ ଭାବରେ ବେଶ୍ ଜଣାଶୁଣା । ନିଜର ନିଆରା ରେକର୍ଡ ପାଇଁ ସେ ସବୁବେଳେ କ୍ରିକେଟ ଜଗତରେ ସ୍ୱତନ୍ତ୍ର ସ୍ଥାନ ପାଇ ଆସିଛନ୍ତି । ୱାର୍ଲ୍ଡକପ୍ ହେଉ ବା ୱାନଡେ ମ୍ୟାଚ୍, ସବୁ କ୍ଷେତ୍ରରେ ସଚିନଙ୍କ ଅବଦାନ ସ୍ୱତନ୍ତ୍ର । ପିଲାଟି ଦିନୁ କ୍ରିକେଟ ପ୍ରତି ଅହେତୁକ ଆଗ୍ରହ ରଖିଥିବା ସଚିନ ଦିନକୁଦିନ ରେକର୍ଡର ପାହାଚ ଚଢି ଷ୍ଟାର ପାଲଟି ଯାଇଥିଲା ବେଳେ ତାଙ୍କ ପୁଅ ଅର୍ଜୁନ ତେନ୍ଦୁଲକର କିନ୍ତୁ ପୂରା ଫ୍ଲପ୍ । ବାପାଙ୍କ ରେକର୍ଡରୁ କାଣିଚାଏ ବି ହାସଲ କରି ପାରି ନାହାନ୍ତି ଅର୍ଜୁନ । କେବଳ ବାପାଙ୍କ ନେମ୍ ଫେମକୁ ୟୁଜ୍ କରି କ୍ରିକେଟ ଫିଲ୍ଡରେ ଜାଗା ମାଡ଼ିଥିବା ଅର୍ଜୁନ ପାଲଟି ଯାଇଛନ୍ତି ଷ୍ଟାର ବାପାଙ୍କ ଫ୍ଲପ୍ ପୁଅ

୩ ବର୍ଷରେ ୧୩ ରନ୍

ସଚିନ ତେନ୍ଦୁଲକର IPLରେ ମୁମ୍ୱାଇ ଇଣ୍ଡିଆନ୍ସରେ ସଦସ୍ୟ ଥିଲେ । ଦଳ ପାଇଁ ତାଙ୍କର ଅନେକ ଅବଦାନ ବି ରହିଛି । ସେ ଏବେ ଦଳରେ ନାହାନ୍ତି, କିନ୍ତୁ ତାଙ୍କ ପୁଅ ଦଳର ସଦସ୍ୟ ରହିଛନ୍ତି । ମାତ୍ର ଆଜି ଯାଏଁ ସେ କୌଣସି ଚମତ୍କାର ପ୍ରଦର୍ଶନ କରିପାରିନାହାନ୍ତି । ତେଣୁ ଦଳରେ ତାଙ୍କୁ ସୁଯୋଗ ବି ମିଳିପାରୁନାହିଁ । ବେଞ୍ଚରେ ବସି ବସି ଯାଉଛନ୍ତି ଅର୍ଜୁନ୍ । ଅର୍ଜୁନ ତେନ୍ଦୁଲକର ୨୦୨୧ରୁ ମୁମ୍ୱାଇ ଇଣ୍ଡିଆନ୍ସ ଦଳରେ ରହିଛନ୍ତି । ଆହତ କାରଣରୁ ଏହି ସିଜିନରେ ସେ ଖେଳିପାରିନଥିଲେ । ଏହାପରେ ୨୦୨୨ରେ ତାଙ୍କୁ ଡେବ୍ୟୁ କରିବାର ସୁଯୋଗ ମିଳିନଥିଲା ।  ୨୦୨୩ରେ ସେ ଡେବ୍ୟୁ କରିଥିଲେ, ଆଉ ୪ ମ୍ୟାଚ ଖେଳିଥିଲେ । ସେହିପରି ୨୦୨୪ରେ ମାତ୍ର ଗୋଟିଏ ମ୍ୟାଚ ଖେଳିଥିଲେ । ଏହି ୩ ବର୍ଷରେ ସେ ମାତ୍ର ୫ ମ୍ୟାଚ ଖେଳି ୩ ଓ୍ବିକେଟ ନେବା ସହ ୧୩ ରନ କରିଛନ୍ତି ।

