ପୁରୀ ଜିଲ୍ଲା ବଳଙ୍ଗା ବାୟାବର ଗାଁରେ ବଳଙ୍ଗା ପିଡ଼ିତାଙ୍କ ଶେଷକୃତ୍ୟ ସମ୍ପନ୍ନ ହୋଇଛି।ଦୀଲ୍ଲି ଏମ୍ସରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହେଇଛି। ଘଟଣାକୁ ଅନେକ ଦିନ ବିତିଯାଇଥିଲେ ବି ପୋଲିସର ହାତ ଖାଲି। ଏ ଘଟଣାରେ ପୋଲିସ କାହାର ଟେର୍ ପାଉନି। ଘଟଣାର ପ୍ରାରମ୍ଭିକ ତଦନ୍ତରୁ ତିନିଜଣ ଯୁବକଙ୍କ ନାଁ ଚର୍ଚ୍ଚା ହେଉଥିଲା ବେଳେ ପୀଡ଼ିତାଙ୍କ ମୃତ୍ୟୁ ପରେ ତାଙ୍କ ବାପାଙ୍କ ବୟାନ ଘଟଣାକୁ ସନ୍ଦେହ ଆଡ଼କୁ ଟାଣୁଛି। ଝିଅର ମାନସିକ ଅବସ୍ଥା ଭଲ ନଥିବା କହିବା ସହ ଏ ଘଟଣାରେ ରାଜନୀତି ନ କରିବାକୁ ତାଙ୍କ ବାପା ଅନୁରୋଧ କରିଛନ୍ତି। ତେବେ ଯଦି ତାଙ୍କ ବାପାଙ୍କ କଥା ସତ ହୁଏ ତାହେଲେ ପୋଲିସ କାହିଁକି ଏହାକୁ ଆତ୍ମହତ୍ୟା ବୋଲି ସ୍ପଷ୍ଟ କରୁନି ସେ ନେଇ ମଧ୍ୟ ଜନଅସନ୍ତୋଷ ଦେଖାଯିବା ସହିତ ପୋଲିସର ନିଷ୍କ୍ରିୟତା ଏବେ ଚର୍ଚ୍ଚାରେ।
ଜୁଲାଇ ୧୯ ତାରିଖ (ଶନିବାର)ରେ ପୀଡ଼ିତାଙ୍କ ଦେହରେ ନିଆଁ ଲାଗିଥିଲା। ଗୁରୁତର ନାବାଳିକାଙ୍କୁ ସେଦିନ ଭୁବନେଶ୍ୱରସ୍ଥିତ ଏମ୍ସରେ ଭର୍ତ୍ତି କରାଯାଇଥିଲା। ତାଙ୍କ ଶରୀରର ୭୫% ପୋଡ଼ିଯାଇଥିଲା। ତାଙ୍କୁ ଟ୍ରମା କେୟାରରୁ ବର୍ଣ୍ଣ ୟୁନିଟ୍କୁ ସ୍ଥାନାନ୍ତର କରାଯାଇଥିଲା। ଏକ ସ୍ୱତନ୍ତ୍ର ଡାକ୍ତରୀ ଟିମ୍ ତାଙ୍କର ଚିକିତ୍ସା କରୁଥିଲେ। ପରେ ରାଜ୍ୟ ସରକାରଙ୍କ ପକ୍ଷରୁ ତାଙ୍କୁ ଦିଲ୍ଲୀ ଏମ୍ସକୁ ଏୟାର ଲିଫ୍ଟ୍ କରାଯାଇଥିଲା। ଠିକ୍ ଦୁଇ ସପ୍ତାହ ପରେ ଅଗଷ୍ଟ 2 ତାରିଖ ଶନିବାରରେ ସେ ଆଖି ବୁଜିଛନ୍ତି। ତାଙ୍କ ମୃତ୍ୟୁ ପରେ ଓଡ଼ିଶା ପୁଲିସ ସୋସିଆଲ ମିଡ଼ିଆରେ ପୋଷ୍ଟ କରି ତଦନ୍ତ ଅନୁଯାୟୀ ଅନ୍ୟ କୌଣସି ବ୍ୟକ୍ତିଙ୍କ ସମ୍ପୃକ୍ତି ନ ଥିବା ସ୍ପଷ୍ଟ କରିଛି। ତଦନ୍ତ ଶେଷ ପର୍ଯ୍ୟାୟରେ ପହଞ୍ଚି ସାରିଥିବା ସ୍ପଷ୍ଟ କରିବା ସହିତ ସମ୍ବେଦନଶୀଳ ମନ୍ତବ୍ୟ ନ ଦେବାକୁ ଅନୁରୋଧ ମଧ୍ୟ କରିଛନ୍ତି। ଯାହାକୁ ନେଇ ପୋଲିସର ଭୂମିକା ଏବେ ସନ୍ଦେହ ଘେରରେ
କିଏ କହୁଛି ସତ?
