ହିନ୍ଦୁ ଧର୍ମ ପରିବର୍ତ୍ତନ କଲେ ଆଉ ମିଳିବନି ପଛୁଆ ବର୍ଗର ସଂରକ୍ଷଣ ସୁବିଧା, ଏଭଳି ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି ସୁପ୍ରିମକୋର୍ଟ । ଜଷ୍ଟିସ୍ ପ୍ରଶାନ୍ତ ମିଶ୍ର ଏବଂ ଜଷ୍ଟିସ୍ ଶ୍ରୀ ଚନ୍ଦ୍ରଶେଖରଙ୍କ ରାୟ ଅନୁଯାୟୀ, ହିନ୍ଦୁ ଧର୍ମ ଛାଡିବା ପରେ ହିନ୍ଦୁ ଧର୍ମର ଜାତିଗତ ପରିଚୟ ଆଧାରରେ ସେହି ବ୍ୟକ୍ତି ଇସଲାମ ଧର୍ମର ପଛୁଆବର୍ଗ ସଂରକ୍ଷଣ ସୁବିଧା ଦାବି କରାଯାଇ ପାରିବେ ନାହିଁ । ମାଡ୍ରାସ ହାଇକୋର୍ଟଙ୍କ ରାୟକୁ ସଠିକ୍ ଦର୍ଶାଇ ସୁପ୍ରିମକୋର୍ଟ କହିଛନ୍ତି ଯେ “ଜଣେ ଇସଲାମ୍ ଧର୍ମ ଗ୍ରହଣ କଲେ, ସେହି ବ୍ୟକ୍ତି ତାମିଲନାଡୁର ମୁସୁଲମାନଙ୍କ ପାଇଁ ଥିବା 7ଟି ପଛୁଆ ବର୍ଗ କ୍ୟାଟେଗୋରୀ ମଧ୍ୟରୁ କୌଣସି ଗୋଟିକରେ ବି ସଦସ୍ୟ ହୋଇପାରିବେ ନାହିଁ। ହିନ୍ଦୁ ଧର୍ମ ପରିବର୍ତ୍ତନ ପୂର୍ବରୁ ତାଙ୍କର ଜାତିଗତ ପରିଚୟକୁ ମୁସଲିମ୍ ପଛୁଆ ବର୍ଗ ଶ୍ରେଣୀରେ ସ୍ଥାନାନ୍ତର କରାଯାଇ ପାରିବ ନାହିଁ। ସେହିପରି, କୌଣସି ଧାର୍ମିକ ସଂଗଠନ ଜଣେ ବ୍ୟକ୍ତିଙ୍କର ସଂରକ୍ଷଣ ପାଇବାର ଯୋଗ୍ୟତାକୁ ନିର୍ଦ୍ଧାରଣ କରିପାରିବ ନାହିଁ।”
ପୂର୍ବରୁ ମାଡ୍ରାସ ହାଇକୋର୍ଟ କହିଥିଲେ ଯେ, ଜଣେ ବ୍ୟକ୍ତି ଇସଲାମ୍ ଧର୍ମ ଗ୍ରହଣ କରିବା ପରେ ହିନ୍ଦୁ ଧର୍ମରେ ମିଳୁଥିବା ଜାତିଗତ ପରିଚୟ ଆଧାରରେ ପଛୁଆ ବର୍ଗ ସଂରକ୍ଷଣ ସୁବିଧା ଦାବି କରିପାରିବେ ନାହିଁ।କିନ୍ତୁ ତାମିଲନାଡୁ ସରକାର ହିନ୍ଦୁ ଧର୍ମ ଛାଡି ଇସଲାମ୍ ଗ୍ରହଣ କରୁଥିବା ବ୍ୟକ୍ତିଙ୍କୁ ଜାତିଗତ ସଂରକ୍ଷଣ ସୁବିଧା ଦେବା ପାଇଁ ଯୁକ୍ତି କରୁଥିଲେ। ସେଥିପାଇଁ ମାଡ୍ରାସ ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରି ତାମିଲନାଡୁ ସରକାର ସୁପ୍ରିମକୋର୍ଟରେ ଯାଇଥିଲେ । କିନ୍ତୁ ତାମିଲିନାଡୁ ସରକାରଙ୍କର ଆବେଦନକୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି ।
- ସେହିଭଳି ସମ୍ବିଧାନର ଅନୁସୂଚିତ ଜାତି ଆଦେଶ ଅନୁଯାୟୀ, ହିନ୍ଦୁ, ଶିଖ୍ କିମ୍ବା ବୌଦ୍ଧ ଧର୍ମ ବ୍ୟତୀତ ଅନ୍ୟ ଧର୍ମ ପାଳନ କରୁଥିବା ବ୍ୟକ୍ତିଙ୍କୁ ଅନୁସୂଚିତ ଜାତି ବା ସିଡ୍ୟୁଲ୍ କାଷ୍ଟ ବର୍ଗର ସଦସ୍ୟ ଭାବେ ଗଣନା କରାଯିବ ନାହିଁ ।
- ତେଣୁ ଜଣେ ଅନୁସୂଚିତ ଜାତି ବର୍ଗର ବ୍ୟକ୍ତି ଯଦି ଇସଲାମ୍ ଧର୍ମ ଗ୍ରହଣ କରନ୍ତି, ତେବେ ତାଙ୍କର SC ସଂରକ୍ଷଣ ସୁବିଧା ଆପେ ଆପେ ହଟିଯିବ ।
- ଏପରିକି ଜଣେ ହିନ୍ଦୁ, ଧର୍ମ ପରିବର୍ତ୍ତନ କଲେ ଇସଲାମ୍ ଧର୍ମର ପଛୁଆ ବର୍ଗର ସଦସ୍ୟତା ଆପେ ଆପେ ମିଳିବ ନାହିଁ
- ଅର୍ଥାତ ଇସଲାମ୍ ଧର୍ମର ଅଧିସୂଚିତ ପଛୁଆ ବର୍ଗର ସଦସ୍ୟତା ପାଇବା ପାଇଁ ହିନ୍ଦୁ ଧର୍ମର ପୂର୍ବ ଜାତିଗତ ପଛୁଆପଣକୁ ଆଇନଗତ ଆଧାର ଭାବେ ଗ୍ରହଣ କରାଯାଇ ପାରିବ ନାହିଁ।
- ସେହିଭଳି ପୁନର୍ବାର ହିନ୍ଦୁ ଧର୍ମକୁ ଫେରିଲେ ମଧ୍ୟ ସଂରକ୍ଷଣ ସ୍ୱତଃ ମିଳିବ ନାହିଁ।
- ସୁପ୍ରିମକୋର୍ଟଙ୍କ ଏହି ଗୁରୁତ୍ୱପୂର୍ଣ୍ଣ ରାୟ ପରେ ହିନ୍ଦୁ ଧର୍ମରୁ ଇସଲାମକୁ ପରିବର୍ତ୍ତନ ହେଉଥିବା ସଂଖ୍ୟା ଉପରେ ଅକୁଂଶ ଲାଗିପାରେ।
ଏ ଷ୍ଟୋରୀ ଲେଖିଛନ୍ତି-ବିଜୟ କେତନ ବରାଳ