ନାଁ କୁ ହିନ୍ଦୁସ୍ତାନୀ କିନ୍ତୁ ହୃଦୟ ପାକିସ୍ତାନୀ। ରହୁଛନ୍ତି ଭାରତରେ, ନୀରବରେ ସମର୍ଥନ କରୁଛନ୍ତି ପାକିସ୍ତାନକୁ। ଦେଶପ୍ରେମକୁ ନେଇ ତିଆରି ଫିଲ୍ମରେ ରିଲରେ ରୋଲ୍ ତ କରୁଛନ୍ତି, ମାତ୍ର ରିୟଲଟିରେ କରୁଛନ୍ତି କିଛି ଭିନ୍ନ କାମ। ବଲିଉଡ଼ର ପାକିସ୍ତାନ ପ୍ରେମ ଜଳଜଳ କରି ଦେଖୁଛନ୍ତି ଦେଶବାସୀ। ପାକିସ୍ତାନର ସେଲିବ୍ରେଟି ଏପରି ଘଡ଼ିସନ୍ଧି ମୂହୁର୍ତ୍ତରେ ନିଜ ଦେଶ ସପକ୍ଷରେ ରହିଥିଲା ବେଳେ ଭାରତର ସୁପରଷ୍ଟାର କିନ୍ତୁ ବେଇମାନୀ କରୁଥିବା ନଜର ଆସୁଛି। ଦେଶରେ ରହି ଶତୃଦେଶ ପ୍ରତି ତାଙ୍କର ଭିତିରି ପ୍ରେମ ବାରି ହେଇ ଯାଉଛି ।

ସୁପରଷ୍ଟାରଙ୍କ ପାକିସ୍ତାନ ପ୍ରେମ
ପହେଲଗାମ୍ ଆକ୍ରମଣକୁ ନେଇ ଦେଶବ୍ୟାପୀ ନିନ୍ଦା କରାଯାଉଥିଲା ବେଳେ କିଛି ସୁପରଷ୍ଟାର ମୁହଁରେ ତାଲା ଦେଇ ବସିଛନ୍ତି। ‘ଅପରେସନ ସିନ୍ଦୂର‘ ଏବଂ ପାକିସ୍ତାନର ଘୃଣ୍ୟ ଆକ୍ରମଣ ପ୍ରୟାସକୁ ନେଇ ଅମିତାଭ ବଚ୍ଚନ, ଶାହରୁଖ ଖାନ ଏବଂ ସଲମାନ ଖାନ କିଛି ବି କହୁ ନାହାଁନ୍ତି। ଏହି କାରଣରୁ ଏମାନେ ସମସ୍ତେ ସୋସିଆଲ ମିଡିଆରେ ପ୍ରବଳ ଟ୍ରୋଲ୍‌ ହେଉଛନ୍ତି। ଜମ୍ମୁ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରଠାରୁ ଅମିତାଭ ବଚ୍ଚନ ତାଙ୍କ ଟ୍ୱିଟରରେ କିଛି ଲେଖି ନାହାଁନ୍ତି। ଦେଶର ଏହି ଘଡିସନ୍ଧି ମୁହୂର୍ତ୍ତରେ ଶାହରୁଖ ଖାନ ଏବଂ ସଲମାନ ଖାନ ମଧ୍ୟ ମୁହଁ ଖୋଲୁ ନାହାନ୍ତି।

ନୀରବତାକୁ ନିନ୍ଦା,ଫୋକସରେ ପାକିସ୍ତାନୀ ଫ୍ୟାନ୍ସ
ଅପରେସନ ସିନ୍ଦୂର ଏବଂ ପାକିସ୍ତାନ ଦ୍ୱାରା ଭାରତ ଉପରେ ଆକ୍ରମଣ ସମ୍ପର୍କରେ ଶାହରୁଖ ଖାନ, ଅମିତାଭ ବଚ୍ଚନ, ସଲମନ ଖାନ୍ ସୋସିଆଲ ମିଡିଆରେ କୌଣସି ପ୍ରତିକ୍ରିୟା ଦେଇ ନଥିବାରୁ ସୋସିଆଲ ମିଡିଆରେ ଅଭିନେତାଙ୍କୁ କଡ଼ା ସମାଲୋଚନା କରାଯାଉଛି। ଅପରପକ୍ଷରେ, କିଛି ପାକିସ୍ତାନୀ ୟୁଜର ଶାହରୁଖ ଖାନଙ୍କ ନୀରବତାକୁ ପ୍ରଶଂସା କରିଛନ୍ତି।
ଜଣେ ପାକିସ୍ତାନୀ ୟୁଜର ଲେଖିଛନ୍ତି, “ଆପଣ ଏହି ରାଜନୀତିରେ ସାମିଲ ନ ହୋଇଥିବାରୁ ହୃଦୟରୁ ଆପଣଙ୍କୁ ବହୁତ ବହୁତ ସମ୍ମାନ। ଆପଣଙ୍କ ପାକିସ୍ତାନୀ ପ୍ରଶଂସକମାନେ ଆପଣଙ୍କୁ ବହୁତ ଭଲ ପାଆନ୍ତି ଏବଂ ଆପଣଙ୍କ ନୀରବତା ଆମ ପାଇଁ ବହୁତ ମହତ୍ତ୍ୱପୂର୍ଣ୍ଣ।” ଅନ୍ୟପକ୍ଷରେ ଜଣେ ଭାରତୀୟ ୟୁଜର୍‌ ଲେଖିଛନ୍ତି, “ପହଲଗାମ ଏବଂ ‘ଅପରେସନ ସିନ୍ଦୂର‘କୁ ନେଇ ଆପଣଙ୍କଠାରୁ ନୀରବତା ଆଶା କରାଯାଉ ନଥିଲା।”ଲାଗୁଛି ଭାରତରେ ରହିବା ପରେ ମଧ୍ୟ ତାଙ୍କ ହୃଦୟ ପାକିସ୍ତାନୀ।’’ ଶାହରୁଖଙ୍କୁ ନିର୍ଲଜ ବୋଲି ବି କହିଛନ୍ତି ।
ପାକିସ୍ତାନ ବିରୁଦ୍ଧରେ କହିବାକୁ ସଲମନଙ୍କର ସାହସ ନାହିଁ