ଏ ଘଟଣା ଘଟିବା ଦିନ ପୀଡ଼ିତାଙ୍କୁ ଉଦ୍ଧାର କରିଥିବା ବ୍ୟକ୍ତି ଜଣଙ୍କ କହିଥିଲେ, ଝିଅଟି ଜଳୁଥିବା ଅବସ୍ଥାରେ ବଞ୍ଚାଅ ବଞ୍ଚାଅ କହି ତାଙ୍କ ଘର ଭିତରକୁ ଦୌଡ଼ି ଆସିଥିଲା। ତା’ ଦେହରେ ନିଆଁ ଲାଗିଥିବାରୁ ତୁରନ୍ତ ତା’ ଉପରେ ପାଣି ଢାଳି ନିଆଁ ଲିଭାଇ ଥିଲେ। ବହି ଦେଇ ଫେରୁଥିବା ବେଳେ ୩ ଜଣ ଦୁର୍ବୃତ୍ତ ବାଇକରେ ଆସି ସେ ଝିଅ ଦେହରେ ନିଆଁ ଲଗାଇ ଦେଇଥିଲେ ବୋଲି ଝିଅଟି ତାଙ୍କୁ କହିଥିବା ସେ କହିଥିଲେ। ଦୁର୍ବୃତ୍ତମାନେ ଝିଅର ମୁହଁରେ କପଡ଼ା ପକେଇ ଦେଇଥିବାରୁ ସେ ଚିହ୍ନିପାରି ନଥିବା କଥା ମଧ୍ୟ କହିଥିଲେ। ୩ ଦୁର୍ବୃର୍ତ୍ତ ଏଭଳି କାଣ୍ଡ କରିଥିବା ଚର୍ଚ୍ଚା ମଧ୍ୟ ହେଲା । ପୁରୀ SP ପୀନାକ ମିଶ୍ର ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିବା ସହ ସାଇଣ୍ଟିଫିକ୍ ତଦନ୍ତ ମଧ୍ୟ ହୋଇଥିଲା । ସେ ସମୟରେ ପରିବାର ଲୋକେ ନ୍ୟାୟଦାବୀ କରୁଥିଲା ବେଳେ ଏବେ କିନ୍ତୁ ଝିଅର ମାନସିକ ଅବସ୍ଥାକୁ ନେଇ ଘଟଣାର ମୋଡ଼ ବଦଳା ଯାଉଥିବା ଚର୍ଚ୍ଚା ହେଉଛି । ଯାହାକୁ ନେଇ ଏବେ ସନ୍ଦେହରେ ପୋଲିସ…
ପୋଲିସ ପାଇଁ ବ୍ୟାକଫୁଟରେ ସରକାର
ବଳଙ୍ଗା ପୀଡ଼ିତାଙ୍କ ମୃତ୍ୟୁକୁ ନେଇ ପୋଲିସର ଆଭିମୁଖ୍ୟ ସରକାରଙ୍କୁ ବ୍ୟାକଫୁଟକୁ ନେଇଛି । ବିରୋଧୀଙ୍କୁ ଏ ପ୍ରସଙ୍ଗ ରାଜନୀତିର ଖୋରାକ୍ ଯୋଗାଇଛି । ପୀଡ଼ିତା ମରିବା ପୂର୍ବରୁ କାହିଁକି ତଦନ୍ତ ରିପୋର୍ଟ ଆସିଲାନି, ଯଦି ଝିଅର ମୁଣ୍ଡ ଦୋଷ ଥିଲା ତାହାଲେ ଆରମ୍ଭରୁ କାହିଁକି ତାଙ୍କ ବାପା ଥିଲେ ଚୁପ୍ ଥିଲେ? ପୋଲିସ ଯେତେବେଳେ ପଚରାଉଚରା କରୁଥିଲା, ସେତେବେଳେ କାହିଁକି ଏକଥା କହିନଥିଲେ ? ପୋଲିସ ପଚରାଉଚରା କରି କ’ଣ ଜାଣି ପାରିନଥିଲା ଝିଅର ମୁଣ୍ଡ ଦୋଷ ଅଛି ? ତେବେ ପୋଲିସ କି ତଦନ୍ତ କରୁଥିଲା ? ମିଛରେ ସରକାର କାହିଁକି କ୍ରାଇମବ୍ରାଞ୍ଚ ତଦନ୍ତ ନାଟକ କରୁଥିଲେ କହି ସରକାରଙ୍କୁ ଘେରୁଛନ୍ତି ବିରୋଧୀ। ସେହିଭଳି କ୍ରାଇମବ୍ରାଞ୍ଚ ତଦନ୍ତକୁ ନେଇ ମଧ୍ୟ ପ୍ରଶ୍ନ ଉଠୁଛି । ଆରମ୍ଭରୁ ଦୋଷୀ ଧରାପଡ଼ିବ କହୁଥିବା କ୍ରାଇମବ୍ରାଞ୍ଚ ୧୦ ଦିନରୁ ଅଧିକ ସମୟ ତଦନ୍ତ କରିବା ଭିତରେ କୌଣସି ତଥ୍ୟ ସାମ୍ନାକୁ ଆଣିନଥିଲା । କିନ୍ତୁ ଯେତେବେଳେ ପୀଡ଼ିତାଙ୍କ ମୃତ୍ୟୁ ହେଲା ସେତେବେଳେ ଏହି ଘଟଣାରେ ଅନ୍ୟ କାହାରି ସମ୍ପୃକ୍ତି ନଥିବା କୁହାଯାଉଛି। ପୋଲିସ ବିଭାଗର ଆଭିମୁଖ୍ୟକୁ ନେଇ ଏବେ ପ୍ରଶ୍ନବାଚୀ। ପୋଲିସ ସରକାରଙ୍କ ନିର୍ଦେଶରେ କାମ କରୁଛି ନା ସରକାରଙ୍କୁ ବଦନାମ କରୁଛି ଏ କଥା ମଧ୍ୟ ଦ୍ୱନ୍ଦରେ। ଲାଗୁଛି ପୋଲିସର ଏଭଳି ଆଚରଣ ଯୋଉଁ ବାରମ୍ବାର ସରକାର ବ୍ୟାକଫୁଟକୁ ଯାଉଛନ୍ତି।