୫ଟି ସିଜିନରେ ଅର୍ଜୁନ ତେନ୍ଦୁଲକରଙ୍କୁ ମୁମ୍ୱାଇ ଇଣ୍ଡିଆନ୍ସ ନିଜ ଦଳରେ ସାମିଲ କରୁଛି ସତ କିନ୍ତୁ କମ ସୁଯୋଗ ଦେଉଛି । ଏହାକୁ ନେଇ ବର୍ତ୍ତନମାନ ପ୍ରଶ୍ନ ଉଠୁଛି, ଯଦି ଅର୍ଜୁନଙ୍କ ପ୍ରଦର୍ଶନ ଭଲ ନାହିଁ କାହିଁକି ଦଳ ତାଙ୍କୁ ୫ ବର୍ଷ ହେବ ଟିମରେ ସାମିଲ କରୁଛି? କଣ ସଚିନ ତେନ୍ଦୁଲକରଙ୍କ ପାଇଁ ମୁମ୍ୱାଇ ଅର୍ଜୁନଙ୍କୁ ଦଳରେ ରଖୁଛି? ୨୦୨୧ରେ ମୁମ୍ୱାଇ ତାଙ୍କୁ ୨୦ ଲକ୍ଷ ଟଙ୍କାରେ କିଣିଥିଲା । ଏହାପରେ ୪ଟି ସିଜିନରେ ୩୦ ଲକ୍ଷ ଟଙ୍କାରେ ମୁମ୍ୱାଇ ତାଙ୍କୁ ଦଳରେ ସାମିଲ କରିଛି । ପ୍ରତ୍ୟକ ବର୍ଷ ଆଇପିଏଲରେ ନୂଆ ନୂଆ ଷ୍ଟାର ବାହାରୁଛନ୍ତି । ଚମତ୍କାର ପ୍ରଦର୍ଶନ କରି ରାତାରାତି ହିରୋ ହୋଇଯାଉଛନ୍ତି । ବିଶ୍ୱ କ୍ରିକେଟର ବଡ଼ ଚେହେରା ସଚିନ ତେନ୍ଦୁଲକରଙ୍କ ପୁଅ କିନ୍ତୁ ବହୁ ପଛରେ ପଡ଼ିଯାଇଛନ୍ତି ।

୨୦ କୋଟିର ବିଜ୍ଞାପନକୁ କାହିଁକି ନା କହିଥିଲେ ସଚିନ୍

ସଚିନ ତେନ୍ଦୁଲକରଙ୍କୁ ଖାଲିରେ କ୍ରିକେଟର ଗଡ୍ କୁହାଯାଏନି। ତାଙ୍କର ବ୍ୟକ୍ତିତ୍ୱ,ଚରିତ୍ର ସାଙ୍ଗକୁ ଖେଳିବାର ଶୈଳୀ ତାଙ୍କୁ ସବୁଦିନ ପାଇଁ ଚର୍ଚ୍ଚାରେ ରଖିଆସିଛି ।ତେବେ ଏପ୍ରିଲ 24 ହେଉଛି  ଗଡ୍‌ ଅଫ୍‌ କ୍ରିକେଟ୍‌’ ଅର୍ଥାତ ସଚିନ ତେନ୍ଦୁଲକରଙ୍କ ଜନ୍ମଦିନ। ଏହି ଦିନଟିକୁ କେବଳ ଦେଶ ନୁହେଁ, ସାରା ବିଶ୍ୱ ପାଳନ କରେ। ଭାରତର ପ୍ରତ୍ୟେକ ଗଳିରେ କ୍ରିକେଟକୁ ପହଞ୍ଚାଇବାରେ ମହାନ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କର ଗୁରୁତ୍ୱପୂର୍ଣ୍ଣ ଅବଦାନ ରହିଛି। ତାଙ୍କରି ପାଇଁ ଲକ୍ଷ ଲକ୍ଷ ଯୁବକ କ୍ରିକେଟ ଖେଳିବା ଆରମ୍ଭ କରିଥିଲେ।ଯେତେ ବି କ୍ରିକେଟର କ୍ରିଜରେ ରାଜ୍ କରନ୍ତୁ ନା କାହିଁକି ସଚିନ କିନ୍ତୁ ଫ୍ୟାନ୍ସଙ୍କ ମନରେ ଖାସ୍ ଜାଗା ନେଇ ରହିବେ।

