ରୋହିତ-କୋହଲିଙ୍କ ଯୁଗ ଶେଷ। ଉଭୟଙ୍କ ବିନା ଇଣ୍ଡିଆ ଟିମରେ ଆରମ୍ଭ ହୋଇଛି ଏକ ନୂଆ ଯୁଗ। ସ୍ପଟଲାଇଟରେ ରହିଛନ୍ତି 25 ବର୍ଷୀୟ ୟଙ୍ଗଷ୍ଟାର ଶୁଭମନ୍ ଗିଲ୍। ଲିଡ୍ସର ହେଡିଂଲେ ପଡ଼ିଆରେ ଶୁକ୍ରବାର ଠାରୁ ଆରମ୍ଭ ହେବ ଭାରତ-ଇଂଲଣ୍ଡ ପ୍ରଥମ ଟେଷ୍ଟ୍। ଏହି ପ୍ରଥମ ମ୍ୟାଚ୍ ସହ ଭାରତୀୟ କ୍ରିକେଟ୍ରେ ଆନୁଷ୍ଠାନିକ ଭାବେ ଗିଲ୍-ଗମ୍ଭୀର ଯୁଗର ଶୁଭାରମ୍ଭ ହେବ। ଶୁବମନ ଗିଲ୍ଙ୍କ ନେତୃତ୍ୱରେ ପ୍ରଥମ ଥର ଭାରତୀୟ କ୍ରିକେଟ୍ ଦଳ ମ୍ୟାଚ୍ ଖେଳି ନୂଆ ଅଭିଯାନ ଆରମ୍ଭ କରିବ। ଦୁଇ ପୂର୍ବତନ ଅଧିନାୟକ ତଥା ଭାରତୀୟ କ୍ରିକେଟ୍ର ଦୁଇ ମହାନ ତାରକା ବିରାଟ କୋହଲି ଓ ରୋହିତ ଶର୍ମାଙ୍କ ଅବସର ପରେ ଗିଲ୍ ଆନୁଷ୍ଠାନିକ ଭାବେ ଏହି ଟେଷ୍ଟ୍ରୁ ଭାରତୀୟ କ୍ରିକେଟ୍ର ମଙ୍ଗ ଧରିବେ। ମୁଖ୍ୟ ପ୍ରଶିକ୍ଷକ ତଥା ପୂର୍ବତନ ଓପନର୍ ଗୌତମ ଗମ୍ଭୀରଙ୍କ ପାଇଁ ମଧ୍ୟ ଏହା ଏକ ନୂଆ ଅନୁଭୁତି ଆଣିଦବ।
୧୮ବର୍ଷ ପରେ ଗିଲ୍-ଗମ୍ଭୀର ଯୋଡ଼ି ଇଂଲଣ୍ଡରେ ଭାରତୀୟ କ୍ରିକେଟ୍ ଦଳକୁ ଜିତେଇବା ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇବେ। ଭାରତ ଶେଷ ଥର ପାଇଁ ୨୦୦୭ ମସିହାରେ ଇଂଲଣ୍ଡରେ ଟେଷ୍ଟ୍ ଶୃଙ୍ଖଳା ଜିତିଥିଲା। ଏଣୁ ଗିଲ୍-ଗମ୍ଭୀର ଭାରତର ଏହି ୧୮ବର୍ଷର ଅପେକ୍ଷାରେ ବିରାମ ଲଗାଇ ପାରିବେ କି ନାହିଁ ସେ ଚର୍ଚ୍ଚା ଏବେ ଚାରିଆଡ଼େ ଜୋର୍ ଧରିଛି । ଭାରତ ୨୦୨୫-୨୭ ଲାଗି ତା’ର ବିଶ୍ୱ ଟେଷ୍ଟ୍ ଚାମ୍ପିଅନସିପ୍ ଅଭିଯାନ ଆରମ୍ଭ କରିବ। ସେଥିପାଇଁ ଏହାର ଗୁରୁତ୍ୱ ବହୁଗୁଣ ବଢ଼ିଛି। କୋହଲି ଓ ରୋହିତଙ୍କ ଅବସର ପରେ ଭାରତୀୟ କ୍ରିକେଟ୍ ଦଳ ମଧ୍ୟ ଏକାଧିକ ଯୁବ ତାରକାଙ୍କୁ ସୁଯୋଗ ଦେଇଛି। ଏହି ଗସ୍ତ ସେମାନଙ୍କ ପାଇଁ ମଧ୍ୟ ବଡ଼ ପରୀକ୍ଷା ଭାବେ ଉଭା ହେବାକୁ ଯାଉଛି । ଭାରତର ସର୍ବକନିଷ୍ଠ ଟେଷ୍ଟ୍ ଅଧିନାୟକ ହେବାର ଗୌରବ ହାସଲ କରିଥିବା ଗିଲ୍ଙ୍କ ନେତୃତ୍ୱ ଶୈଳୀ ଉପରେ ମଧ୍ୟ ସମସ୍ତଙ୍କ ଖାସ୍ ନଜର ରହିବ। ଗିଲ୍ଙ୍କ ନେତୃତ୍ୱରେ ଭାରତ ୨୦୨୪ ମସିହା ଜୁଲାଇ ମାସରେ ଜିମ୍ବାୱେ ବିପକ୍ଷରେ ୫ ମ୍ୟାଚ୍ ବିଶିଷ୍ଟ ଟ୍ବେଣ୍ଟି-୨୦ ଶୃଙ୍ଖଳାକୁ ୪-୧ରେ ଜିତିଥିଲା। ଇଂଲଣ୍ଡରେ ମଧ୍ୟ ସେ ଏହି ସଫଳତା ଦୋହରାଇବେ ବୋଲି ପ୍ରଶଂସକ ଆଶା ରଖିଛନ୍ତି। ଗିଲ-ଗମ୍ଭୀରଙ୍କ ଯୋଡ଼ି ଇଣ୍ଡିଆ ଟିମ ପାଇଁ କେତେ ଶୁଭଙ୍କର ସାବ୍ୟସ୍ତ ହେଉଛି ତାହା ରେଜଲ୍ଟ କହିବ।୧୮ବର୍ଷ ପରେ ଲଗେଇପାରିବେ ତ ହାରିବାରେ ବ୍ରେକ୍।