‘ଅପରେସନ୍ ସିନ୍ଦୁର‘ ଏବଂ ପାକିସ୍ତାନ ଦ୍ୱାରା ଭାରତ ଉପରେ ଆକ୍ରମଣକୁ ନେଇ କିଛି କହି ନଥିବାରୁ ସଲମାନ ଖାନଙ୍କୁ ମଧ୍ୟ ୟୁଜର୍ସମାନେ ଟ୍ରୋଲ୍ କରୁଛନ୍ତି। ଜଣେ ସୋସିଆଲ ମିଡିଆ ୟୁଜର ଲେଖିଛନ୍ତି, – ‘ଅପରେସନ୍ ସିନ୍ଦୂର???’, ଚାଲନ୍ତୁ, ଅପରେସନ ସିନ୍ଦୂରର ଷ୍ଟୋରୀ ପୋଷ୍ଟ କରନ୍ତୁ। ଆଉ ଜଣେ ଲେଖିଛନ୍ତି – ସାହସ ଅଛି ତ, ପାକିସ୍ତାନ ବିରୁଦ୍ଧରେ କହିକି ଦେଖାଅ।
ବିଗ୍ ବିଙ୍କର ଲଜ୍ଜା ନାହିଁ
ବିଗ୍ ବିଙ୍କର ଲଜ୍ଜା ନାହିଁ  ବୋଲି କହି ଟ୍ରୋଲ୍ କରିଛନ୍ତି ଫ୍ୟାନ୍ସ। ଅମିତାଭ ବଚ୍ଚନ ଗତ ୧୫ ଦିନ ଧରି ସୋସିଆଲ ମିଡିଆରେ ନୀରବ ରହିଛନ୍ତି। ସେ ପହଲଗାମ ଆକ୍ରମଣ ବିଷୟରେ କିମ୍ବା ପାକିସ୍ତାନରେ ଥିବା ଆତଙ୍କବାଦୀ ଶିବିର ଉପରେ ଭାରତ ଦ୍ୱାରା ହୋଇଥିବା ଆକ୍ରମଣ ବିଷୟରେ କିଛି କହି ନାହାନ୍ତି। ସୋସିଆଲ ମିଡିଆ ବ୍ୟବହାରକାରୀମାନେ ଅମିତାଭ ବଚ୍ଚନଙ୍କୁ ସମାଲୋଚନା କରୁଛନ୍ତି। ଜଣେ ୟୁଜର ଲେଖିଛନ୍ତି – ଆଜି ବି କୌଣସି ଲଜ୍ଜା ନାହିଁ। ଆଉ ଜଣେ ଅମିତାଭଙ୍କୁ ଥଟ୍ଟା କରି ଲେଖିଛନ୍ତି – ସେ ରେଖା ଜୀଙ୍କ ସହ କୋଡ୍ ମାଧ୍ୟମରେ କଥା ହେଉଛନ୍ତି। କାରଣ ଜୟା ଜି ତାଙ୍କୁ ମେସେଜିଂ କରୁଥିବାର ଧରିନେଲେ। ଆଉ ଜଣେ ଲେଖିଛନ୍ତି – ତାଙ୍କର ଅଲଗା ପ୍ରକାରର ଯୁଦ୍ଧ ଚାଲିଛି। ଆଉ ଜଣେ ଲେଖିଛନ୍ତି – ପ୍ରଥମେ କେହି ତାଙ୍କଠାରୁ ଫୋନ୍ ଛଡ଼ାଇ ନିଅନ୍ତୁ।