୧୯୩୬ ମସିହାରେ ପ୍ରତିଷ୍ଠା ହୋଇଥିଲା କଟକ ସରକାରୀ ପ୍ରେସ୍। ଓଡ଼ିଶା ସ୍ୱତନ୍ତ୍ର ପ୍ରଦେଶ ହେବା ସହ ଭାଷା ସମ୍ବନ୍ଧୀୟ କାମ ପାଇଁ ପ୍ରେସ ବି ସ୍ୱତନ୍ତ୍ର ପାଲଟିଥିଲା । ବହୁ ବିଶିଷ୍ଟ ବ୍ୟକ୍ତିଙ୍କ ଅବଦାନ ମଧ୍ୟ ରହିଥିଲା । କଟକ ମଧୁପାଟଣାରେ ଥିବା ଓଡ଼ିଶା ସରକାରୀ ପ୍ରେସ୍ ଧୀରେ ଧୀରେ ଅକାମୀ ହେଉଥିବା ଅଭିଯୋଗ ଆସୁଛି। ସ୍ୱାଧିନତା ପୂର୍ବରୁ ଯେଉଁଠି ୧୩୮୦ ଜଣ କର୍ମଚାରୀ କାମ କରୁଥିଲେ, ଏବେ ଅଛନ୍ତି ମାତ୍ର ୫ଶହ କର୍ମଚାରୀ। କର୍ମଚାରୀ ଅଭାବରୁ ଅନେକ କାମ ଘରୋଇ ସଂସ୍ଥାଙ୍କୁ ଦିଆଯାଉଛି । ଚଢାଦରରେ ସେଠି କାମ କରୁଥିଲେ ବି ସଂସ୍ଥାକୁ ସଜାଡ଼ିବାକୁ ସରକାରଙ୍କ ଆଗ୍ରହ ନାହିଁ।
୧୯୩୬ ମସିହାରେ ସ୍ଥାପିତ ହୋଇଥିବା ଓଡ଼ିଶା ସରକାରୀ ପ୍ରେସ୍ର ମୁଖ୍ୟ ଉଦ୍ଦେଶ୍ୟ ଥିଲା ସରକାରଙ୍କ ବିଭିନ୍ନ ଦଫ୍ତରକୁ ପ୍ରିଣ୍ଟିଂ ସାମଗ୍ରୀ ଓ ଅଫିସ୍ ଷ୍ଟେସନାରି ଯୋଗାଇବା। ୧୯୭୭ ମସିହାରେ ଆବଶ୍ୟକତାକୁ ଅନୁଭବ କରି କଟକ ମଧୁପାଟଣାର ୮୧ ଏକର ଜମିରେ ଅଫିସ ସ୍ଥାନାନ୍ତର ହୋଇଥିଲା। ସେତେବେଳେ କମ୍ପୋଜିଂ, ଲେଟର୍ ପ୍ରେସ୍ ଓ ମନୋ ଭଳି ଅନେକ ଟ୍ରେଡ୍ରେ କାମ ହେଉଥିଲା। କିନ୍ତୁ ଏବେ ସେଗୁଡିକ ମଧ୍ୟ ବନ୍ଦ ହୋଇଯାଇଛି। ବର୍ତ୍ତମାନ କେବଳ ଡିଟିପି, ପ୍ରୁଫ୍ରିଡିଂ, ଅଫସେଟ୍, ପ୍ଲେଟ୍ମେକିଂ ଓ ବାଇଣ୍ଡିଂ ଭଳି କିଛି ଟ୍ରେଡ୍ ଚାଲୁ ରହିଛି। ସରକାରୀ ପ୍ରେସ୍ରେ ପୂର୍ବରୁ ତିନି ହଜାରରୁ ଅଧିକ ସରକାରୀ ଫର୍ମ, ଓଡ଼ିଶା ବଜେଟ୍, ଓଡ଼ିଶା ଗେଜେଟ୍, ବିଧାନସଭା ପ୍ରଶ୍ନପତ୍ର, ନିର୍ବାଚନ ସଂପର୍କିତ କାଗଜପତ୍ର ଓ ଓଡ଼ିଶା ହାଇକୋର୍ଟର ଫର୍ମ ଛପାଯାଉଥିଲା। ଏହା ସହ ରାଜ୍ୟ ସରକାରଙ୍କ ସମସ୍ତ କାର୍ଯ୍ୟାଳୟକୁ ପେନ୍, କାଗଜ, ପିନ୍ ଭଳି ଷ୍ଟେସନାରି ସାମଗ୍ରୀ ମଧ୍ୟ ଏଠାରୁ ପଠାଯାଉଥିଲା। ପ୍ରାୟ ୧୫ ବର୍ଷ ହେଲା ଷ୍ଟେସନାରି ପଠାଇବା ବନ୍ଦ ରହିଛି।
ପ୍ରେସ୍ରେ ମୋଟ ୧୩୮୦ ପୋଷ୍ଟ ଥିଲା ବେଳେ ଏବେ ପ୍ରାୟ ୭୫ ପ୍ରତିଶତ ଖାଲି । ସ୍ଥାୟୀ ଓ ଆଉଟସୋର୍ସିଂ କର୍ମଚାରୀଙ୍କୁ ମିଶାଇ ପ୍ରାୟ ୫୦୦ ଜଣ କର୍ମଚାରୀ କାମ କରୁଛନ୍ତି। ପ୍ରତିମାସ ଅବସର ଓ ସ୍ୱେଚ୍ଛା ଅବସର ନେବାରୁ କର୍ମଚାରୀ ସଂଖ୍ୟା ଆଉ କମୁଛି। ଏହାର ପ୍ରଭାବରେ ଦୈନିକ କାର୍ଯ୍ୟ ବି ପ୍ରଭାବିତ ହେଉଛି ଓ ଅନେକ ଗୁରୁତ୍ୱପୂର୍ଣ୍ଣ କାମ ଅଧିକ ଖର୍ଚ୍ଚରେ ଘରୋଇ ଫାର୍ମରେ କରାଯାଉଛି।ଘରୋଇ ସଂସ୍ଥାଙ୍କୁ କାମ ଦିଆଯାଉଥିବାରୁ ଗୋପନୀୟତା ନେଇ ମଧ୍ୟ ପ୍ରଶ୍ନ ଉଠୁଛି । ଜାଗା ଜବରଦଖଲ ମଧ୍ୟ ସମସ୍ୟା ବଢାଉଛି । କେବେକି ସରକାରୀ କାର୍ଯ୍ୟର ମୁଖ୍ୟ କେନ୍ଦ୍ର ଥିବା ପ୍ରେସ୍ କର୍ମଚାରୀ ଅଭାବ ଓ ପ୍ରଶାସନିକ ଅବହେଳାରେ ଦୁର୍ଦ୍ଦଶାରେ ପହଞ୍ଚିଛି। ଯଦି ଶୀଘ୍ର ପଦକ୍ଷେପ ନ ନିଆଯାଏ, ତେବେ ଭବିଷ୍ୟତରେ ସରକାରୀ ପ୍ରେସ୍ ବନ୍ଦ ହୋଇପାରେ ।