କ୍ରିକେଟ୍ରେ ହ୍ୟାଟ୍ରିକ୍ ନେବାକୁ ସବୁଠୁ ବଡ଼ ସଫଳତା ବୋଲି କୁହାଯାଏ। ଏମିତି ରେକର୍ଡ କରିଥିବା କ୍ରିକେଟର ଖୁବ୍ ବିରଳ। କିନ୍ତୁ ଅଷ୍ଟ୍ରେଲିଆର ଦୁଇଜଣ କ୍ରିକେଟର ଏମିତି ରେକର୍ଡ କରିଛନ୍ତି, ଯାହାକୁ ଆଜିପର୍ଯ୍ୟନ୍ତ ବିଶ୍ୱ କ୍ରିକେଟରେ କେହି ରିପିଟ୍ କରି ପାରିନାହାନ୍ତି। ଆଲେଡ୍ କେରି ଓ ଗାରେଥ୍ ମର୍ଗାନ୍ ଲଗାତାର ଛଅଟି ବଲ୍ରେ ଛଅଟି ୱିକେଟ୍ ନେଇ ଇତିହାସ ରଚିଛନ୍ତି।
ଆଲେଡ୍ କେରିଙ୍କ ଐତିହାସିକ ଡବଲ୍ ହ୍ୟାଟ୍ରିକ୍
୨୦୧୭ ଜାନୁଆରୀ ୨୧ରେ ଭିକ୍ଟୋରିଆର ଏକ କ୍ଲବ୍ ମ୍ୟାଚ୍ରେ ଗୋଲ୍ଡେନ୍ ପଏଣ୍ଟ କ୍ରିକେଟ୍ କ୍ଲବ୍ ପକ୍ଷରୁ ଖେଳୁଥିବା ଆଲେଡ୍ କେରି ପ୍ରଥମେ ଏହି ସଫଳତା ହାସଲ କରିଥିଲେ। ସେତେବେଳେ ବିପକ୍ଷ ଦଳ ୪୦/୨ରେ ମଜବୁତ ସ୍ଥିତିରେ ଥିଲା। କିନ୍ତୁ କେରି ଗୋଟେ ଓଭର୍ରେ ସମ୍ପୂର୍ଣ୍ଣ ମ୍ୟାଚ୍ର ଚିତ୍ର ବଦଳାଇଦେଲେ । ଇନିଂସର ନବମ ଓଭର୍ରେ କେରି ଲଗତାର ଛଅଟି ବଲ୍ରେ ଛଅଜଣ ବ୍ୟାଟ୍ସମ୍ୟାନଙ୍କୁ ଆଉଟ୍ କରିଥିଲେ। ପ୍ରଥମ ୱିକେଟ୍ ସ୍ଲିପ୍ରେ କ୍ୟାଚ୍, ଦ୍ୱିତୀୟଟି ୱିକେଟ୍କିପରଙ୍କ ହାତରେ କ୍ୟାଚ୍, ତୃତୀୟଟି ଏଲ୍ବିଡବ୍ଲ୍ୟୁ ଓ ପରବର୍ତ୍ତୀ ତିନିଜଣଙ୍କୁ ବୋଲ୍ଡ କରି ସେ ଅଦ୍ଭୁତ ରେକର୍ଡ କରିଥିଲେ।
ଗାରେଥ୍ ମର୍ଗାନ୍ଙ୍କ ଅବିଶ୍ୱସନୀୟ ପରଫମାନ୍ସ
୨୦୨୩ରେ ମାଜିରାବା ନେରାଙ୍ଗ କ୍ରିକେଟ୍ କ୍ଲବ୍ ପକ୍ଷରୁ ଖେଳୁଥିବା ଗାରେଥ୍ ମର୍ଗାନ୍ ମଧ୍ୟ ସେହି ଅସମ୍ଭବ ରେକର୍ଡ ହାତେଇଥିଲେ । ତାଙ୍କ ଦଳ ପାଇଁ ସ୍ଥିତି ନିରାଶାଜନକ ଥିଲା, କାରଣ ବିପକ୍ଷ ଦଳକୁ ଜିତିବା ପାଇଁ ଶେଷ ଓଭର୍ରେ କେବଳ ୪ ରନ୍ ଦରକାର ଥିଲା। କିନ୍ତୁ ମର୍ଗାନ୍ ମ୍ୟଜିକ ଦେଖାଇଲେ । ପ୍ରଥମ ଚାରିଟି ୱିକେଟ୍ କ୍ୟାଚ୍ରେ ଆଉଟ୍ ହୋଇଥିବାବେଳେ, ଶେଷ ଦୁଇଜଣ ବ୍ୟାଟ୍ସ ମ୍ୟାନଙ୍କୁ ସେ ବୋଲ୍ଡ କରିଥିଲେ। ଏହି ଲଗାତାର ଛଅଟି ୱିକେଟ୍ ନେଇ କେବଳ ଇତିହାସ ସୃଷ୍ଟି କରିନଥିଲା, ତାଙ୍କ ଦଳକୁ ରୋମାଞ୍ଚକର ଭାବେ ୪ ରନ୍ରେ ଜିତାଇଥିଲେ ।
ଆନ୍ତର୍ଜାତୀୟ କ୍ରିକେଟ୍ରେ ଏଯାଏଁ ଅସମ୍ଭବ
ଆଲେଡ୍ କେରି ଓ ଗାରେଥ୍ ମର୍ଗାନଙ୍କ ପରି ଆଜିପର୍ଯ୍ୟନ୍ତ ଆନ୍ତର୍ଜାତୀୟ କ୍ରିକେଟ୍ରେ କୌଣସି ବୋଲର୍ ଲଗାତାର ଛଅଟି ବଲ୍ରେ ଛଅଟି ୱିକେଟ୍ ନେଇପାରିନାହାନ୍ତି। ନିଲ୍ ୱାଗନର୍, ଅଲ୍-ଆମିନ୍ ହୋସେନ୍ ଓ ଅଭିମନ୍ୟୁ ମିଥୁନ୍ ଗୋଟେ ଓଭର୍ରେ ପାଞ୍ଚଟି ୱିକେଟ୍ ନେଇ ଏହାର ନିକଟକୁ ପହଞ୍ଚିଛନ୍ତି । ଆଲେଡ୍ କେରି ଓ ଗାରେଥ୍ ମର୍ଗାନ୍ଙ୍କ ଏହି ଅବିଶ୍ୱସନୀୟ ସଫଳତା କ୍ରିକେଟ୍ ଇତିହାସର ସବୁଠାରୁ ଦୁର୍ଲଭ ଓ ସ୍ମରଣୀୟ ମୁହୂର୍ତ୍ତମାନଙ୍କ ମଧ୍ୟରେ ଗଣାଯାଏ।