କ୍ରିକେଟକୁ ଏତେ ପ୍ରସିଦ୍ଧ କରିଥିବା ଏବଂ ଭାରତରେ ଏହି ଖେଳର ଭଗବାନ କୁହାଯାଉଥିବା ସଚିନ ୨୪ ଏପ୍ରିଲ ୨୦୨୫ ରେ ୫୨ ବର୍ଷ ବୟସରେ ପାଦ ଦେଇଛନ୍ତି। ମରାଠି ପରିବାରରେ ସଚିନଙ୍କ ଜନ୍ମ । ବାପା ଜଣେ ଲେଖକ ଏବଂ କବି। ଭାଇ ମଧ୍ୟ ଜଣେ ଚିତ୍ରକର। ଫେମସ ସଂଗୀତଜ୍ଞ ସଚିନ୍ ଦେବ ବର୍ମନଙ୍କ ନାମ ଅନୁସାରେ ସଚିନଙ୍କ ନାମକରଣ ହୋଇଛି।୧୪  ବର୍ଷ ବୟସରେ ୧୯୮୭ ମସିହାରେ ଭାରତ-ଜିମ୍ବାୱେ ମଧ୍ୟରେ ହେଉଥିବା ବିଶ୍ୱ କପ୍‌ରେ ସଚିନ ବଲ୍‌-ବଏ ଥିଲେ। ୧୯୯୭, ୧୯୯୯, ୨୦୦୧, ୨୦୦୨, ୨୦୦୮, ୨୦୧୦ ମସିହାରେ ୧୦୦୦ ଲେଖାଏଁ ଟେଷ୍ଟ୍‍ ରନ୍‌ କରିଥିବା ସଚିନଙ୍କୁ ପରବର୍ତ୍ତୀ ମୁହୂର୍ତ୍ତରେ ‘ରନ୍‌ ମେସିନ୍‌’ ନାମରେ ଲୋକେ ଜାଣିଲେ।ସମୟକ୍ରମେ ସେ ପାଲଟିଗଲେ କ୍ରିକେଟର ଗଡ୍ ।
                   ତେବେ ବିଭିନ୍ନ ସମୟରେ କ୍ରିକେଟର ଓ ଆକ୍ଟର ଆଡ ମାଧ୍ୟମରେ କୋଟି କୋଟି ଟଙ୍କା ରୋଜଗାର କରୁଥିଲା ବେଳେ ସଚିନ କିନ୍ତୁ ଏ କ୍ଷେତ୍ରରେ ନିଜ ନିଆରା ବ୍ୟକ୍ତିତ୍ୱର ପରିଚୟ ଦେଇଛନ୍ତି । ୨୦କୋଟି ଟଙ୍କା ପ୍ରତି ଲୋଭାଶକ୍ତ ନ ହୋଇ ନିଜ ବିବେକର ପରିଚୟ ଦେଇଛନ୍ତି । ୨୦୧୦ ମସିହାରେ ସଚିନଙ୍କୁ ଏକ ମଦ କମ୍ପାନୀର ବିଜ୍ଞାପନ କରିବାକୁ ୨୦ କୋଟି ଟଙ୍କାର ଅଫର୍‌ ଆସିଥିଲା। ମାତ୍ର ସେ ବାପାଙ୍କ ନିକଟରେ କରିଥିବା ଶପଥ ଯୋଗୁ ସେ  ବିଜ୍ଞାପନ ପାଇଁ ମନା କରିଦେଇଥିଲେ। ସଚିନ ତାଙ୍କ ବାପାଙ୍କୁ କଥା ଦେଇଥିଲେ କି ସେ କେବେ ବି ନିଶାଦ୍ରବ୍ୟର ବିଜ୍ଞାପନ କରିବେ ନାହିଁ ।ତେଣୁ ସେ ଏ ବିଜ୍ଞାପନରୁ ଦୂରେଇ ରହିଥିଲେ ।